Hearing:
হাৰ্টথ্ৰৱ জুবিন গাৰ্গ হত্যা গোচৰৰ দুই অভিযুক্তই প্ৰত্যাহাৰ কৰিলে জামিন আবেদন ৷ সন্দীপন গাৰ্গ আৰু শ্যামকানু মহন্তই উঠাই ল’লে আবেদন। আজি কামৰূপ জিলা আৰু সত্ৰ ন্যায়াধীশ আদালতত পাঁচ অভিযুক্ত শ্যামকানু মহন্ত,সন্দীপন গাৰ্গ,অমৃতপ্রভা মহন্ত আৰু জুবিনৰ দুই দেহৰক্ষী পৰেশ বৈশ্য আৰু নন্দেশ্বৰ বৰাৰ জামিন আবেদনৰ শুনানি ৷ শুনানিত উপস্থিত থাকে জুবিন গাৰ্গৰ সহধৰ্মিনী গৰিমা শইকীয়া গাৰ্গ।
আনহাতে আদালতত শুনানি পৰ্বৰ সময়ত ৰহস্যজনকভাৱে সন্দীপন গাৰ্গ আৰু শ্যামকানু মহন্তৰ অধিবক্তাই দুয়োৰে জামিন আবেদন প্ৰত্যাহাৰৰ বিষয়ে লিখিতভাৱে অৱগত কৰে ৷ অৱশ্যে আন তিনি অভিযুক্ত অমৃতপ্রভা মহন্ত, পৰেশ বৈশ্য আৰু নন্দেশ্বৰ বৰাৰ জামিন আবেদনৰ শুনানি সম্পন্ন হয়।
আদালতত অসম চৰকাৰৰ পাঁচ লোক অধিবক্তা আৰু জুবিন গাৰ্গ পৰিয়ালৰ দ্বাৰা নিয়োজিত অধিবক্তাই আদালতত জামিনৰ বিৰুদ্ধে সবলভাৱে যুক্তি প্ৰদৰ্শন কৰে ৷ আনহাতে সত্ৰ ন্যায়াধীশ আদালতে পৰৱৰ্তীৰ শুনানিৰ দিন ধাৰ্য কৰে ৩০ জানুৱাৰী ৷
শুনানিৰ সময়ত আদালতত উপস্থিত থকা জুবিন গাৰ্গৰ সহধৰ্মিনী গৰিমা শইকীয়া গাৰ্গে সংবাদ মাধ্যমক কয়,’চৰকাৰী অধিবক্তাই সবলভাৱে আদালতত যুক্তি দৰ্শাইছে। আনহাতে ঘটনাক্ৰমে শ্যামকানু মহন্ত আৰু সন্দীপন গাৰ্গৰ অধিবক্তাই প্রত্যাহাৰ কৰিছে জামিন আবেদন ৷
আনহাতে দুই অভিযুক্ত জামিন আবেদন প্ৰত্যাহাৰৰ সন্দৰ্ভত ছ’চিয়েল মেডিয়াত পোষ্ট কৰি তাৎপৰ্যপূৰ্ণ মন্তব্য আগবঢ়াই গৰিমা শইকীয়া গাৰ্গে ৷ গাৰ্গে উল্লেখ কৰে যে,এটা এটাকৈ দিনবোৰ পাৰ হৈছে। জুবিন গাৰ্গৰ নামত আদালতত বিচাৰ চলি আছে। আমি পৰিয়ালৰ মানুহে তেওঁৰ সৈতে কি হৈছিল এতিয়াও সত্য জানিবলৈ প্ৰাৰ্থনাৰে, আইনী ব্যৱস্থাৰ মাজেৰে, ন্যায় প্রতিষ্ঠা হোৱাৰ বিশ্বাসেৰে, শুনানিৰ অপেক্ষাৰে ৰৈ আছো এসোপা অনিশ্চয়তা দিনে ৰাতিয়ে বুকুত সামৰি। কথাবোৰ এতিয়াও অবিশ্বাস্য কিন্তু দুর্ভাগ্যজনকভাবে সঁচাকৈ ঘটি আছে এই সকলোবোৰ। আশা কৰিছো তেওঁ নোহোৱা হোৱাৰ আঁৰৰ ঘটনাবোৰ অতি সোনকালে ফাদিল হ’ব আৰু দোষীয়ে কঠোৰতম শাস্তি পোৱাৰ দিনটোও সোনকালেই আহিব।
যোৱা ১৭ জানুৱাৰী তাৰিখে ৫ জন অভিযুক্তই বেইল আৱেদন কৰিছিল যদিও আজি সন্দীপন গাৰ্গ আৰু শ্যামকানু মহন্তই নিজৰ আৱেদন উঠাই ললে। আমি পৰিয়ালৰ তৰফৰ পৰাও দানৱকেইটাৰ বেইল নাকচ কৰিবলৈ আজি আদালতত আবেদন জনাইছোঁ। বাকী তিনিজন অমৃতপ্রভা মহন্ত, পৰেশ বৈশ্য আৰু নন্দেশশ্বৰ বৰাৰ bail mearing হ’ল যদিও ফলাফল অহা ৩০ জানুৱাৰীতহে জানিবলৈ পোৱা যাব।
কেৱল আমাৰ পৰিয়ালেই নহয়, সমগ্র অসম তথা পৃথিৱীজুৰি জুবিনক ভালপোৱা সকলোৰে এটাই আহ্বান.. বিচাৰপ্ৰক্ৰিয়া শেষ নোহোৱালৈকে আৰু হত্যাকাৰীকেইটাৰ শাস্তি নোহোৱালৈকে কোনো এটা অভিযুক্তয়েই যাতে জামিন নাপায়। লগতে, ন্যায় প্রক্রিয়াটো খৰতকীয়া কৰিবলৈ special court খনৰ কিন্তু অতিমাত্রাই প্রয়োজন আছে।
