SugarIndustry :দৈনিক অগ্ৰদূত ডিজিটেল ডেস্ক : বজাৰত চেনিৰ মূল্য হোৰাহোৰে বৃদ্ধি পাইছে। গৃহস্থই মূৰে কপালে হাত দিছে। মিঠাইৰ ব্যৱসায়ীসকলৰ মাজতো হাহাকাৰ। বিগত দুসপ্তাহত চেনিৰ মূল্য প্রতি কিলোত দেশজুৰি গড়ে ৪৭-৪৮ৰ পৰা বৃদ্ধি হৈ প্রায় ৭০ টকা হৈছে। অর্থাৎ এই বৃদ্ধিৰ হাৰ ৪৫ শতাংশৰ অধিক। এসপ্তাহ পূর্বেও চেনিৰ মূল্য আছিল ৬০ টকা। শনিবাৰে পাইকাৰী বজাৰত ৫০ কিলোৰ এবস্তা চেনিৰ মূল্য ৩,২৫০ টকা। অর্থাৎ ৬৫ টকা এক কিলো চেনিৰ মূল্য। ইয়াৰ স’তে সৰবৰাহ ব্যয় আৰু লাভৰ বিষয়টো আছে।
পাইকাৰী ব্যৱসায়ীসকলৰ অভিযোগ অনুসৰি সকলো খেল মালিকৰে। সুযোগ বুজি প্ৰতিদিনে চেনিৰ মূল্য বঢ়াইছে। দেশৰ চেনি উৎপাদনকাৰী ৰাজ্যসমূহৰ ভিতৰত আছে মূলতঃ মহাৰাষ্ট্ৰ, উত্তৰ প্ৰদেশ, কর্ণাটক।
এই মূল্যবৃদ্ধিৰ স’তে এতিয়া ইথানল বিতর্কয়ো দেশত তোলপাৰ লগাইছে। ইৰান আৰু ৰাছিয়াৰ যুদ্ধৰ পৰিস্থিতিত পেট্র’লত ২০ শতাংশ পর্যন্ত ইথানল মিহলি কৰাৰ অনুমতি দিছে কেন্দ্ৰীয় চৰকাৰে। ইয়াৰ ফলত গাড়ীৰ ক্ষতিসাধন হোৱা বুলি অভিযোগ আছে। ইয়াৰ প্ৰভাৱ মানুহৰ পাকঘৰতো পৰিছে।
ইথানল প্ৰস্তুত কৰিবলৈ চেনিৰ প্ৰয়োজন। ব্যৱসায়ীসকলৰ মতে চলিত বর্ষত ৩২ লাখ মেট্রিকটন চেনি ইথানল বনাওতে ব্যৱহাৰ কৰা হৈছে। কংগ্ৰেছৰ অভিযোগ অনুসৰি পেট্ৰ’লত ইথানল মিলাবলৈ গৈ দেশৰ খাদ্য সুৰক্ষাৰ স’তে কেন্দ্ৰই আপোচ কৰিছে।
ইপিনে, কেন্দ্ৰীয় চৰকাৰৰ মতে চেনিৰ মূল্যবৃদ্ধিৰ স’তে ই-২০ পেট্র’ল প্রস্তুতৰ কোনো সম্পর্ক নাই। খাদ্য মন্ত্রণালয়ৰ বিবৃতি অনুসৰি ইথানল ব্যৱহাৰত চেনিৰ ব্যৱহাৰ লাহে লাহে কমোৱা হৈছে। ২০২২-২৩ত ১২ শতাংশ চেনি ব্যৱহাৰ কৰা হয় ইথানল প্রস্তুত। ২০২৫-২৬ত ই ন শতাংশলৈ হ্রাস পায়।
তদুপৰি তিনি চতুর্থাংশ ইথানল প্ৰস্তুত কৰা হয় মাকৈৰ দৰে শস্যৰ পৰা। কিন্তু এটা দশকৰ অধিক সময়ৰ পাছত বিদেশৰ পৰা চেনি আমদানিৰ অনুমতি দিছে কেন্দ্ৰীয় চৰকাৰে। ৩১ অক্টোবৰ পৰ্যন্ত ১০ লাখ টন চেনি আমদানি কৰা হ’ব। ইয়াৰ বাবে কোনো শুল্ক আদায় দিব নালাগে।
এই প্রসংগতে একাংশই চেনিৰ পাইকাৰী ব্যৱসায়ে প্রশ্ন কৰে যে ছমাহৰ পূৰ্বে সাত লাখ মেট্রিকন লৈ চেনি কিয় ৰপ্তানি কৰিবলৈ দিয়া হ’ল। চলিত বর্ষত কুঁহিয়াৰৰ খেতি যে কম হ’ব সেই বিষয়ে চৰকাৰৰ খবৰ নাছিল নেকি?
অক্টোবৰৰ পৰা জুনলৈ চেনি উৎপাদন হয়। ২০২৫-২৬ত দেশত চেনি উৎপাদন হৈছে দুই কোটি ৭৩ লাখ মেট্রিকটন। তাৰ পূৰ্বৱৰ্তী বৰ্ষত হৈছিল দুই কোটি ৯৩ লাখ মেট্রিকটন। এবছৰত ২০ লক্ষ মেট্রিকটন উৎপাদন হ্রাস পাইছে।
দেশত চেনিৰ চাহিদা আৰু যোগানৰ হিচাপ প্ৰতি বছৰে চেনি উদ্যোগীয়ে চৰকাৰক যোগান ধৰে। বৰষুণ কিমান হ’ব আৰু ক’ত কেনে ধৰণৰ খেতি হ’ব সেই সম্পর্কীয় তথ্য উপগ্রহীয় চিত্র বিশ্লষণ কৰি চৰকাৰে উমান লয়। চলিত বৰ্ষত এলনিনোৰ প্ৰভাৱত কুঁহিয়াৰ উৎপাদন হ্রাস পাব বুলি চৰকাৰে অৱগত আৰু এতিয়া চেনি আমদানি কৰিও সংকট মোচন কৰাটো জটিল হ’ব বুলি চেনি ব্যৱসায়ীসকলে ধাৰণা কৰে।
উল্লেখ্য যে মহাৰাষ্ট্ৰ, উত্তৰ প্ৰদেশ, কৰ্ণাটকৰ পৰা কলকাতাৰ দানকুনি ৰেল য়ার্ডলৈ অহা চেনি উত্তৰ-পূব ভাৰতলৈ আহে। একেদৰে শিলিগুৰিৰ পৰা অসমলৈ আহে চেনি। পাকঘৰত ব্যৱহৃত চেনি মূলতঃ তিনি ধৰণৰ। মোটা দানাৰ ‘এম৩০ ডমেস্টিক’ চেনি উচ্চজাতৰ।
চেনিকলত ইয়াৰ মূল্য এতিয়া প্রতি কুইন্টিলত ৬,৪৫০ টকা। তাতকৈ সৰু দানাৰ ‘এছএছ’ চেনিৰ মূল্য ৬,৩৫০ টকা। একেবাৰে সৰু দানাৰ ‘এছ ৩০’ চেনিৰ মূল্য সকলোতকৈ কম। ৬,২৭০ৰ পৰা ৬,৩১০ টকা মূল্য প্রতি কুইণ্টলত। মিঠাইৰ দোকানত প্রয়োজনীয় চেনিৰ জাত আকৌ ভিন্ন।
ইয়াত মূলতঃ দুই ধৰণৰ চেনি ব্যৱহাৰ হয়। সেয়া হৈছে ‘এল-৩০’ আৰু ‘এম-৩০’। প্রথমবিধ চেনিৰ দাম কুইণ্টলত ৬,৬৫০ৰ পৰা ৬,৬৭০ টকা। দ্বিতীয় জাতৰ মূল্য ৬,০৫০ টকাৰ পৰা ৬,৬০০ টকা। এই মূল্য হৈছে চেনি কলৰ। ইয়াৰ স’তে জিএছটি, পৰিবহণ ব্যয় আৰু লাভৰ অংশ আছে।
ডিলাৰ, ছাব-ডিলাৰ, পাইকাৰী দোকানী, খুচুৰা ব্যৱসায়ী সকলোৰে চাহিদা পূৰণ কৰি পাকঘৰলৈ অহা চেনিৰ মূল্য ৭০ টকা প্রতিকিলোত হৈছে। সম্প্রতি এই পৰিস্থিতিত মিঠাইৰ দাম বৃদ্ধি পাইছে। সন্মুখত আৰম্ভ হ’ব দুর্গা পূজাকে ধৰি উৎসৱৰ বতৰ। এই বতৰত স্বাভাৱিকতে মিঠাইৰ মূল্য অধিক বৃদ্ধি পাব বুলিও শংকা আছে।
