প্ৰাক্তন কেন্দ্ৰীয় মন্ত্ৰী তথা ভাৰতীয় জনতা পাৰ্টিৰ অন্যতম জ্যেষ্ঠ নেতা যশৱন্ত সিঙৰ আজি পৰলোকপ্ৰাপ্তি ঘটে ৷ মৃত্যুৰ সময়ত তেওঁৰ বয়স আছিল ৮২ বছৰ ৷ প্ৰয়াত নেতাগৰাকীৰ মৃত্যুত প্ৰধান মন্ত্ৰী নৰেন্দ্ৰ মোদী আৰু প্ৰতিৰক্ষা মন্ত্ৰী ৰাজনাথ সিঙে শোক প্ৰকাশ কৰিছে ৷ ১৯৩৮ৰ ৩জানুৱাৰিত ৰাজস্থানৰ বাৰমেৰ জিলাৰ জসোল গাঁৱৰ এক ৰাজপুত পৰিয়ালত যশৱন্ত সিঙৰ জন্ম হৈছিল ৷ সুদীৰ্ঘ দিন সেনাবাহিনীত চাকৰি কৰাৰ পাছত তেওঁ ৰাজনীতিত যোগদান কৰিছিল । ১৯৮০ চনৰ পৰা ২০১৪ চনলৈকে সংসদত সক্ৰিয় হৈ আছিল যশৱন্ত সিং ৷
কিন্তু ২০১৪ ৰ ৭ আগষ্টত এক দুৰ্ঘটনাত জ্ঞান হেৰুৱাইছিল বৰ্ষীয়ান নেতাগৰাকীয়ে । ইয়াৰ পাছত তেওঁক চিকিৎসালয়লৈ লৈ যোৱা হৈছিল যদিও তেওঁ ক’মাত গুচি গৈছিল । ৰাজনৈতিক জীৱনৰ ভিতৰত যশৱন্ত সিং প্ৰাক্তন প্ৰধান মন্ত্ৰী অটল বিহাৰী বাজপেয়ী মন্ত্ৰীসভাত একাধিক গুৰুত্বপূৰ্ণ বিভাগৰ দায়িত্ব লাভ কৰিছিল । তাৰ ভিতৰত বিত্ত, বৈদেশিক আৰু প্ৰতিৰক্ষা মন্ত্ৰ্যালয়ৰ দায়িত্ব আছিল অন্যতম ।
১৯৯৮-৯৯লৈ তেওঁ পৰিকল্পনা আয়োগৰ উপাধ্যক্ষ হিচাপেও কাৰ্যনিৰ্বাহ কৰিছিল । ২০০৪চনত বিজেপিৰ হাতৰ পৰা কেন্দ্ৰৰ ক্ষমতা গুচি যোৱাৰ পাছত তেওঁ ৰাজ্যসভাত বিৰোধী দলৰ নেতা হিচাপে দায়িত্ব পালন কৰিছিল । ২০১৪ৰ লোকসভা নিৰ্বাচনত তেওঁক বিজেপিয়ে প্ৰাৰ্থিত্ব দিয়া নাছিল । কিন্তু তেওঁ নিৰ্দলীয় প্ৰাৰ্থী হিচাপে বাৰমেৰৰ পৰা প্ৰতিদ্বন্দ্বিতা কৰাৰ সিদ্ধান্ত লৈছিল । আজি এই দ্বিগজ নেতা গৰাকীৰ মৃত্যুত ৰাজনৈতিক নেতাৰ লগতে বিভিন্ন ক্ষেত্ৰৰ লোকসকলে শোক প্ৰকাশ কৰিছে ৷
