Sonam Wangchuk:
দৈনিক অগ্ৰদূত ডিজিটেল ডেস্ক: লাডাখৰ বিশিষ্ট সমাজকৰ্মী , শিক্ষা সংস্কাৰক তথা পৰিৱেশবিদ সোনম ৱাংচুকে কালি লেহ চহৰত এক বৃহৎ মমবাতি সমদলৰ নেতৃত্ব দিয়ে। ২০২৫ ৰ ছেপ্টেম্বৰত লাডাখত সংঘটিত হোৱা এক হিংসাত্মক ঘটনাত প্ৰাণ হেৰুওৱাসকলৰ স্মৰণত ২৪ আগষ্টৰ পৰা ২৪ ছেপ্টেম্বৰলৈ আয়োজন কৰা এমাহজোৰা ‘স্মৃতি দিৱস’ৰ অংশ হিচাপে এই সমদল উলিওৱা হয়। সমদলৰ অন্তত সংবাদ মাধ্যমৰ সৈতে হোৱা বাৰ্তালাপত ৱাংচুকে হিংসাত্মক ঘটনাৰ তদন্ত কৰা ন্যায়িক আয়োগৰ প্ৰতিবেদন শীঘ্ৰে ৰাজহুৱা কৰিবলৈ কেন্দ্ৰীয় চৰকাৰক জনায়।
সোনম ৱাংচুকে গভীৰ উদ্বেগ প্ৰকাশ কৰি কয় যে ২০২৫ৰ সংঘৰ্ষৰ সময়ত একাংশ স্থানীয় লোকৰ মূৰত গুলী লাগিছিল। এই ঘটনাৰ তদন্তৰ বাবে এজন অৱসৰপ্ৰাপ্ত ন্যায়াধীশৰ নেতৃত্বত এখন তদন্তকাৰী কমিটী গঠন কৰা হৈছিল। কিন্তু এবছৰ অতিক্ৰম কৰাৰ পিছতো এই প্ৰতিবেদন ৰাজহুৱা নকৰাত জনসাধাৰণৰ মাজত চৰকাৰ আৰু আইন-শৃংখলাৰ প্ৰতি বিশ্বাস হেৰাই যাবলৈ ধৰিছে। চৰকাৰে এই ক্ষেত্ৰত সম্পূৰ্ণ স্বচ্ছতা অৱলম্বন কৰা উচিত বুলি তেওঁ মন্তব্য কৰে।