CJP:
দৈনিক অগ্ৰদূত ডিজিটেল ডেস্ক: কেন্দ্রীয় চৰকাৰৰ বিৰুদ্ধে প্ৰৱঞ্চনাৰ অভিযোগ উত্থাপন কৰি অহা পাঁচ ছেপ্টেম্বৰত শিক্ষক দিৱসৰ দিনাই ইণ্ডিয়া গেটৰ পৰা নতুন দিল্লী আৰক্ষীৰ মুখ্য কাৰ্যালয়লৈ ককৰোচ জনতা পার্টি (চিজেপি)য়ে যুৱ প্রতিবাদী সমদল উলিয়াব। দেশৰ শিক্ষা ব্যৱস্থাৰ সংস্কাৰৰ দাবীত দিল্লীৰ যন্তৰ-মন্তৰত চিজেপিৰআন্দোলন দেশজুৰি বনজুইৰ দৰে বিয়পি পৰাৰ পাছত আগন্তুক শিক্ষক দিৱসৰ দিনাই পুনৰ আন্দোলন ঘোষণা কৰিলে। যোৱা ২৫ জুলাইত দিল্লীত ছাত্র আন্দোলন প্রত্যাহাৰৰ সময়ত কেন্দ্ৰীয় চৰকাৰে দিয়া প্রতিশ্রুতি পূৰণত ব্যর্থ হোৱাৰ অভিযোগ তুলিছে চিজেপিয়ে। চিজেপিৰ মুখপাত্র সৌৰভ দাসে ‘বিশ্বাসঘাতকতা’ৰ বিৰুদ্ধে জেন-জি আৰু ভুক্তভোগী পৰিয়ালসমূহৰ প্ৰবল প্ৰতিবাদৰ সন্মুখীন হ’ব লাগিব বুলি সকীয়াই দিছে।
সামাজিক মাধ্যম ‘এক্স’ত মুখপাত্র দাসে এই প্রতিবাদী সমদল শান্তিপূর্ণ হ’ব বুলি কয়। তেওঁ লগতে সকীয়াই দিয়ে যে ‘তৰুণ প্রতিবাদী জেন-জি আৰু প্ৰাণ হেৰুওৱাসকলৰ পৰিয়ালৰ স’তে এই বিশ্বাসঘাতকতা মানি লোৱা নহ’ব।’ তেওঁ কয় যে যোৱা ২৫ জুলাইত প্রতিবাদী ছাত্রক দিয়া প্রতিশ্রুতি মোদী চৰকাৰে ৰক্ষা কৰিব বুলি তেওঁলোক পতীয়ন যাব পৰা নাই। দাসে কয়, ‘যোৱা ২৫ জুলাইত তৰুণ প্ৰজন্মৰ প্ৰতি প্ৰদান কৰা প্ৰতিশ্ৰুতি ভাৰত চৰকাৰে প্ৰদান কৰিবলৈ ইচ্ছুক হয় নে নহয় তাকে লৈ ৰাষ্ট্ৰীয় কাৰ্যকৰী কমিটীয়ে গভীৰ সন্দেহ প্রকাশ কৰিছে। সেয়েহে ইণ্ডিয়া গেটৰ পৰা নতুন দিল্লীৰ আৰক্ষীৰ মুখ্য কার্যালয়লৈ এক শান্তিপূর্ণ প্রতিবাদী সমদলৰ আহ্বান জনোৱা হৈছে। এই প্ৰতিবাদৰ নেতৃত্ব দিব ২০ জুলাইৰ আৰক্ষীৰ নৃশংসতাৰ ফলত প্ৰাণ হেৰুওৱা ভুক্তভোগী আৰু আত্মহত্যা কৰা নীট পৰীক্ষাৰ্থীৰ পৰিয়ালবৰ্গই।’
চিজেপিয়ে কয় যে নৰেন্দ্ৰ মোদী চৰকাৰে তেওঁলোকৰ বিৰুদ্ধে হেতালি খেলিছে। বিশেষকৈ প্রতিবাদী ছাত্ৰ-ছাত্ৰীসকলৰ বিৰুদ্ধে আৰক্ষী থানাত ৰুজু হোৱা গোচৰ প্ৰত্যাহাৰৰ ক্ষেত্ৰত প্ৰতিশ্রুতি ৰক্ষা কৰা হোৱা নাই। সামাজিক মাধ্যমৰ প’ষ্টত চিজেপিয়ে কয়, ‘ছাত্র-ছাত্রী আৰু প্ৰতিবাদীৰ বিৰুদ্ধে এজাহাৰ প্ৰত্যাহাৰকে ধৰি দেশৰ তৰুণ প্রজন্মক যোৱা ২৫ জুলাইত প্ৰদান কৰা প্ৰতিশ্ৰুতিৰ সন্মান ৰক্ষাত কেন্দ্ৰীয় চৰকাৰৰ ব্যৰ্থতাত তীব্ৰ গৰিহণা দিয়ে চিজেপিয়ে। চিজেপিয়ে কয় যে চৰকাৰে প্ৰতিশ্রুতি পালনত পলম কৰা বাবে আৰু ইয়াক পূৰণৰ বিষয়টো এৰাই চলাৰ বাবেই চিজেপিৰ ৰাষ্ট্ৰীয় কাৰ্যকৰী কমিটীয়ে শান্তিপূর্ণ প্রতিবাদ সমদলৰ সিদ্ধান্ত লৈছে। চিজেপিয়ে কয় যে কেন্দ্ৰীয় চৰকাৰে প্ৰদান কৰা প্রতিশ্রুতিসমূহ পালনৰ এক পুনৰীক্ষণৰ অন্তত এই আন্দোলনৰ সিদ্ধান্ত গ্রহণ কৰা হৈছে।
তদুপৰি যোৱা ১৮ আগষ্টত উচ্চতম ন্যায়ালয়ে এই সন্দর্ভত চলি থকা গোচৰৰ শুনানিত দেশজুৰি প্ৰতিবাদী ছাত্ৰৰ বিৰুদ্ধে দাখিল হোৱা এজাহাৰৰ এখন তালিকা বিচৰা প্ৰসংগ উল্লেখ কৰি চিজেপিয়ে উল্লেখ কৰে যে এই বিষয়টো চৰকাৰে কোনো স্পষ্ট স্থিতি প্রকাশ কৰা নাই। সামাজিক মাধ্যমত সংগঠনটোৱে কয়, ‘এইদৰে চলি থাকিব নোৱাৰে। আমাৰ ধৈৰ্য আমাৰ দুৰ্বলতা বুলি ভুল বুজিব নালাগে। আমাৰ আন্তৰিক বিশ্বাসক চৰকাৰে আমাক প্ৰৱঞ্চনা কৰাৰ সুযোগ হ’বলৈ দিব নোৱাৰিম। চিজেপিয়ে কয় যে চৰকাৰৰ ব্যৰ্থতাৰ বাবে তেওঁলোক পুনৰ ৰাজপথলৈ উভতি যাবলৈ বাধ্য হৈছে। চৰকাৰে জেন-জিৰ স’তে বিশ্বাসঘাতকতা কৰিবলৈ বদ্ধপৰিকৰ বুলি ধাৰণা হৈছে বুলিও চিজেপিয়ে কয়।
তেওঁলোকে কয়, ‘আমি ৰাষ্ট্ৰজোৰা আন্দোলন আন্তৰিক বিশ্বাসৰে প্ৰত্যাহাৰ কৰিছিলো। এখন চৰকাৰে এটা প্ৰজন্মৰ বিশ্বাসক ব্যৱহাৰ কৰিব নোৱাৰিব। তেওঁলোকক ঘৰলৈ ওভতাই পঠাবলৈ আৰু তাৰ পাছত সন্তর্পণে নিজে দিয়া কথাৰ পৰা আঁতৰি যাব নোৱাৰিব। আমি এই প্ৰৱঞ্চনাৰ প্ৰচেষ্ট গ্ৰহণ নকৰো।’ চিজেপিয়ে ছাত্র-ছাত্রী, তরুণ প্রজন্ম আৰু তৰুণ নাগৰিকসকলক পাঁচ ছেপ্টেম্বৰত ইণ্ডিয়া গেটত সমবেত হ’বলৈ আহ্বান জনাই কয়, ‘যিসকলে তেওঁলোকৰ সন্তানক হেৰুৱালে সেইসকলে সমদলৰ সম্মুখত থিয় দিব। আৰক্ষীৰ নৃশংসতাৰ বলি হোৱাসকলে তেওঁলোকৰ স’তে খোজ কাঢ়িব।’
উল্লেখ্য যে চিজেপিয়ে দেশৰ পৰীক্ষা ব্যৱস্থাত থকা অনিয়ম আৰু নীট-ইউজিৰ প্ৰশ্নকাকত ফাদিলৰ বিৰুদ্ধে যন্তৰ-মন্তৰত ২০ জুনত প্রতিবাদ আৰম্ভ কৰাৰ এমাহ পাছত ২০ জুলাইত ‘সংসদ চলো’ যাত্ৰাৰ সময়ত প্রতিবাদী ছাত্র-ছাত্রীয়ে আৰক্ষীৰ নৃশংসতাৰ বলি হয়। এই বৃহৎ প্ৰতিবাদৰ তীব্ৰতাৰ প্ৰতি লক্ষ্য ৰাখি কেন্দ্ৰীয় চৰকাৰে সেও মানিবলৈ বাধ্য হয় আৰু ধর্মেন্দ্ৰ প্রধানক শিক্ষামন্ত্ৰীৰ পদৰ পৰা অপসাৰণ কৰে। ইয়াৰ পাছত কেন্দ্ৰীয় চৰকাৰৰ স’তে হোৱা আলোচনা কালত চিজেপিয়ে একাধিক চর্ত বান্ধি দিয়ে আৰু মোদী চৰকাৰেও সেইসমূহ পূৰণৰ প্ৰতিশ্ৰুতি দিয়াত সাময়িকভাবে ছাত্র আন্দোলন স্থগিত ৰখা হয় দিল্লীত। অৱশ্যে দেশজুৰি এই আন্দোলন বনজুইৰ দৰে বিভিন্ন ৰাজ্যত বিয়পি পৰাৰ সময়তো ছাত্ৰসকলৰ প্ৰতি আৰক্ষীয়ে বৰ্বৰতা প্ৰদৰ্শনৰ অভিযোগ উঠিছে। এতিয়া কেন্দ্ৰীয় চৰকাৰৰ বিৰুদ্ধে প্ৰৱঞ্চনাৰ অভিযোগ উত্থাপন কৰি আন্দোলন ঘোষণা কৰিলে চিজেপিয়ে।
ইপিনে, সোমবাৰে চিজেপিৰ প্ৰতিষ্ঠাপক অভিজিত দিপকেই কয় যে চৰকাৰে অধিকাৰৰ হকে যুঁজ দিয়া মানুহৰ বিৰুদ্ধে আইনৰ অপপ্রয়োগ বন্ধ কৰিব লাগে। চলিত বৰ্ষৰ এপ্ৰিলত দুশ ব্যক্তিগত প্ৰতিষ্ঠানৰ প্ৰতিবাদী কর্মীয়ে গড়ে ৫৩ দিন কাৰাবন্দী হোৱাৰ পাছত আৰু আদালতৰ ৰায়তহে মুক্তি লাভ তথা আৰক্ষী আদালতত জবাবদিহি হোৱা সম্পৰ্কীয় বাতৰি কাকতৰ প্ৰকাশিত বাতৰি সামাজিক মাধ্যমত প’ষ্ট কৰি এই মন্তব্য কৰে দিপকেই। তেওঁ লগতে কয়, ‘পাকিস্তান সংযোগ এতিয়া ক’লৈ গ’ল?’ এখন ৰাষ্ট্ৰীয় কাকতৰ অনুসন্ধানমূলক বাতৰিত প্ৰকাশ পাইছে যে প্ৰতিবাদৰ পাছত উত্তৰ প্ৰদেশ চৰকাৰে মজুৰি বৃদ্ধি কৰিবলৈ বাধ্য হয় যদিও শ্রমিকসকলে অনাহকত কাৰাবন্দী হৈ থাকিবলগীয়া হয়।
অধিকাংশ শ্রমিককে আদালতে জামিনত মুক্তি দিয়ে আৰু আঙুলিয়াই দিয়ে যে আৰক্ষীয়ে যথোচিত প্রমাণ দাখিলত ব্যর্থ হৈছে। ইয়াৰে দুজন প্রতিবাদী শ্ৰমিকৰ বিৰুদ্ধে ৰাষ্ট্ৰীয় সুৰক্ষা আইন (এনএছএ) ও জাপি দিয়া হয়। দিপকেই লিখিছে, ‘নিজ অধিকাৰৰ দাবীত যিসকলে যুঁজ দিছে সেইসকল লোকৰ বিৰুদ্ধে আইনৰ অপপ্রয়োগ চৰকাৰে বন্ধ কৰিব লাগিব। তেওঁলোকে নয়ডাৰ শ্ৰমিকৰ বিৰুদ্ধে যি কাম কৰিলে সেই একে কামেই এতিয়া ছাত্ৰ-ছাত্ৰীসকলৰ বিৰুদ্ধে কৰিব বিচাৰিছে। ইয়াক কোনোপধ্যে সহ্য কৰা নহ’ব।’
