ঢেকিয়াজুলি চহৰৰ ৪নং ৱাৰ্ডত কিছুদিন পূৰ্বে অনুষ্ঠিত হোৱা এক বিবাহ আৰু অভ্যৰ্থনা অনুষ্ঠানত অংশ গ্ৰহণ কৰা ১২ জন লোক ক’ভিড-১৯ত আক্ৰান্ত হোৱাৰ পিছত স্থানীয় ৰাইজ শংকিত হৈ পৰাৰ সময়তে এই অভ্যাৰ্থনা অনুষ্ঠানত অংশ লোৱা আন ১০ জন লোক মাৰাত্মক ক’ভিড-১৯ত আক্ৰান্ত হৈছে ৷ যোৱা ২ জুলাইত ৰতন দাস নামৰ লোকজনৰ ঘৰত তেওঁৰ পুত্ৰৰ বিবাহ আৰু অভ্যৰ্থনা অনুষ্ঠান সম্পন্ন হৈছিল ৷ পৰিয়ালটোৰ মুৰব্বী ৰতন দাসৰ লগতে তেওঁৰ পৰিয়ালৰ ১২জন লোকৰ শৰীৰত কৰ’নাৰ উপস্থিতি ধৰাৰ পিছত ৪নং ৱাৰ্ডৰ আন ১০জন লোকৰ শৰীৰত ক’ৰনাৰ উপস্থিতি ধৰা পৰে ৷ এই লোকসকলেও ৰতন দাসৰ ঘৰৰ বিবাহ অনুষ্ঠানত অংশ গ্ৰহণ কৰিছিল ৷ লেলাউটি পৰীক্ষাৰ ফলাফলত এই লোক সকল ক’ভিড-১৯ত আক্ৰান্ত হোৱাটো নিশ্চিত হয় ৷
ইপিনে এই বিবাহ অনুষ্ঠানৰ লগত সম্পৰ্ক নথকা ঢেকিয়াজুলি চহৰৰ ৬নং ৱাৰ্ডৰ আৰু ৮নং ৱাৰ্ডৰ দুজন লোকৰ শৰীৰত কৰ’নাৰ উপস্থিতি ধৰা পৰে ৷ ইয়াৰে এগৰাকী হ’ল ব’ৰোদা বেংকৰ এটিএমৰ কৰ্মচাৰী বুলি জনা গৈছে ৷ মাত্ৰ তিনিদিনত একাধিক ব্যক্তি ক’ভিড-১৯ত আক্ৰান্ত হোৱাৰ তথ্যই ৰাইজক শংকিত কৰি তুলিছে ৷ ইপিনে ঢেকিয়াজুলি সমষ্টিৰ বিধায়ক অশোক সিংহলৰ এছকৰ্ট গাড়ীৰ চালকৰ দেহত ক’ভিড-১৯ৰ উপস্থিতি ধৰা পৰাত বিধায়কগৰাকীৰ সমৰ্থক সকলৰ লগতে বিজেপিৰ দলীয় নেতা-কৰ্মী সকল উদ্বিগ্ন হৈ পৰিছে ৷ ইপিনে এই ১২জন ব্যক্তিক লৈ ঢেকিয়াজুলিত কৰ’না আক্ৰান্তৰ সংখ্যা ২৪ জনলৈ অতিক্ৰম কৰিছে ৷ ক’ভিড আক্ৰান্ত লোক সকলক স্বাস্থ্য বিভাগে ইতিমধ্যে হস্পিতালত ভৰ্ত্তি কৰোৱাইছে ৷
কৰ’নাত আক্ৰান্ত সকলৰ বাসগৃহসমূহৰ লগতে নিৰ্দিষ্ট এলেকাক প্ৰশাসনে কন্টেইনমেন্ট জ’ন ঘোষণা কৰিছে আৰু ইয়াত মানুহৰ অহা-যোৱা নিষিদ্ধ কৰা হৈছে ৷ ঢেকিয়াজুলি অৱস্থিত অগ্নি নিৰ্বাপক বাহিনীয়ে অঞ্চলটোত চেনিটাইজ কৰাৰ লগতে ঢেকিয়াজুলি পৌৰসভাৰ প্ৰাক্তন উপ-পৌৰপতি অভিজিত দাসৰ নেতৃত্বত স্থানীয় সচেতন ব্যক্তিসকলে ৰাইজক সজাগ কৰাৰ চেষ্টা কৰিছে ৷ ৰতন দাসৰ ঘৰত বিবাহ আৰু অভ্যৰ্থনা অনুষ্ঠানত অংশ লোৱা ব্যক্তি সকলক স্ব-ইচ্ছাই লেলাউটি পৰীক্ষা কৰোৱাবলৈ ঢেকিয়াজুলিৰ ৰাজহ চক্ৰ বিষয়াৰ কাৰ্যালয়ৰ পৰা ৰাজহুৱা জাননী জাৰি কৰিছে ৷ আনহাতে, ঢেকিয়াজুলি গণ সংক্ৰমণৰ দিশে গতি কৰা বুলি বিভিন্ন জনে মত প্ৰকাশ কৰে ৷ স্থানীয় সচেতন ৰাইজে ইয়াত অঞ্চল ভিত্তিক তলাবন্ধৰ দিয়াৰ বাবে জিলা প্ৰশাসনক দাবী জনাইছে ৷