MP Rangwra Narzary Campaign in Bijni:
দৈনিক অগ্ৰদূত ডিজিটেল ডেক্স:–ৰাজ্যৰ বিধানসভা নিৰ্বাচনলৈ মাজত মাত্ৰ কেইটামান দিন থকা অৱস্থাত সকলোবোৰ ৰাজনৈতিক দলৰ তাৰকা প্ৰচাৰক সকলে নিজ প্ৰাৰ্থীৰ সমৰ্থন প্ৰচাৰাভিযান তীব্ৰতৰ কৰি তুলিছে ৷ বিটিচিত ১৫ খন আসনৰ বাবে সন্মুখ সমৰত বিপিএফ ,ইউপিপিএল আৰু বিজেপিয়ে প্ৰচাৰ অভিযান মাৰাথন গতিত অব্যাহত ৰখাৰ মাজতে পিছ পৰি থকা নাই অকলশৰীয়াকৈ নিৰ্বাচনী যুঁজত নমা ইউপিপিএল ৷ দলটোৰ তাৰকা প্ৰচাৰক সকলে দৈনিক কে’বাখনো সভাত অংশ লৈ থকাৰ মাজতে দেওবাৰে বিজনীত সন্ধিয়া ইউপিপিএল প্ৰাৰ্থী কমলসিং নাৰ্জাৰীৰ হৈ নিৰ্বাচনী প্ৰচাৰ চলায় দলটোৰ ষ্টাৰ কেম্পেইনাৰ তথা ৰাজ্যসভাৰ সাংসদ ৰণগৌৰা নাৰ্জাৰীয়ে।
বিজনীৰ কাৱাটিকাত যথেষ্ট সংখ্যক ৰাইজৰ উপস্থিতিত নিৰ্বাচনী প্ৰচাৰ চলায় সাংসদ গৰাকীয়ে। দেওবাৰৰ দিনটোতে বিজনীত তিনিখনকৈ নিৰ্বাচনী সভাত অংশগ্ৰহণ কৰি ৰাইজ স্বতঃস্ফূৰ্ত ভাৱে ওলাই আহিছে বুলি মন্তব্য কৰি ৰাইজৰ সঁহাৰি খুউব ভাল বুলি কয় উল্লেখ কৰি সাংসদ গৰাকীয়ে কয়,বিপিএফ চৰকাৰ অহাৰ পিছত পাঁচ মাহত ইণ্টাৰনেট বন্ধ হোৱাৰ উপক্ৰম হ’ল। মদ, ভাং, জুৱা আৰম্ভ হ’ল বুলি বিপিএফ দলক সমালোচনা কৰে। বিজনীত বিজেপিৰ প্ৰাৰ্থী অৰূপ কুমাৰ দেক ৰাইজে গ্ৰহণ নকৰিব।তেওঁলোকৰ প্ৰাৰ্থী প্ৰক্ষেপ কৰাত ভুল কৰিছে।
আনহাতে খলিলুৰ ৰহমানক প্ৰাৰ্থী হিচাবে ঠিয় কৰাতো বিজেপিৰ এটা কৌশল।মুছলমান ভোট বিভাজন কৰি বেলেগ এটা চিন্তা কৰিছে।আনফালেদি বড়ো সমাজক বিভাজন কৰাৰ বাবে ডিম্বেশ্বৰ বড়োক ঠিয় কৰাইছে।দুয়োজন বিপিএফৰ হয়।সেইটো ৰাইজে বুজি পায়, এনেক্ষেত্ৰত ৰাইজে কমলসিং নাৰ্জাৰীকে ভোট দিব। ইউপিপিএলে ১৮ খনৰ ভিতৰত ১০-১২ খন আশা কৰিছে বুলি মন্তব্য কৰে কয় সাংসদ ৰণগৌৰা নাৰ্জাৰীয়ে।
আনহাতে ইউপিপিএলে দেওবাৰে বিজনীত এক সংবাদমেল অনুষ্ঠিত কৰি দলটোৰ যুৱ ইউপিপিএলৰ কেন্দ্ৰীয় সম্পাদক তথা মুখপাত্ৰ আবুল কালাম আজাদে কয়,বিজনীৰ এনডিএ প্ৰাৰ্থী অৰূপ কুমাৰ দে সাম্প্ৰদায়িক ব্যক্তি ৷ বিজেপিৰ মুল লক্ষ্য হ’ল হিন্দু মুছলমানৰ মাজত সংঘাত সৃষ্টি কৰা। যাৰ বাবে এইবেলি বিধানসভা নিৰ্বাচনত বিজনী সমষ্টিত বিটিচি নিৰ্বাচনত ফকিৰাগ্ৰাম সমষ্টিৰ ৰাইজে বিদায় দিয়া প্ৰাৰ্থীক বিজেপিয়ে বিজনী বিধানসভা সমষ্টিত প্ৰাৰ্থী হিচাপে লৈ আহিছে। যি গৰাকী প্ৰাৰ্থীয়ে বিজনী বিধানসভা সমষ্টিৰ চাৰিসীমা নাজানে।
চিৰাঙৰ বিজনী জিলা ইউপিপিএলৰ কাৰ্যালয়ত অনুষ্ঠিত সংবাদমেল খনত আজাদে বিটিচিৰ মুখ্য কাৰ্যবাহী সদস্য হাগ্ৰামা মহিলাৰীক সমালোচনা কৰি কয় যে এইবেলি বিধানসভা নিৰ্বাচনত বড়ো আৰু মুছলমান মানুহে বিজেপিক ভোট নিদিয়ে বুলি হাগ্ৰামা মহিলাৰীয়ে ভালদৰে জানে।যাৰ বাবে বিজনী সমষ্টিত বিজেপিৰ প্ৰাৰ্থী গৰাকীক জয়ী কৰাবলৈ হাগ্ৰামা মহিলাৰীয়ে বড়ো আৰু মুছলমানৰ ভোট বিভাজন কৰিবলৈ নিজৰ দলৰে কিছু ব্যক্তিক নিৰ্দলীয় প্ৰাৰ্থী হিচাপে প্ৰক্ষেপ কৰিছে।
আনহাতে বিজনী সমষ্টিৰ এনডিএ প্ৰাৰ্থী অৰূপ কুমাৰ দে আমাদানিকৃত, বিতৰ্কিত আৰু সাম্প্ৰদায়িক ব্যক্তি বুলি মন্তব্য কৰি তেওঁ হিন্দু মুছলমানৰ ৰাজনীতি কৰা বুলি অভিযোগ উত্থাপন কৰে।কিন্তু এইবেলি বিজনী সমষ্টিৰ ৰাইজৰ যি উচ্ছাস উদ্দিপনা সমষ্টিটোৰ ইউপিপিএলৰ প্ৰাৰ্থী তথা বিজনীৰ তিনি বাৰৰ বিধায়ক কমলসিং নাৰ্জাৰী জয়ী হোৱাটো এশ শতাংশ নিশ্চিত বুলি দাবী উত্থাপন কৰে।