Bamonimaidam Fire:
গুৱাহাটীৰ চান্দমাৰি আৰক্ষী থানাৰ অধীনৰ বামুণীমৈদাম ৰেলৱে কল’নী বজাৰত যোৱা দুদিনৰ ভিতৰত দুর্বৃত্তই কমেও সাতখন দোকানত অগ্নিসংযোগ কৰা ঘটনাক লৈ ব্যাপক প্রতিক্রিয়াৰ সৃষ্টি হৈছে।
এই দুষ্কাৰ্যৰ লগত জড়িত থকাৰ অভিযোগত এজন লোকক ৰাইজৰ সহযোগত আৰক্ষীয়ে গ্রেপ্তাৰ কৰিছে। তাৰ মাজতে যোৱা নিশা ৰাইজে কৰায়ত্ত কৰা এজন লোকক উদ্ধাৰ কৰিবলৈ যাওতে একাংশ লোকৰ দ্বাৰা আৰক্ষী ওলোটাই আক্ৰমণৰ সম্মুখীন হয়।
যোৱা দুদিনত বজাৰখনৰ সাতখন দোকানত অগ্নিসংযোগৰ ঘটনাক লৈ গভীৰ ৰহস্যৰ সৃষ্টি হয়। ইয়াকে লৈ বজাৰখনৰ ব্যৱসায়ীসকলে নিজাববীয়া তৎপৰতা অব্যাহত ৰাখি বৃহস্পতিবাৰে নিশা সন্দেহজনক অবস্থাত ঘূৰা-ফুৰা কৰি থকা এজন লোকক কৰায়ত্ত কৰে। সেইজনৰ লগত থকা আন চাৰিজনে বজাৰৰ পৰা দৌৰি পলায়ন কৰে।
সেই অনুসৰি উপর্যুপৰি প্ৰশ্ন কৰাত লোকজনে নিজৰ নাম ছফিকুল আলী বুলি প্রকাশ কৰে। মঙলদৈৰ বাসিন্দা বুলিও কয়। শতাধিক ব্যৱসায়ী আৰু অন্যান্য লোকে ঘেৰি ধৰাত ছফিকুলে কয় যে তেওঁলোকে জুই লগাবলৈ তালৈ আহিছিল। তেওঁলোক মুঠ পাঁচজন আছিল। বজাৰত অগ্নি সংযোগ কৰাৰ বাবে প্রত্যেককে আঠ হেজাৰ টকাকৈ দিয়া হৈছিল। অৱশ্যে কোনে এনে কামৰ বাবে ধন দিছিল সেই তথ্য ছফিকুলে প্রকাশ কৰিব নোৱাৰিলে।
ইপিনে, বজাৰখনত ইয়াকে লৈ সৃষ্টি হোৱা হুলস্থুলৰ খবৰ লাভ কৰি চান্দমাৰি আৰক্ষীৰ এটা দল উপস্থিত হয়। আৰক্ষীয়ে ৰাইজে এটা খুঁটাত বান্ধি থোৱা ছকূিলক উদ্ধাৰ কৰিবলৈ আগবাঢ়ে, কিন্তু একাংশ উত্তেজিত লোকে আৰক্ষীক বাধা প্রদান করে। তৎসত্ত্বেও আৰক্ষীয়ে ছফিকুলক উদ্ধাৰৰ লগতে উত্তেজনাপূর্ণ পৰিস্থিতি নিয়ন্ত্ৰণৰ চেষ্টা চলায়। তাৰ ফলত আৰক্ষী আৰু ৰাইজৰ মাজত খণ্ডযুদ্ধও লাগে। উত্তেজিত একাংশ লোকে আৰক্ষীলৈ শিল নিক্ষেপ কৰে। অৱশ্যে তাৰ মাজতে আৰক্ষীয়ে ছফিকুলক উদ্ধাৰ কৰি থানালৈ লৈ যায়। ইপিনে, আৰক্ষীক আক্ৰমণৰ অভিযোগত দুর্গেশ গুপ্তা নামৰ এজন লোকক আৰক্ষীয়ে আটক কৰে। আৰক্ষীয়ে ধৃত ছফিকুলৰ জেৰা অব্যাহত ৰাখিছে |