হাইপাৰটেনছনৰ পৰা কিদৰে বাচিব?

Hypertension:✒️মানৱ জীৱন মানেই চিন্তা থাকিবই। এই চিন্তা সকলোৰে মনত প্রতি মুহূর্ততে থাকে। সেয়ে চিন্তাক বাদ দিলে জীৱনৰ অৰ্থই নাথাকে। কিন্তু সেই চিন্তা যদি কোনো আশংকাৰ বাবে হয়, তেন্তে সেয়া হ’ল দুশ্চিন্তা বা মানসিক উত্তেজনা। সম্প্ৰতি প্ৰদূষণৰ সমানে তাল মিলাই মানুহৰ মনবোৰত বৃদ্ধি পাইছে টেনছন। প্ৰদূষণে ক্ষতিৰ মাত্ৰা ক্ৰমাৎ বৃদ্ধি কৰিছে। দুশ্চিন্তাৰ ক্ষেত্ৰতো সেই একে কথাই ক’ব পাৰি। মানুহৰ মনত বৃদ্ধি পাইছে হাইপাৰটেনছন। অৱশ্যে কেতবোৰ নিয়ম মানি চলিলে আপুনি টেনছন দূৰ কৰিব পাৰে। অৱশ্যে তাৰ আগতে আপুনি জানিব লাগিব হাইপাৰটেনছনৰ সমস্যাত ভুগিলে ওপৰঞ্চি কি কি সমস্যা হয়।

বিঘ্নিত নিদ্রা

মনত টেনছন থাকিলে কেতিয়াও টোপনি ভাল নহয়। অর্থাৎ পর্যাপ্ত নিদ্রা ব্যাহত হয়। নিদ্ৰাৰত অৱস্থাতে হঠাৎ শ্বাস লোৱাত অসুবিধা পোৱা যেন অনুভৱ হয়, সেইদৰে প্ৰায়ে অত্যধিক শ্বাস-প্রশ্বাসৰো সমস্যাই জৰ্জৰিত কৰে। যাৰ ফলত টোপনি ভাল নহয়, গোটেই দিন চকু জ্বলা-পোৰা কৰে, টোপনিৰ ভাব থকা, অস্থিৰ তথা অলপতে খং উঠা আদি সমস্যাই দেখা দিয়ে।

হৃৎপিণ্ডৰ সমস্যা বৃদ্ধি

হাইপাৰটেনছনৰ স’তে হৃৎপিণ্ডৰ সমস্যাৰ সম্পৰ্ক নিবিড়। টোপনি কম হোৱাৰ পৰাই এই যাৱতীয় সমস্যাৰ সৃষ্টি হয়। ক’লেষ্টেৰ’ল বাঢ়ে, ধমনীৰ আশেপাশে ব্লকেজ হোৱাৰ ফলত ৰক্ত সঞ্চালন ব্যাহত হয়। এইবোৰৰ পৰা হাৰ্ট এটেক পর্যন্ত হ’ব পাৰে।

মৃত্যুক আমন্ত্রণ

বৰ্তমান মানুহৰ অকাল মৃত্যুৰ অন্যতম কাৰণ হৈছে হাইপাৰটেনছন। কামৰ চাপ, নানা পাৰিবাৰিক সমস্যা, একাকীত্ব আদিৰ পৰাই হাইপাৰটেনছন আৰম্ভহয়। দিনৰ পাছত দিন ধৰি অনিদ্রা, শৰ্কৰা, উচ্চ ৰক্তচাপ আদিয়ে সহজে মৃত্যুক আমন্ত্ৰণ কৰে। ৫০ৰ পৰা ৫৩ বছৰ বয়সৰ ভিতৰত এই সমস্যা বেছিকৈ প্রকট হয়।

নিজক ব্যস্ত ৰাখক

বিভিন্ন কামত নিজক ব্যস্ত কৰি ৰাখিব। অফিচৰ কামৰ বাহিৰেও কিতাপ পঢ়া, গান শোনা, লেখামেলা কৰা, ফুৰিবলৈ যোৱা আদিত ব্যস্ত থাকিব। নানা কামত ব্যস্ত থাকিলে মনত বেয়া চিন্তাবোৰে বাহ লোৱাৰ সময় নাপায়। আচলতে জীৱনত ভাল-বেয়া দুয়োটা থাকে। এই কামটো কিয় নহ’ল বা কেতিয়া হ’ব আদি বিষয়বোৰত অযথা চিন্তা নকৰাই ভাল। সময়ত সকলো হ’ব।

পর্যাপ্ত নিদ্রা

টোপনি বৰ ভাল হ’ব লাগে। সেয়ে অভ্যাস থাকিলে বিছনাত পৰাৰ পূৰ্বে কিতাপ পঢ়ক, পছন্দৰ গান শোনক বা অতিশয় ইচ্ছা হ’লে পছন্দৰ চিনেমা চাব। কিন্তু ধূমপান, মদ্যপান বা টিভি চোৱাৰ পৰা বিৰত থাকিব।

অযথা চিন্তা নকৰিব

যিখিনি বিষয়ত চিন্তা কৰা প্ৰয়োজন, সেইখিনিহে কৰিব। তাৰ বাহিৰে অযথা চিন্তা কৰি নাথাকিব। অতি বেছি চিন্তা কৰিলে শৰীৰ বেয়া হ’ব, তাতকৈ আন একো নহয়।

সুষম আহাৰ খাব

সুষম আৰু পৰ্যাপ্ত পৰিমাণৰ আহাৰ খাব। নিয়ম কৰি প্ৰতিদিনে দুই কিলোমিটাৰ খোজকাঢ়িব। প্ৰচুৰ পৰিমাণে পানী পান কৰিব। ইয়াৰ দ্বাৰা শৰ্কৰা, ৰক্তচাপ নিয়ন্ত্রণত থাকিব। টেনছন কমিব। লগতে বেয়া চিন্তা বা দুশ্চিন্তা একেবাৰে নাথাকে।

হাইপাৰটেনছন সম্পর্কে গৱেষণাৰ মত

গৰম দেশত বাস কৰা লোকসকলৰ ৰক্তচাপ বতৰৰ সমান্তৰালকৈ উঠা-নমা কৰে। ফলত শাৰীৰিক সমস্যা বৃদ্ধি পায়। হাইপাৰটেনছনৰ প্ৰৱণতাও থাকি যায়। তুলনাত শীতপ্রধান দেশত এই সমস্যা অনেক কম। ফলত তেনে দেশত উচ্চ ৰক্তচাপত ভোগা মানুহৰ সংখ্যাও কম। গৰমৰ দেশৰ বাসিন্দা হ’লে আপোনাৰ এইক্ষেত্ৰত কৰিবলগীয়া একো নাই। কেৱল সাৱধানবাণীক অৱলম্বন কৰি জীৱন অতিবাহিত কৰিব পাৰে।

হাইপাৰটেনছনৰ পৰা হ’ব পাৰে

হৃৎপিণ্ডৰ সমস্যাতো আছেই, তাৰোপৰি হাইপাৰটেনছনৰ পৰা বৃক্কৰো গুৰুতৰ সমস্যা হ’ব পাৰে। সেয়ে কোনো ধৰণৰ সমস্যা অনুভৱ কৰিলেই চিকিৎসকৰ কাষ চাপিব।