Outbreak of Japanese encephalitis:
ৰাজ্যত পুনৰ উদ্বেগজনকভাৱে বৃদ্ধি হৈছে জাপানী এনকেফেলাইটিছ (জে ই)ত আক্রান্ত ৰোগীৰ সংখ্যা। ইতিমধ্যে কে’বাজনো ৰোগীৰ মৃত্যুও হৈছে। প্রতি বছৰে এই ৰোগৰ সংক্রমণে অসমত উদ্বেগজনক ৰূপ ধাৰণ কৰি আহিছে। বহু লোকৰ এই ভাইৰাছৰ সংক্রমণত মৃত্যু হৈছে অথবা চিৰদিনলৈ শাৰীৰিকভাৱে বিভিন্ন ধৰণে অক্ষম হৈ পৰিছে। জুলাই পর্যন্ত এই ভাইৰাছৰ সংক্ৰমণ ৰাজ্যত চলি আহিছে। এইবাৰো অসমৰ বিভিন্ন চিকিৎসালয়ত জাপানী এনকেফেলাইটিছ আৰু জাপানী এনকেফেলাইটিছ সদৃশ ৰোগত আক্ৰান্তৰ সংখ্যা দ্রুতগতিত বৃদ্ধি হৈছে। দুই শতাধিক লোকৰ তেজৰ নমুনা বৰ্তমান পৰীক্ষণ পৰ্যায়ত আছে।
অকল গুৱাহাটী চিকিৎসা মহাবিদ্যালয় হাস্পতাল (জিএমচিএইছ) তে জাপানী এনকেফেলাইটিছত আক্রান্ত হোৱা বুলি নিশ্চিত কৰা ৩২ গৰাকী ৰোগীৰ চিকিৎসা অব্যাহত আছে। ইয়াৰে চাৰিজনৰ ইতিমধ্যে মৃত্যু হৈছে। আনহাতে, জাপানী এনকেফেলাইটিছ সদৃশ ৰোগত আক্ৰান্ত ৩০ জনৰো অধিক লোকৰ চিকিৎসা চলিছে। জিএমচিএইছতে জে ইত আক্রান্ত হোৱা বুলি নিশ্চিত কৰা সর্বাধিক ১২ জন ৰোগীয়ে হ’ল কামৰূপৰ।
তেনেদৰে নলবাৰীৰ আঠজন, দৰঙৰ পাঁচজন, বজালীৰ দুজন, মৰিগাঁৱৰ এজন, নগাঁৱৰ এজন আৰু ধুবুৰীৰ এজন লোকৰ চিকিৎসা জিএমচিএইছত চলিছে। সমান্তৰালভাৱে ৰাজ্যৰ বিভিন্ন চৰকাৰী আৰু বেচৰকাৰী চিকিৎসালয়তো ক্রমে বৃদ্ধি হৈছে আক্ৰান্তৰ সংখ্যা। জিএমচিএইছৰ অধ্যক্ষ ডাঃ অচ্যুত কুমাৰ বৈশ্যই ৰাইজক সতর্ক হৈ থাকিবলৈ আহ্বান জনায়। ম’হে কামুৰিব নোৱাৰাকৈ নিশা আঁঠুৱা ব্যৱহাৰ কৰি শুবলৈ, ঘৰৰ চৌহদত মহে কণী পাৰিব নোৱাৰাকৈ চাফ-চিকুণ কৰি ৰখা আদি সতর্কতামূলক ব্যৱস্থা গ্রহণ কৰিবলৈ ডাঃ বৈশ্যই ৰাইজক পৰামৰ্শ আগবঢ়ায়।
উল্লেখ্য যে জে ইৰ প্ৰাথমিক লক্ষণ হ’ল আক্ৰান্তৰ তীব্ৰ জ্বৰ উঠা, মূৰৰ বিষ হোৱা আৰু বমিৰ ভাব হোৱা। তদুপৰি আক্ৰান্ত ৰোগীয়ে অত্যন্ত দুর্বল অনুভৱ কৰে। বহু সময়ত সংজ্ঞাও হেৰুৱাই পেলায়। আক্ৰান্তৰ শৰীৰত প্ৰথমতে এই ৰোগৰ লক্ষণ ফুটি নুঠিবও পাৰে। এই ৰোগৰ প্ৰত্যক্ষ কোনো চিকিৎসা নাই। ৰোগৰ লক্ষণৰ ভিত্তিতহে চিকিৎসা চলে। প্রসংগক্রমে উল্লেখ্য যে ২০২৪ত ৰাজ্যত জে ইত ৯২৫ জন লোক আক্ৰান্ত হৈছিল। তাৰে কমেও ২৪ জনৰ মৃত্যু হৈছিল। আনহাতে, জে ই সদৃশ ৰোগত আক্রান্ত হয় কে’বা শতাধিক লোক।
আনহাতে কামৰূপ জিলাৰ হাজোত জাপানী এনকেফেলাইটিছত মহিলাৰ মৃত্যু ৷ ৰামদিয়াৰ এগৰাকী মহিলাই মৃত্যুক আঁকোৱালি লৈছে। যোৱা নিশা চিকিৎসাধীন অৱস্থাত শেষনিশ্বাস ত্যাগ কৰা এই মহিলা গৰাকী হ’ল ৰামদিয়া মৌজাৰ উজানকুৰি বেজপাৰা নিৱাসী বুদৰাম ডেকাৰ পত্নী কল্পনা ডেকা (৫০)।
যোৱা ২০ জুনত মহিলা গৰাকী জ্বৰত আক্ৰান্ত হোৱাত পৰিয়ালৰ লোকে তেওঁক হাজোস্থিত বিষ্ণুৰাম মেধি সামূহিক চিকিৎসালয়ত ভর্তি কৰে। তাত চিকিৎসকে তেওঁক ঔষধ দিয়াত জ্বৰ কমে আৰু বিয়লি ঘৰলৈ যাবলৈ দিয়ে। পাছত নিশা তেওঁৰ পুনৰ জ্বৰ উঠাত তেওঁক পিছদিনা জিএনআৰচি হাস্পতালত ভর্তি কৰে। পৰৱৰ্তী সময়ত তেওঁৰ ৰক্ত পৰীক্ষাত জাপানী এনকেফেলাইটিছৰ উপস্থিতি ধৰা পৰে। এই ৰোগত মহিলাগৰাকীৰ মৃত্যুৰ খবৰে অঞ্চলটোৰ ৰাইজক শংকিত কৰিছে।