Garia Maria Deshi Jatiya Parishad:
দৈনিক অগ্ৰদূত ডিজিটেল ডেক্স:- ড:হিমস্ত বিশ্ব শর্মা নেতৃত্বাধীন বিজেপি চৰকাৰে অসম বুৰঞ্জীৰ চৰিত্ৰ বাঘ হাজৰিকাক নস্যাৎ কৰাৰ লগতে ছুফী পীৰ আজান ফকীৰক চোৰাংচোৱা সজোৱাৰ ক্ষোভত সমাগত নির্বাচনত শাসক দলক যোগ্য প্রত্যুত্তৰ দিয়াৰ হুংকাৰ দিছে খিলঞ্জীয়া মুছলমানসকলৰ সংগঠন গৰিয়া-মৰিয়া-দেশী জাতীয় পৰিষদে। অলপতে উদযাপন কৰা ঈদৰ প্রাকক্ষণত মুখ্যমন্ত্রী ড° শৰ্মাই ৰাজ্যৰ খিলঞ্জীয়া মুছলমানসকল তেওঁৰ লগত আছে আৰু আনকি পাঁচশ,১১শ টকা দি আশীর্বাদো দিয়া বুলি কৰা মন্তব্যৰ প্ৰতিক্রিয়া প্রকাশ কৰিছে গৰিয়া-মৰিয়া-দেশী জাতীয় পৰিষদৰ কেন্দ্রীয় উপ-সভাপতি হাছিবুল ইছলামে।
মুখ্যমন্ত্রীক প্রত্যুত্তৰ দি ইছলামে কয়, ‘খিলঞ্জীয়া মুছলমান লোকসকল বিজেপিৰ লগতে আছিল; কিন্তু তাৰ পাছতো মুখ্যমন্ত্রী ড° শর্মাই কিয় বাঘ হাজৰিকাৰ অস্তিত্ব নস্যাৎ কৰিলে? আজান পীৰ চাহাবক কিয় চোৰাংচোৱা সজালে? তদুপৰি দেশব ৰাষ্ট্ৰপতি পদত অধিষ্ঠিত হোবা প্রথমজন অসম সন্তান তথা খিলঞ্জীয়া মুছলমানসকলৰ প্ৰতিনিধি কৰিলে। উচ্ছেদ প্রসংগত তেওঁ কয়, ‘যেতিয়া উচ্ছেদৰ কথা কয় তেতিয়া লক্ষ্যণীয়ভাৱে বাঘ হাজৰিকাৰ পৰিয়ালৰ উচ্ছেদ হয়। উচ্ছেদ হয় আজাৰাৰ ইছলামপুৰত। তদুপৰি আশ্চর্যজনক কথাটো হ’ল যে বিজেপি চৰকাৰে খিলঞ্জীয়া মুছলমানসকলক উচ্ছেদ কৰাতে ক্ষান্ত নাথাকি জনগোষ্ঠীটোৰ লোকসকলক ‘অচিনাকি লোক’ সজাই দিলে।’
ইছলামপুৰৰ লোকসকল অচিনাকি আছিল নেকি বুলিও গৰিয়া-মৰিয়া-দেশী জাতীয় পৰিষদৰ নেতাজনে প্রশ্ন উত্থাপন কৰে।এই প্রসংগত তেওঁ আৰু কয়, ‘বিজেপি চৰকাৰে গৰিয়া-মৰিয়া-দেশী জনগোষ্ঠীয় লোকসকলক খিলঞ্জীয়া আখ্যা দিয়াত হাতচাপৰি বজাইছিল। তেওঁলোকে ভাবিছিল যে বিজেপি চৰকাৰৰ আমোলত জনগোষ্ঠীৰ লোকসকলে সমমর্যাদা লাভ কৰিব। ‘ডি’ ভোটাৰৰ পৰা মুক্ত হ’ব। দীর্ঘদিনীয়া সমস্যাৰ সমাধান হ’ব। কিন্তু বাস্তৱত বিলাসীপাৰাকে ধৰি ৰাজ্যৰ বিভিন্ন প্ৰান্তৰ খিলঞ্জীয়া মুছলমান লোকৰহে ঘৰ-বাৰী উচ্ছেদ হ’ল।
বঙাইগাঁও জিলাৰ খিলঞ্জীয়া মুছলমান প্রধান গাঁওসমূহত ভোটাৰ তালিকাৰ বিশেষ পুনৰীক্ষণ প্ৰয়োগ কৰা হ’ল।’ তেওঁ সমাগত বিধানসভা নিৰ্বাচনৰ সময়ত বিজেপিক প্রত্যুত্তৰ দিবলৈ খিলঞ্জীয়া মুছলমান লোকসকললৈ আহ্বান জনায়। বিজেপি চৰকাৰে খিলঞ্জীয়া মুছলমানসকলৰ কোনো সমস্যাই সমাধান নকৰিলে বুলি উল্লেখ কৰি ইছলামে আৰু কয়, ‘বিগত সময়ত এই জনগোষ্ঠীৰ বিভিন্ন সংগঠনে জনগোষ্ঠীটোৰ জৰীপৰ দাবী জনাই অহাৰ লগতে অ’বিচিৰ মৰ্যাদা বিচাৰিছিল। বিজেপি চৰকাৰে জনগোষ্ঠীটোৰ কোনো দাবীয়ে সমাধা নকৰি ভেঁকোভাওনা কৰিলে। এশ কোটি টকাৰ পেকেজ ঘোষণা কৰিও কাৰ্যকৰী নকৰিলে।’