Good news for the Deaf People:
বাক্শক্তিহীন অর্থাৎ কথা ক’ব নোৱাৰা ব্যক্তিসকললৈ সুখবৰ অনা বুলি দাবী কৰিছে অষ্ট্ৰেলিয়াৰ একাংশ গৱেষক-বিজ্ঞানীয়ে। ছিডনী বিশ্ববিদ্যালয়ৰ এই গৱেষক বিজ্ঞানীসকলে কৃত্রিম বুদ্ধিমত্তা (এআই) যুক্ত এনে এটা যন্ত্ৰ তৈয়াৰ কৰা বুলি দাবী কৰিছে যে যি যন্ত্রই এজন ব্যক্তিৰ মনৰ ভাব ভাষাৰে লিখিব পাৰে। অর্থাৎ এই যন্ত্রই মনক পঢ়িব পাৰে।
দৰাচলতে মস্তিষ্কৰ তৰংগক শব্দলৈ ৰূপান্তৰিত কৰিব পাৰে এই যন্ত্রই। এই যন্ত্র এলন মাস্কৰ ‘ব্রেইন চিপ’তকৈও উন্নত বুলি সংশ্লিষ্ট বিজ্ঞানীসকলে দাবী কৰিছে। বিজ্ঞানীসকলৰ মতে, এই যন্ত্ৰৰ সহায়ত মানুহৰ মন পঢ়িব পাৰি। হেলমেটৰ দৰে এই যন্ত্র এজন ব্যক্তিক পিন্ধোৱা হয়। ইয়াৰ লগে লগে যন্ত্ৰত ব্যক্তিজনৰ মনৰ ভাব প্রকাশ পায়। এই যন্ত্ৰৰ সহায়ত মনৰ ভাব বুজাৰ ক্ষেত্রত ৬০ শতাংশ সফল হোৱা বুলিও বিজ্ঞানীসকলে দাবী কৰিছে।
এই যন্ত্র চিকিৎসা বিজ্ঞানৰ বিভিন্ন কামত ব্যৱহাৰ কৰিব পৰা হ’ব বুলিও বিজ্ঞানীসকলে দাবী কৰিছে। উদাহৰণস্বৰূপে স্ট্রোকত কোনো ব্যক্তিয়ে বাক্শক্তি হেৰুৱালে তেনে এজন ব্যক্তিৰ মনৰ ভাব বুজাত এই যন্ত্ৰ ব্যৱহাৰ কৰিব পৰা যাব। একেদৰে অটিষ্টিক শিশুৰ ক্ষেত্রত চিকিৎসকে এই যন্ত্ৰ ব্যৱহাৰ কৰিব পাৰিব। তদুপৰি আন কোনো কাৰণত বাশক্তি হেৰুৱাই পেলোৱা ব্যক্তিৰ স্পীচ থেৰাপিৰ ক্ষেত্ৰতো এই যন্ত্রবিধ ব্যৱহাৰ কৰিব পৰা যাব। আনকি জীনগত জটিল ৰোগ, অট’ইমিউন ৰোগ আদিত আক্রান্তসকলৰ ক্ষেত্ৰতো এই যন্ত্ৰ ব্যৱহাৰ কৰিব পৰা হ’ব বুলি সংশ্লিষ্ট গৱেষক বিজ্ঞানীসকলে দাবী কৰিছে।
অৱশ্যে এই সম্পর্কত অধিক গৱেষণাৰ প্ৰয়োজন বুলি একাংশ বিজ্ঞানীয়ে মত পোষণ কৰিছে। উল্লেখ্য যে এলন মাস্কৰ ব্ৰেইন চিপ মগজুৰ ভিতৰত স্থাপন কৰা হয়। ছিডনী বিশ্ববিদ্যালয়ৰ গৱেষক বিজ্ঞানীৰ দলটোৱে উদ্ভাৱন কৰা যন্ত্ৰবিধ মগজুত স্থাপনৰ প্রয়োজন নাই। তাৰ পৰিৱৰ্তে হেলমেটৰ দৰে এই যন্ত্ৰ ৰোগীয়ে পৰিধান কৰিলেই হয়। যন্ত্রবিধ ১২৮ টা ইস্ট্রেটডযুক্ত এটা টুপী সদৃশ। ইয়াৰ নাম ইলেক্ট্র’ এনচেফালোগ্রাম। এই টুপী আকৃতিৰ যন্ত্ৰৰ মাজত চেন্সৰ আৰু ৰিপৰ্ট কৰা যন্ত্ৰ থাকে।
মস্তিষ্কৰ স্নায়ুৰ মাজত চিন্তা-ভাবনাৰ যি তৰংগ প্ৰৱাহিত হয় সেইসমূহ এই যন্ত্ৰৰ ৰেকৰ্ড যন্ত্ৰটোত ৰেকৰ্ড হয়। পাছত এইসমূহ কম্পিউটাৰত ডিক’ড কৰা হ’য়। ইয়াৰ জৰিয়তে ব্যক্তিজনৰ মনৰ ভাবনা জানিব পৰা হয়। অর্থাৎ ভাব-চিন্তাৰ তৰংগক এই যন্ত্রই শব্দলৈ ৰূপান্তৰ কৰে। এই শব্দ লিখি উলিওৱাৰ বাবে আৰু এটা যন্ত্ৰ ব্যৱহাৰ কৰা হয়। এই যন্ত্ৰৰ নাম ডিঅ’য়েভ।
এই যন্ত্রটো এআইযুক্ত হৈ থাকে। ইয়াৰ বলত ব্যক্তিজনৰ মনৰ ভাব বুজিব পৰা হয়। এই তিনিটা কাম পৰিচালনা কৰাৰ বাবে যন্ত্রটোত লেংগুরেজ মডেল আছে। ইয়াৰ দ্বাৰা ভাষাগত অসুবিধা দূৰ কৰা হয়। অৰ্থাৎ ব্যাকৰণৰ ভুল আঁতৰোৱাৰ ব্যৱস্থা কৰে এই যন্ত্রই। অৱশ্যে এই যন্ত্র কেৱল বাক্শক্তিহীন ৰোগীৰ চিকিৎসাৰ ক্ষেত্ৰতহে ব্যৱহাৰ কৰা হ’ব। আন মানুহৰ মনৰ ভাব বুজাৰ ক্ষেত্ৰত যন্ত্ৰটো ব্যৱহাৰ কৰিবলৈ দিয়া নহয় বুলি সংশ্লিষ্ট বিজ্ঞানীসকলে প্রকাশ কৰিছে।