Nazira:১৯৭৫তে নির্মিত একেখন চিতাতে সৎকাৰ হয় নাজিৰাৰ মৃতকৰ

এখন নগৰৰ উন্নয়নৰ প্ৰকৃত স্বৰূপ কি সেয়া নাগৰিকৰ ব্যক্তিগত জীৱন ধাৰণৰ মান উন্নয়নৰ সমান্তৰালভাৱে নিৰ্ভৰ কৰে পাৰিৱেশিক স্বচ্ছতা আৰু নাগৰিকৰ মৃত্যুৰ সময়ত অন্তিম সৎকাৰ জনোৱা ব্যৱস্থাৰ ওপৰত। নাজিৰা নগৰ উন্নয়নৰ দিশত সদায়ে এক স্থবিৰ আৰু অনুন্নত ৰূপত পৰি বোৱা ছয় নম্বৰ বাৰ্ডত থকা শ্মশানখনৰ অৱস্থাই নাগৰিকৰ সামাজিক মান যে উন্নীত হোৱা নাই তাৰেই দৃষ্টান্ত দাঙি ধৰি আহিছে।

মনকৰিবলগীয়া কথা যে ডিব্রুগড়, ডিগবৈ, তিনিচুকীয়া আদি উজনি অসমৰ বিভিন্ন স্থানৰ তুলনাত নাজিৰাত এখন সুচল আৰু অত্যাধুনিক ৰাজহুৱা শ্মশান গঢ় লৈ নুঠাটো নাজিৰাৰ সমাজ জীৱনৰ এক নেতিবাচক বিষয় হৈ বৈছে। এখন অত্যাধুনিক ৰাজহুৱা শ্মশান তেল আৰু প্রাকৃতিক গেছৰ উৎপাদনী ক্ষেত্র আৰু তেল গেছ নিগমৰ অসম সম্পদৰ মুখ্য কার্যালয় নাজিৰাতে থাকিও গেছৰ প্রয়োগেৰে অথবা বিদ্যুৎ প্রয়োগৰ ব্যবস্থাৰে নাজিৰাবাসী নাগৰিকে গঢ়ি ল’ব নোৱাৰাতো এক সামাজিক দুৰ্বলতা।

ইংৰাজৰ আমোলত চাহ উদ্যোগৰ বিকাশৰ হেতুকে কলকতাৰ পৰা ইষ্ট ইণ্ডিয়া কোম্পানীৰ আওতাত নিয়ন্ত্রিত হৈছিল আৰু তাৰ বাবে চাহ উদ্যোগৰ কার্যালয়ে ১৯শ শতিকাতে নাজিৰাত মূৰ দাঙি উঠাৰ পৰিপ্ৰেক্ষিতত এক উন্নত বাণিজ্যিক কেন্দ্র হিচাপে ঐতিহাসিকভাৱে নাজিৰা চিহ্নিত হৈ আহিছিল।

১৮৫৭ৰ চিপাহী বিদ্ৰোহৰ এটা বছৰৰ পাছতে ইংৰাজ চৰকাৰে ইষ্ট ইণ্ডিয়া কোম্পানীৰ হাতৰ পৰা নিজে ভাৰতবৰ্ষৰ শাসন যন্ত্র চম্ভালি লয়। পৰৱৰ্তী ১৯০৯৩ ইংৰাজৰ আমোলতে নাজিৰা পৌৰসভা গঠিত হোৱাৰ দিন ধৰি এই পর্যন্ত নাজিৰা পৌৰসভাই ১১৬ টাকৈ বছৰ অতিক্রম কৰিছে। এইখিনি সময়ত নাজিৰা পৌৰসভাই নগৰ পৰিচালনাৰ স্বচ্ছতাৰ দিশৰ পৰাই হওক নতুবা নাগৰিকৰ সামাজিক সুবিধাৰ ক্ষেত্র বুলিয়েই হওক, আজিলৈকে ৰাইজৰ মাজত নগৰ শ্মশানখনিক এক সম্ভ্রম পূর্ণস্থান তথা সামাজিক সম্পদ হিচাপে চিনাকি দিবলৈ বিফল হৈ আহিছে। নাজিৰা পৌৰসভাই এই ক্ষেত্রত মনোযোগ দিয়া নাই বুলিও নাজিৰা শান্তিবন কেন্দ্রীয় শ্মশানৰ স’তে জড়িত বিষয়ববীয়াসকলৰ পৰা জানিব পৰা গৈছে।

ইফালে, অসম চৰকাৰে শ্মশানৰ উন্নয়নৰ বাবে ২৫ লাখ টকাৰ এক অনুদান প্ৰদান কৰা বুলি পৰিচালনা সমিতি অৱগত হৈছিল যদিও সেই অনুদানেৰেও কোনো উন্নয়নৰ পদক্ষেপ এই পর্যন্ত নাজিৰা পৌৰসভাই নল’লে বুলি পৰিচালনা সমিতিৰ সূত্ৰত জানিব পৰা গৈছে। ফলত নিঃসহায় শ্মশান পৰিচালনা সমিতিয়ে সম্প্রতি বিভিন্নজন সামাজিক ব্যক্তিৰ ওচৰ চাপি সেইসকলৰ ব্যক্তিগত পুঁজিৰেই নিৰ্মাণ কাৰ্যৰ কাম আৰম্ভ কৰিছে।

ইফালে, ১৯৭৫ত অর্থাৎ আজিৰ পৰা ৫০ বছৰৰ পূৰ্বেই লোৰ খুঁটাৰে অ’এনজিচিয়ে নিৰ্মাণ কৰি দিয়া একেখনি চিতাৰ ভেটিতে পাঁচটাকৈ দশক ধৰি নাজিৰাবাসীয়ে মৃত নাগৰিকৰ অন্তিম সৎকাৰৰ কাম কৰি আহিছে। ইয়াৰ মাজতেই ভালেকেইজন বদান্য ব্যক্তিৰ ব্যক্তিগত অনুদানেৰে শ্মশান চৌহদৰ প্রায় পাঁচ বিঘা ভূমিত মাটি পেলাই বাম কৰা, জিৰণি গৃহৰ নিৰ্মাণ, প্রবেশ তোৰণ নির্মাণ আৰু মেৰামতি, পানী যোগানৰ সংযোগ কৰা আদি কাম কৰি আহিছে যদিও নাজিৰা পৌৰসভাই কেৱল প্রৱেশ স্থানৰ পথছোৱাত সামান্য অংশত কেৱল পেভার্চ ব্লক পাৰি দিয়াৰ কামেই কৰিছে বুলি কয় পৰিচালনা সমিতিৰ বিষয়ববীয়াই।

এতিয়াও পানী আৰু বিজুলী মিটাৰৰ ওপৰত থকা ছালি ভাঙি প্ৰাত জোৰা-তাপলি মাৰিয়েই চলি ৰৈছে।

দূৰণিৰ পৰা অহা ব্যক্তিয়ে কোনো আত্মীয়ৰ সংকাৰ কৰাৰ সময়ত নাজিৰাৰ নগৰ শ্মশানত চলি থকা দুৰৱস্থা প্রত্যক্ষ কৰি দুই-এক স্থানত নিৰ্মাণৰ কাম কৰি যোৱাত স্থানীয় বহু নাগৰিকেই নিজৰ স্থানৰ দৈন্যতাৰ বাবে অনুশোচনাত ভুগি বয়। অতি সম্প্রতি নাজিৰাৰ মহেশ্বৰী মাৰোবাৰী সমাজে যোৱা ১২ অক্টোবৰত শান্তিবন নামাংকিত নাজিৰা কেন্দ্রীয় শ্মশানৰ খৰি সঞ্চয়ৰ বাবে এক পকী সঞ্চয় গৃহ নিৰ্মাণৰ আধাৰশিলা স্থাপন কৰে। প্রায় চাৰি লাখ টকাৰ ব্যয় নির্ধাৰিত এই গৃহৰ আধাৰশিলা স্থাপন কৰে শ্মশান পৰিচালনা সমিতিৰ সভাপতি পৰেশ গোস্বামী, মহেশ্বৰী মাৰোবাৰী সমাজৰ বয়োজ্যেষ্ঠ নাগৰিক সীতাৰাম চান্দক, সম্পাদক ভাৱৰিলাল ৰথীয়ে। শ্মশান সমিতিৰ সম্পাদক গণেশ হাজৰিকাই ‘দৈনিক অগ্রদূত’ক জনোবা মতে দ্বিতীয়খন চিতাৰ ভেটি নিৰ্মাণৰ কামো ইতিমধ্যে আৰম্ভ কৰা হৈছে।

নিজস্ব পুঁজিৰে এইখন চিতাৰ নিৰ্মাণৰ দায়িত্ব লৈছে বিশিষ্ট ব্যক্তি অজয় জাগাতিয়ে। সম্পাদকে জনোৱা মতে তৃতীয়খন চিতাৰ ভোটও নিৰ্মাণৰ বাবে বিশিষ্ট ব্যক্তি আগবাঢ়ি আহিছে। কোনো চৰকাৰী আৰু চৰকাৰী প্ৰতিষ্ঠানৰ অনুদান বিহীনভাবেই আগবঢ়া শান্তিবন শ্মশানত সম্পাদক গণেশ হাজৰিকাই নিজা প্রচেষ্টাত এখনি ফুলনি নির্মাণৰ পদক্ষেপ গ্রহণ কৰি অগ্ৰসৰ হৈ আহিছে বুলি প্রকাশ কৰে। চৰকাৰ তথা পৌৰসভাৰ উদাসীনতাৰ বাবে ইতিমধ্যে অ’এনজিচিয়ে আগবঢ়াব খোজা ১০ লাখ টকাৰ এক অনুদান উভতি যোৱা বুলি সম্পাদকে তীব্র অসন্তুষ্টি প্রকাশ কৰে। আনহাতে, বহু বছৰৰ পূর্বে অ’এনজিচিয়ে প্রদান কৰা আৰু শ্মশানলৈ যোৱা পথৰ ওপৰত স্থাপন কৰা ছলাৰ লাইটসমূহৰ সম্প্রতি এটাও জ্বলি থকা নাই।