Spm Ias Academy:✒️প্রশাসনিক বিষয়া-কৰ্মচাৰী গঢ় দিয়া প্রতিষ্ঠানে লাখ লাখ টকাৰ কৰ ফাকি দিয়াৰ ভয়ংকৰ তথ্য পোহৰলৈ আহিছে। বিশেষকৈ অসম লোকসেৱা আয়োগৰ পৰীক্ষাত উত্তীৰ্ণ হোৱা একাংশ অসামৰিক, আৰক্ষী, কৰ, আবকাৰী আদি সেৱাৰ বিষয়াক তেওঁলোকেই সৃষ্টি কৰা বুলি দাবী কৰি অহা ‘এছপিএম আইএছ একাডেমী’ত সংঘটিত হৈছে এই বৃহৎ কৰ ফাকিৰ ঘটনা।
শেহতীয়াকৈ অসম ৰাজ্যিক কৰ বিভাগে দিছপুৰৰ নাতি দূৰৈত চিৰিয়াখানা পথত থকা প্রতিষ্ঠানখনত অভিযান চলাই বৃহৎ কৰ ফাকিৰ তথ্য পোহৰলৈ আনে। অযুত সপোন লৈ কোচিং প্রতিষ্ঠানটোত অধ্যয়ন কৰি থকা শ শ শিক্ষার্থীৰ ভৱিষ্যতৰ কথা চিন্তা কৰি ৰাজ্যিক কৰ বিভাগে প্রতিষ্ঠানটো ছীল কৰি নিদিলে যদিও প্রতিষ্ঠানটোৰ পৰা বহুকেইটা গুৰুত্বপূৰ্ণ ফাইল জব্দ কৰি তদন্ত অব্যাহত ৰাখিছে; কিন্তু প্রতিষ্ঠানটোৰ কৰ ফাকিৰ ধনৰ পৰিমাণ যদি অধিক পোহৰলৈ আহে আৰু বিভাগৰ নিৰ্দেশনা পালন নকৰে তেন্তে যিকোনো মুহূর্ততে প্রতিষ্ঠানটো ছীল কৰাৰ সম্ভাৱনা আছে।
উল্লেখ্য যে শিক্ষাক লৈ ব্যৱসায় কৰা প্রতিষ্ঠানটোৰ এই কীর্তি যাতে পোহৰলৈ নাহে তাৰ বাবে এই অভিযানৰ তথ্য সম্পূৰ্ণৰূপে গোপনে ৰাখিবলৈ অপচেষ্টা অব্যাহত ৰাখিছে এছপিএম কর্তৃপক্ষই। বিভাগৰ সূত্রই এই সন্দৰ্ভত কয় যে এক গোপন খবৰৰ ভিত্তিত কৰ বিভাগৰ এটা দলে ৩০ জুনত প্রতিষ্ঠানটোত তালাচী চলাইছিল।
তেতিয়াই ইয়াৰ বৃহৎ কৰ ফাকি উন্মোচিত হৈছিল। বিশেষকৈ প্রতিষ্ঠান কর্তৃপক্ষই প্রতিজন শিক্ষার্থীৰ পৰা জিএছটিৰ নাম ধন আদায় কৰি আহিছে। এই ধন আদায়ৰ পাছতো এছপিএম কর্তৃপক্ষই সেয়া জিএছটি বিভাগক জমা দিয়া নাছিল।
ইতিমধ্যে এই কৰ ফাকিৰ ঘটনাত এছপিএম কর্তৃপক্ষই ৩০ লাখ টকা জৰিমনা আদায় দিবলগীয়া হৈছে বুলি বিভাগীয় সূত্রই সদৰী কৰিছে। লগতে সূত্রটোরে কয় যে প্রতিষ্ঠানটোৱে ইয়াতকৈ অধিক কৰ ফাকি দিয়াৰ সম্ভাৱনা আছে। এই সন্দৰ্ভত তদন্ত অব্যাহত আছে আৰু চূড়ান্ত প্রতিবেদন অহাৰ পাছতে প্রতিষ্ঠানটোৱে প্রকৃততে কিমান টকাৰ কৰ ফাকি দিছিল সেয়া স্পষ্ট হ’ব।
যদি জৰিমনাসহ প্রকৃত কৰ ফাঁকিৰ মুঠ ধন প্রতিষ্ঠানটোরে আদায় নিদিয়ে, তেন্তে তাক ছীল কৰি দিয়া হ’ব বুলি সুত্রটোরে প্রকাশ কৰে।
উল্লেখ্য যে এগৰাকী এচিএছ-এপিএছ বিষয়া হোৱাৰ লক্ষ্যৰে অযুত সপোন লৈ পিতৃ-মাতৃয়ে কপালৰ ঘাম মাটিত পেলাই উপাৰ্জন কৰা টকাৰে এজন শিক্ষার্থীয়ে এনে ধৰণৰ ক’চিং চেণ্টাৰত অধ্যয়ন কৰে।
লগতে এনেধৰণৰ গৰিষ্ঠসংখ্যক ক’চিং চেণ্টাৰে দাবী কৰে যে তেওঁলোকৰ প্রতিষ্ঠানেই অধিক এচিএছ-এপিএছ বিষয়া এইবাৰ সৃষ্টি কৰিছে। এনে বিজ্ঞাপনত ভুল গৈয়ো বহুজনে এনে ক’চিং চেণ্টাৰত নামভর্তি কৰে। শিক্ষার্থীসকলৰ পৰা বিভিন্ন দিশ দেখুৱাই ক’চিং চেণ্টাৰসমূহে নামভৰ্তিৰ নামত এক মোটা অংকৰ ধন আদায় কৰে।
সময়ে সময়ে অভিযোগ উঠি আহিছে যে শিক্ষা প্রদানৰ নামত এনেবোৰ প্রতিষ্ঠানে মুকলি বজাৰ চলাইছে। আজি এছপিএমৰ ঘটনাই ইয়াক পুনৰ প্রমাণিত কৰিলে। উল্লেখ্য যে এছপিএম একাডেমীৰ বৃহৎ কৰ ফাকিৰ লগতে বিত্তীয় কেলেংকাৰিও পোহৰলৈ অহাৰ সম্ভাৱনা প্রকট হৈছে। যাৰ ফলত শিক্ষার্থীসকলৰ ভৱিষ্যতলৈ অনিশ্চয়তা নামি আহিছে।
ইয়াকে লৈ শংকিত হৈ পৰিছে প্রতিষ্ঠানটোত অধ্যয়নৰত শিক্ষার্থীসকল। বিশেষকৈ ৰাজ্য চৰকাৰে প্ৰদান কৰা ধনৰে বহুকেইখন স্বায়ত্তশাসিত পৰিষদ, উন্নয়ন পৰিষদে সংশ্লিষ্ট জনগোষ্ঠীৰ শিক্ষার্থীসকলৰ সপোন বাস্তৱায়িত কৰিবলৈ ইউপিএছচি-এপিএছচি ক’চিঙৰ ব্যৱস্থা কৰিছে। এনে বহুকেইখন স্বায়ত্তশাসিত পৰিষদ-উন্নয়ন পৰিষদৰ ঠিকা লাভ কৰিছে এছপিএম একাডেমীয়ে। ইয়াতো বৃহৎ দুর্নীতি সংঘটিত হোৱাৰ অভিযোগ আছে।