Outbreak of African swine fever:
যোৱা জানুৱাৰীৰ পৰাই ৰাজ্যত আফ্রিকান ছোৱাইন ফিভাৰৰ প্ৰাদুৰ্ভাৱ আৰম্ভ হৈছে যদিও শেহতীয়াকৈ কে’বাখনো জিলাত ইয়াৰ সংক্রমণে ভয়ংকৰ ৰূপ ধাৰণ কৰিছে। যোৱা অক্টোবৰৰ মাজভাগৰ পৰা সংক্রমণে গুৰুতৰ ৰূপ ধাৰণ কৰাত ইতিমধ্যে কে’বা হেজাৰ গাহৰি পশুপালন আৰু পশু চিকিৎসা বিভাগে নিধন কৰে। তৎসত্ত্বেও ৰোগৰ সংক্ৰমণ প্ৰতিৰোধ হোৱা নাই। ইয়াৰ পৰিপ্ৰেক্ষিতত পশুপালন আৰু পশু চিকিৎসা বিভাগে এক নির্দেশযোগে আফ্রিকান ছোৱাইন ফিভাৰে গুৰুতৰ ৰূপ ধাৰণ কৰা সাতখন জিলাত গাহৰিৰ সৰবৰাহ বন্ধ ঘোষণা কৰে।
এই জিলা কেইখন হ’ল- ধেমাজি, কামৰূপ, লখিমপুৰ, শিৱসাগৰ, দৰং, যোৰহাট আৰু ডিব্ৰুগড়। ইয়াৰ লগতে এই জিলা কেইখনত গাহৰি মাংসৰ বিক্ৰীও আজিৰে পৰা সম্পূৰ্ণৰূপে নিষিদ্ধ কৰা হৈছে। পৰৱৰ্তী নির্দেশনা জাৰি নোহোৱা পর্যন্ত এই নিষেধাজ্ঞা বাহাল থাকিব বুলি বিভাগটোৰ আয়ুক্ত আৰু সচিব স্বাক্ষৰিত নির্দেশটোত উল্লেখ কৰা হৈছে।
উল্লেখ্য যে আফ্রিকান ছোৱাইন ফিভাৰত গাহৰিৰ মৃত্যুৰ হাৰ এশ শতাংশ। ৰাজ্যৰ গাহৰি উদ্যোগটোতে এই ৰোগৰ সংক্রমণে বৃহৎ মাধমাৰ সঘনে শোধাই আহিছে। এইবাৰো এই সমস্যাই অতি গুৰুতৰ ৰূপ ধাৰণ কৰিছে। চলিত বৰ্ষৰ যোৱা জানুৱাৰীৰ পৰা এই ৰোগৰ অভিকেন্দ্ৰ হিচাপে ২৯৭টা স্থানক চিনাক্ত কৰা হৈছে। ৰাজ্যৰ প্ৰায় সকলো জিলাতে এই ৰোগৰ সংক্ৰমণ দেখা গৈছে যদিও শেহতীয়াকৈ সংশ্লিষ্ট জিলাকেইখনৰ পৰিৱেশ অতি ভয়াৱহ হৈ পৰিছে।
গাহৰিৰ ব্যৱসায় অতি লাভজনক হিচাপে ব্যৱহৃত হৈ আহিছে আৰু নতুন নতুন যুৱ ব্যৱসায়ীয়ে এই ব্যৱসায়ত হাত দিছে। চৰকাৰেও গাহৰি পালনত অগ্ৰাধিকাৰ প্ৰদান কৰিছে আৰু এই সকলো প্রচেষ্টাতে মাধমাৰ শোধাইছে আফ্রিকান ছোৱাইন ফিভাৰে। এই মাধমাৰৰ ফলত হোৱা ক্ষয়-ক্ষতিৰ পৰিমাণ অদ্যাপি নির্ধাৰণ হোৱা নাই যদিও বিভাগৰ প্ৰাথমিক হিচাপ অনুসৰি কে’বা কোটি টকা হ’ব বুলি নিশ্চিত কৰা হৈছে।
