এইবাৰ দেশৰ বিদ্যুতৰ বজাৰক ব্যক্তিগত খণ্ডৰ বাবে মুকলিৰ পদক্ষেপ গ্রহণ কৰিলে কেন্দ্ৰীয় চৰকাৰে। এই উদ্দেশ্যে কেন্দ্রীয় শক্তি মন্ত্রণালয়ে সংসদৰ আগন্তুক অধিবেশনত উত্থাপনৰ উদ্দেশ্যে এক খচৰা বিধেয়ক তৈয়াৰ কৰিছে বুলি উচ্চস্তৰীয় সূত্রই প্রকাশ কৰিছে।
উল্লেখ্য যে দেশৰ অধিকাংশ ৰাজ্যত বিদ্যুৎ সৰবৰাহৰ দায়িত্ব চৰকাৰী সংস্থাই বহন কৰি আছে। নৰেন্দ্ৰ মোদী চৰকাৰে বিদ্যুতৰ বজাৰ ব্যক্তিগত খণ্ডৰ সংস্থাৰ বাবেও মুকলিৰ পৰিকল্পনা কৰিছে। সূত্ৰটোৱে প্ৰকাশ কৰা অনুসৰি, কেন্দ্রীয় শক্তি মন্ত্রণালয়ে প্রস্তুত কৰা এই সংক্রান্তীয় বিধেয়ক সংসদত গৃহীত হ’লে আদানী এণ্টাৰপ্ৰাইজেছ, টাটা পাৱাৰ, চিইএছচিৰ লেখীয়া ব্যক্তিগত সংস্থাসমূহ লাভান্বিত হ’ব।
অর্থাৎ আদানী, টাটা আদিলৈ ৰঙা দলিচা পাৰি দিয়াৰ উদ্দেশ্যে দেশৰ বিদ্যুতৰ বজাৰ ব্যক্তিগত খণ্ডৰ সংস্থাৰ বাবে মুকলিৰ পদক্ষেপ মোদী চৰকাৰে গ্ৰহণ কৰিছে।
উল্লেখ্য যে সম্প্রতি দেশৰ তেনেই কম সংখ্যক স্থানত বিদ্যুৎ বিতৰণৰ দায়িত্ব ব্যক্তিগত খণ্ডৰ সংস্থাৰ হাতত আছে। এনে স্থানৰ অন্যতম হৈছে দেশৰ ৰাষ্ট্ৰীয় ৰাজধানী অঞ্চল (এনচিআৰ), ওড়িছা, মহাৰাষ্ট্ৰ আৰু গুজৰাটৰ কেতবোৰ অঞ্চল। কলকাতা আৰু কেতবোৰ অঞ্চলত বিদ্যুৎ সৰবৰাহৰ দায়িত্ব দিয়া হৈছে ব্যক্তিগত সংস্থা চিইএছইক।
এই সমূহ অঞ্চলক বাদ দি দেশৰ অধিকাংশ অঞ্চলতে চৰকাৰী সংস্থাই বিদ্যুৎ সৰবৰাহ কৰে। অৱশ্যে এনে সংস্থাসমূহৰ কিছু সংখ্যক লোকচানত চলি আছে। লোকচান ভৰি থকা এই বিদ্যুৎ বিতৰণ সংস্থাসমূহক পুনৰুজ্জীৱিত কৰাৰ চেষ্টাও অব্যাহত আছে।
আনহাতে, চলিত বছৰৰ আৰম্ভণিতে উত্তৰ প্ৰদেশৰ চাৰিটা বিদ্যুৎ বিতৰণ সংস্থাৰ দুটা ব্যক্তিগতকৰণৰ বাবে নিবিদা আহ্বান কৰা হৈছিল। এনে অৱস্থাতে কেন্দ্ৰই সমগ্ৰ দেশৰ বিদ্যুতৰ বজাৰ ব্যক্তিগত খণ্ডৰ বাবে মুকলি কৰাৰ পদক্ষেপ গ্রহণ কৰিছে।
সূত্ৰই প্ৰকাশ কৰা অনুসৰি, কেন্দ্ৰীয় শক্তি মন্ত্রণালয়ে প্রস্তুত কৰা এই সংক্রান্তীয় খচৰা বিধেয়কৰ প্ৰস্তাৱত কোৱা হৈছে যে একোটা অঞ্চলত বিদ্যুৎ বিতৰণৰ বাবে একাধিক ব্যক্তিগত সংস্থাই নিবিদা দাখিল কৰিব পাৰিব। বর্তমানে বলবৎ থকা আইনত বিদ্যুৎ বিতৰণৰ ক্ষেত্ৰত ব্যক্তিগত সংস্থাৰ প্ৰৱেশৰ নিয়ম নাই।
এই বিধেয়কৰ বিৰুদ্ধে দেশৰ বিভিন্ন স্থানত প্রতিবাদ গঢ়ি উঠাৰ সম্ভাৱনা প্ৰৱল হৈছে। কাৰণ ব্যক্তিগত সংস্থাই যোগান ধৰা স্মার্ট মিটাৰৰ লুণ্ঠনৰ বিৰুদ্ধে অসমকে ধৰি বিভিন্ন স্থানত প্রতিবাদ সাব্যস্ত হৈ আহিছে। অৱশ্যে চৰকাৰী পক্ষৰ মতে, বিদ্যুৎ বিতৰণৰ বজাৰত ব্যক্তিগত খণ্ডৰ সংস্থাৰ প্ৰৱেশ ঘটিলে বিভিন্ন সংস্থাৰ মাজত প্রতিযোগিতা হৈ গ্রাহকসকল লাভান্বিত হ’ব পাৰে।
উল্লেখ্য যে ২০২২তো কেন্দ্রই এনে এক পদক্ষেপ গ্রহণ কৰিছিল যদিও চৰকাৰী সংস্থাসমূহৰ বিৰোধিতাত চৰকাৰ থমকি ৰ’বলগীয়া হয়। গতিকে এইবাৰ কিয় মোদী চৰকাৰে পুনৰ একে পদক্ষেপ গ্ৰহণ কৰিলে তাক লৈয়ো সন্দেহ ঘনীভূত হৈছে। আদানী আদিক লাভান্বিত কৰিবলৈকে মোদী চৰকাৰে এই পদক্ষেপ লোৱা বুলি চর্চিত হৈছে।
