Cm Vigilance Raid in latmandal Residence: এচিএছ নূপুৰ বৰাৰ সহযোগী লাটমণ্ডল সুৰজিৎ ডেকাৰ বৰপেটাৰ দঙৰকুছিৰ বাসগৃহত চিএম ভিজিলেঞ্চৰ তালাচী
বৰপেটা জিলাৰ বাঘবৰ ৰাজহ চক্ৰৰ এজন লাট মণ্ডল সুৰজিৎ ডেকাৰ বৰপেটাৰ চহৰৰ সমীপৰ দঙৰকুছিৰ বাসগৃহত সোমবাৰে গুৱাহাটীৰ পৰা অহা মুখ্যমন্ত্ৰীৰ তদাৰকী শাখাৰ এটা দলে তালাচী অভিযান চলায়। ইয়াৰ লগতে ডেকাক লগত লৈ বৰপেটাৰ ৰাজহ চক্ৰ বিষয়া ৰূপে এসময়ত কাৰ্যনিৰ্বাহ কৰা কামৰূপৰ গৰৈমাৰীৰ ৰাজহ চক্ৰ বিষয়া নুপুৰ বৰাৰ ভাৰাঘৰটো তালাচী অভিযান চলোৱা হয়। বৰপেটা চহৰৰ শ্ৰীকামাৰ পথত থকা ভাৰাঘৰটোত পুৱাৰ পৰা চলা এই অভিযানত প্ৰায় চাৰে দহ লাখ টকা আৰু নথি-পত্ৰ উদ্ধাৰ হোৱা বুলি মুখ্যমন্ত্ৰীৰ তদাৰকী শাখাৰ অভিযানকাৰী দলৰ বিষয়াই সদৰী কৰে।
উল্লেখযোগ্য যে বৰপেটাৰ ৰাজহ চক্ৰ বিষয়া হিচাপে কৰ্মৰত হৈ থকাৰ সময়ত নুপুৰ বৰাই কেলেংকাৰী সংঘটিত কৰাৰ অভিযোগ উত্থাপিত হৈছে। নুপুৰ বৰাৰ সহযোগী হিচাপে লাট মণ্ডল ডেকাই ভূমি সংক্ৰান্তীয় বিভিন্ন জালিয়াতি কৰাৰো অভিযোগ উত্থাপিত হৈছে। সেই সূত্ৰেই গুৱাহাটীৰ বাসভৱনত নুপুৰ বৰাৰ বিৰুদ্ধে অভিযান চলোৱাৰ সমান্তৰালকৈ বৰপেটাত থকা তেওৰ ভাৰাঘৰ আৰু সহযোগী লাট মণ্ডল ডেকাৰ বিৰুদ্ধে এই অভিযান চলে।
