ইৰাণ আৰু আমেৰিকাৰ মাজত চলি থকা তীব্ৰ সংঘাতৰ মাজতে ৪৫ দিনীয়া এক সম্ভাৱ্য যুদ্ধবিৰতি (ceasefire) লৈ গুৰুত্বপূৰ্ণ আলোচনা চলিছে।
বিভিন্ন আন্তঃৰাষ্ট্ৰীয় সংবাদমাধ্যমৰ প্ৰতিবেদন অনুসৰি, আমেৰিকা, ইৰাণ আৰু কেবাখনো আঞ্চলিক মধ্যস্থতাকাৰীৰ মাজত এই যুদ্ধবিৰতি সম্পৰ্কে আলোচনা আগবঢ়াই লৈ যোৱা হৈছে।
তথ্য অনুসৰি, এই প্ৰস্তাৱটো দুই পৰ্যায়ত ৰূপায়ণ কৰাৰ পৰিকল্পনা কৰা হৈছে। প্ৰথম পৰ্যায়ত ৪৫ দিনৰ বাবে অস্থায়ী যুদ্ধবিৰতি ঘোষণা কৰা হ’ব, যাৰ সময়ছোৱাত স্থায়ী শান্তি চুক্তিৰ বাবে আলোচনা চলিব।
দ্বিতীয় পৰ্যায়ত, এই আলোচনা সফল হ’লে যুদ্ধ সম্পূৰ্ণৰূপে সমাপ্ত কৰাৰ দিশে আগবাঢ়া হ’ব বুলি ধৰা হৈছে।
তথ্য অনুসৰি এই আলোচনাত পাকিস্তান, তুৰস্ক আৰু মিছৰৰ দৰে দেশসমূহে মধ্যস্থতাকাৰীৰ ভূমিকা গ্ৰহণ কৰিছে ।
অৱশ্যে এতিয়াও কোনো পক্ষই এই প্ৰস্তাৱত আনুষ্ঠানিক সন্মতি জনোৱা নাই। ইৰাণ আৰু আমেৰিকাই এতিয়াও চূড়ান্ত সিদ্ধান্ত লোৱা নাই বুলি সূত্ৰে প্ৰকাশ কৰিছে।
উল্লেখযোগ্য যে, পশ্চিম এছিয়াত চলি থকা এই সংঘাতত দুয়ো পক্ষৰ মাজত আক্ৰমণ-প্ৰতিক্ৰমণ অব্যাহত আছে আৰু পৰিস্থিতি অত্যন্ত স্পৰ্শকাতৰ হৈ আছে। এনে সময়ত এই ৪৫ দিনীয়া যুদ্ধবিৰতিৰ প্ৰস্তাৱক এক গুৰুত্বপূৰ্ণ কূটনৈতিক প্ৰচেষ্টা হিচাপে দেখা হৈছে।
