America:✒️বিশ্বব্যাপী পেছাদাৰী চালকসকলৰ বাবে যিকোনো মুহূর্ততে আহি পৰিব পাৰে বিপত্তি। কর্মহীন হৈ পৰিব পাৰে লাখ লাখ চালক। প্রযুক্তিয়ে কাল অমানিশা নমাই আনিব পাৰে অসংখ্য গাড়ী চালকৰ জীৱনলৈ।
সম্প্রতি আমেৰিকাৰ ছান ফ্রান্সিস্ক’ৰ ৰাস্তাত এটা ভাৰতীয় পৰিয়ালে এখন চালকহীন গাড়ীত ঘূৰি ফুৰা দৃশ্যই যিদৰে সামাজিক মাধ্যমত তোলপাৰ লগাইছে, সেইদৰে চালকৰ ভৱিষ্যতক কেন্দ্ৰ কৰিও প্রশ্ন দাঙি ধৰিলে।
ভাৰতীয় বংশোদ্ভৱ নৃত্যশিল্পী অপূর্বা বেন্দ্রেই তেওঁৰ পিতৃ-মাতৃক লৈ গুগুলৰ মূল সংস্থা ‘এলফাবেট’ৰ গাড়ী সেৱা ‘ওরেমো’ত এক অভাৱনীয় ভ্রমণ কৰে। সেই ভ্রমণৰ ভিডিঅ’ সম্প্রতি সামাজিক মাধ্যমত ভাইৰেল হৈছে।
ভিডিঅ’টোত দেখা গৈছে, গাড়ীৰ সন্মুখৰ চালকৰ আসনত কোনো নাই; কিন্তু ষ্টিয়েৰিং স্বয়ংক্রিয়ভাবে ইফাল-সিফাল হৈ আছে আৰু ট্রেফিক নিয়ম মানিয়েই গাড়ীখন মসৃণভাবে গৈ আছে। কাষৰ আসনত হাঁহিমুখেৰে বহি আছে নৃত্যশিল্পীগৰাকী। পাছৰ আসনত বহি থকা বেন্দ্ৰেৰ পিতৃ-মাতৃৰ চকুৱে-মুখে তেতিয়া বিস্ময় আৰু হাঁহিৰ ৰেখা।
বেন্দ্রেই জনায় যে তেওঁলোকৰ প্ৰথম ১৫ মিনিটৰ ভ্রমণ ইমানেই ৰোমাঞ্চকৰ আছিল যে পিতৃ-মাতৃৰ আগ্রহত তেওঁ তেতিয়াই আৰু এক ৰাইড বুক কৰে। ইনস্টাগ্রামত এই অভিজ্ঞতাৰ কথা শ্বেয়াৰ কৰি তেওঁ লিখিছে, ‘সঁচাকৈ ক’বলৈ হ’লে ই অত্যন্ত নিৰাপদ তথা সাধাৰণ চালকতকৈও বেছি নিৰ্ভৰযোগ্য যেন লাগিছে।’
এই গাড়ীখন প্রধানকৈ উন্নত ছেন্সৰ, কেমেৰা, ৰাডাৰ আৰু কৃত্রিম বুদ্ধিমত্তা (এআই) ব্যৱহাৰ কৰি কোনো মানুহ অবিহনেই চলাত সক্ষম। ভিডিঅ’টো ভাইৰেল হোৱাৰ লগে লগে সামাজিক মাধ্যমত মন্তব্যৰ ঢৌ উঠিছে।
স্বয়ং ‘ওৱেমো’ কর্তৃপক্ষই এই ভ্রমণক ‘এক প্রজন্মগত যাত্রা’ বুলি আখ্যা দিছে। আন এটা ভিডিঅ’ ক্লিপত বেন্দ্রেই ধেমালি চলেৰে কোৱা শুনা গৈছে, ‘আজিকালিৰ চালকসকল…’ তথা কেপচনত তেওঁ লিখিছে, ‘আধুনিক সমাধানেই আধুনিক সমস্যাৰ সৃষ্টি কৰে।’
সম্প্রতি ফিনিক্স, ছান ফ্রান্সিস্ক’,লছ এঞ্জেলছ, অস্টিন আৰু আটলান্টাৰ দৰে চহৰতে এই সেৱা অব্যাহত আছে। অৱশ্যে চলিত বৰ্ষৰ ভিতৰতে মায়ামি আৰু ৱাশিংটন ডিচিৰ দৰে বৃহৎ চহৰসমূহলৈকো নিজৰ ব্যৱসায়ৰ প্ৰসাৰৰ পৰিকল্পনা কৰিছে ওরেমোৱে।
আনকি জাপানৰ টকিঅ’তো স্থানীয় টেক্সী অপাৰেটৰসকলৰ স’তে হাত মিলাই তেওঁলোকে মেপিঙৰ কাম আৰম্ভ কৰিছে। প্ৰযুক্তিৰ এই অভাবনীয় উন্নতিয়ে প্রমাণ কৰি দিলে যে কল্পবিজ্ঞানৰ চিনেমাই এতিয়া বাস্তৱৰ ৰাজপথত এক নতুন দিগন্ত খুলি দিছে।
