SPM Academy: ✒️অসম লোকসেৱা আয়োগৰ পৰীক্ষাত উত্তীর্ণসকল তথা সম্প্রতি ৰাজ্যৰ বিভিন্ন প্ৰান্তত কৰ্মৰত হৈ থকা প্রশাসনিক-আৰক্ষী বিষয়াসকলৰ ৮০-৯০ শতাংশই তেওঁলোকৰ ক’চিং চেন্টাৰৰ দ্বাৰা প্ৰশিক্ষিত বুলি দাবী কৰি অহা ‘এছপিএম আইএছ একাডেমী’ৰ মুখা খোল খাবলৈ আৰম্ভ কৰিছে।
শিক্ষাৰ নামত বৃহৎ ব্যৱসায় চলাই অহা প্রতিষ্ঠানটোৱে লাখ লাখ টকাৰ কৰ ফাকি দি অহাৰ তথ্য বিভাগীয় অভিযানত ফাদিল হোৱাৰ পাছতে এতিয়া হাহাকাৰ লাগিছে।
এনে ঘটনাই ব্যৱসায়ত পেলাব পৰা প্ৰভাৱক লৈ চিন্তিত প্রতিষ্ঠানটোৱে সম্প্রতি এই বিষয়টো লোকচক্ষুৰ পৰা লুকুৱাই ৰাখিবলৈ হাবাথুৰি খাই ফুৰিছে। আনকি প্ৰভাৱশালী চক্ৰৰ জৰিয়তে প্রতিষ্ঠান কর্তৃপক্ষই বিষয়টো ‘মেনেজ’ কৰিবলৈ চেষ্টা অব্যাহত ৰখা বুলিও অভিযোগ উঠিছে।
ফলত গুণগত প্রশিক্ষণ প্রদান কৰি অহা বুলি দাবী কৰি অহা প্রতিষ্ঠানটোৱে অসম ৰাজ্যিক কৰ বিভাগৰ অভিযান কিয় গোপন কৰি ৰাখিবলৈ বিচাৰিছে, এই সন্দৰ্ভত বিভিন্নজনৰ মনত সন্দেহৰ সৃষ্টি হৈছে।
উল্লেখ্য যে ২৫ জুনত ৰাজ্যিক জিএছটি সঞ্চালকালয়ে ‘এছপিএম আইএছ একাডেমী’ৰ চিৰিয়াখানা পথ আৰু খাৰঘুলিত অৱস্থিত কে’বাটাও ঠিকনাত তালাচী অভিযান চলাইছিল। এই অভিযানকালত প্রতিষ্ঠানটোৱে বৃহৎ কৰ ফাকি দিয়াৰ তথ্য পোহৰলৈ আহে।
ফলত প্রতিষ্ঠানটোৱে প্রথম পৰ্যায়ত জৰিমনাৰূপে ৰাজ্যিক জিএছটি বিভাগক ৩০ লাখ টকা আদায় দিবলগীয়া হয়। সম্প্ৰতি এই কৰ ফাকিৰ ঘটনাত ৰাজ্যিক কৰ বিভাগে তদন্ত অব্যাহত ৰাখিছে আৰু শীঘ্ৰে চূড়ান্ত ৰূপ দিয়াৰ সম্ভাৱনা আছে।
তেনেস্থলত প্রতিষ্ঠানটোৱে উল্লিখিত জৰিমনাৰ ধনৰ উপৰি অধিক পৰিমাণৰ কৰ ফাকি দিয়া তথ্য পোহৰলৈ অহাৰ সম্ভাৱনা আছে। যদি নির্দিষ্ট সময়ৰ ভিতৰত এই ফাকি দিয়া কৰ আদায় নিদিয়ে, তেন্তে যিকোনো মূহর্তত প্রতিষ্ঠানটো ছীল কৰাৰ সম্ভাৱনা আছে।
উল্লেখ্য যে প্রতিষ্ঠানটোৱে ফাকি দি অহা এই কৰৰ ধন শিক্ষার্থীসকলৰ পৰা আদায় কৰিছিল। ফলত প্রশাসনিক বিষয়া গঢ় দিয়া বুলি দাবী কৰা প্ৰতিষ্ঠানৰ এই কৰ ফাকিৰ ঘটনাই ইয়াৰ শিক্ষাৰ্থীসকলৰ লগতে ৰাইজৰ মাজত ব্যাপক চর্চা লাভ কৰিছে।
ইফালে, অসম লোকসেৱা আয়োগৰ পৰীক্ষাত ‘এছপিএম একাডেমী’ৰ পৰা সৰ্বাধিক উত্তীর্ণ হয় বুলি কর্তৃপক্ষই বিভিন্ন মাধ্যমৰ জৰিয়তে প্ৰচাৰ চলাই আহিছে। প্রতিষ্ঠানটোৰ এই দাবীক লৈ সন্দেহৰ অৱকাশ আছে বুলি কে’বাটাও সূত্ৰই সদৰী কৰিছে।
ইয়াৰ মাজতে প্রতিষ্ঠানটোৰ কৰ ফাকিৰ ঘটনা পোহৰলৈ অহাৰ পাছতে সামাজিক মাধ্যমতো ই ব্যাপক চর্চা লাভ কৰিছে। আনকি ‘এছপিএম আইএছ একাডেমী’ৰ পৰা কিহৰ ভিত্তিত সৰ্বাধিক উত্তীর্ণ হয় বুলি দাবী কৰি আহিছে, ইয়াৰ এক নিৰপেক্ষ তদন্তৰো দাবী কৰিছে।
এই প্রতিষ্ঠানত বিশেষ কেতবোৰ চক্ৰৰ ক’লা ধন বিনিয়োগ হোৱা বুলি অভিযোগ উত্থাপিত হৈ আহিছে। উল্লেখ্য যে অসম লোকসেৱা আয়োগৰ পৰীক্ষাত প্রতিষ্ঠানটোৱে উত্তীর্ণ হাৰ ৮২.৫৫ শতাংশ বুলি দাবী কৰি অহাৰ ভিত্তি কি বুলিও প্রশ্ন উত্থাপিত হৈছে।
লক্ষ্যণীয় যে অন্যান্য এনে ক’চিং প্রতিষ্ঠানসমূহেও একেধৰণৰ দাবী কৰি আহিছে। তেনেস্থলত প্রশ্ন উদয় হৈছে যে প্রকৃততে সত্য কোন? নে প্রতিষ্ঠানসমূহে ভুৱা প্ৰচাৰ চলাই শিক্ষার্থীক আকৃষ্ট কৰি শিক্ষাৰ নামত এক বৃহৎ ব্যৱসায় চলাই আহিছে?
এই ক্ষেত্ৰত সংশ্লিষ্ট চৰকাৰী বিভাগসমূহৰ মৌনতায়ো ৰহস্যৰ সৃষ্টি কৰিছে। আনকি কোনো কোনোৱে এয়া ‘১২ ফেইল’ ছবিৰ বাস্তৱ ৰূপ নেকি বুলিও প্রশ্ন তুলিছে। যদি সচেতন মহলে দাবী কৰাৰ দৰেই ইয়াৰ নিৰপেক্ষ তদন্ত হয়, তেন্তে পৰ্দাৰ আঁৰৰ মুখা খোল খোৱাৰ পূৰ্ণ সম্ভাৱনা আছে।