দৰিদ্ৰ সীমাৰেখাৰ তলৰ পৰিয়ালসকলৰ বাবে ভাৰত চৰকাৰৰ ৰাষ্ট্ৰীয় খাদ্য সুৰক্ষা আইনৰ জৰিয়তে দুখীয়া পৰিয়ালসমূহক অসম চৰকাৰে যোগান ধৰি অহা বিনামূলীয়া চাউল এতিয়া বন্ধ হোৱাৰ উপক্ৰম হৈছে । বজালীৰ ভৱানীপুৰ পূব সমবায় সমিতিৰ লগতে ৰাজ্যৰ প্ৰায়বোৰ সমবায় সমিতিয়ে বিগত ৩০ মাহ ধৰি লাভ কৰা নাই চাউলসমূহ কঢ়িয়াই অনাৰ বাবদ পাব লগা পৰিবহণ ব্যয় তথা বাট্টা সমূহ ।
সমবায় সমিতিয়ে নিজৰ টকা ব্যয়ৰে বিগত ৩০ মাহ ধৰি চাউল সৰভোগ স্থিত ভঁড়ালৰ পৰা ভৱানীপুৰলৈ প্ৰায় ৩৫ কিঃমিঃ কঢ়িয়াই আনি দুখীয়া শ্ৰেণীৰ লোকসকলক যোগান ধৰি আহিছিল । ১৯৭৩ত স্থাপন হোৱা ভৱানীপুৰ পূব সমবায় সমিতিয়ে বিগত ৩০ মাহত পৰিবহণ ব্যয়ৰ বাবদ ৪১ লাখ ৯৫ হাজাৰ ১৫৮ টকা আৰু বাট্টাৰ বাবদ ১৫ লাখ ১২ হাজাৰ ৩৭২ টকা ১২ পইচা সৰ্বমুঠ ৫৭ লাখ সাত হেজাৰ ৫৩০ টকা ১২ পইচা আজিও লাভ কৰা নাই । ফলত দেউলীয়া হৈ পৰিছে সমবায় সমিতিখন । নিজৰ সঞ্চয়ৰ সমুদায় টকা খৰচ কৰাৰ উপৰিও ব্যক্তিগত ভাবেও প্ৰায় তিনি লাখ টকা ধাৰৰ বোজা গ্ৰহণ কৰিব লগা হোৱাৰ কথা ব্যক্ত কৰে সমবায় সমিতিখনৰ সম্পাদক মছলিমুদ্দিন আহমেদে । ফলস্বৰূপে চাউল কঢ়িয়াই অনাৰ বাবে খৰচ হʼবলগীয়া পৰিবহণ ব্যয় পৰিশোধৰ অপাৰগতা স্বীকাৰ কৰিছে সমবায় সমিতিখনে ।
বঙাইগাঁও সংমণ্ডলৰ অন্তৰ্গত ভৱানীপুৰ পূব সমবায় সমিতিখনৰ অধিনত আছে ৪১ খন সূলভ মূল্যৰ দোকান । দোকানসমূহত ছয় হেজাৰ ৬২৭ টা পৰিয়ালৰ বাপৰীতে ২৫ হেজাৰ ৫৪০ গৰাকী ব্যক্তি আছে। ৰাষ্ট্ৰীয় খাদ্য সুৰক্ষা আইনৰ জৰিয়তে ২০১৫ৰ পৰা আৰাম্ভ হোৱা আঁচনিখনৰ মাধ্যমেৰে যোগান ধৰা চাউলৰ বাবদ ভাৰত চৰকাৰে তিনি টকা মূল্য নিৰুপন কৰিছিল যদিও ২০১৬ত ৰাজ্যৰ বিজেপি চৰকাৰে শাসন ভাৰ গ্ৰহণ কৰি ২০১৭ৰ পৰা চাউলৰ মূল্য তিনি টকাৰ পৰিৱৰ্তে এক টকা মূল্য নিৰূপণ কৰে । তাৰ পিছতেই যোৱা বৰ্ষৰ পৰা ৰাজ্যত আৰাম্ভ মহামাৰী কৰ’নাৰ সংহাৰী ৰূপৰ বাবে দেশত চলা লকডাউনৰ পৰিপ্ৰেক্ষিতত ৰাজ্য চৰকাৰে ভাৰত চৰকাৰৰ ৰাষ্ট্ৰীয় খাদ্য সুৰক্ষা আইনৰ জৰিয়তে দুখীয়া শ্ৰেণীৰ পৰিয়ালসমূহে লাভ কৰা চাউল এক টকাৰ পৰিৱৰ্তে বিনামূলীয়াকৈ প্ৰদানৰ সিদ্ধান্ত গ্ৰহণ কৰে । সেই অনুযায়ী পৰিয়ালৰসমূহে আজিলৈকে বিনামূলীয়াভাৱে চাউল লাভ কৰি আহিছে । কিন্তু আজিলৈ সমবায় সমিতিসমূহে লাভ কৰিব লগা টকাসমূহ দিয়াত ব্যৰ্থ হৈছে ৰাজ্য চৰকাৰ । যাৰ বাবে এতিয়া গভীৰ সংকটত পৰিছে সমবায় সমিতিসমূহ ।
চৰকাৰী টকা লাভ নকৰি নিজৰ সঞ্চয়ৰ টকা খৰচ কৰাৰ উপৰিও ধাৰৰ ওপৰত ধাৰ কৰি পৰিবহণ ব্যয় মুকলাব লগা হৈছে । ব্যক্তিগত ধাৰৰ বোজা গ্ৰহণ কৰিব লগা হোৱা সমবায় সমিতি সমুহে অনাগত দিনত আৰু অধিক ধাৰৰ বোজা বহণ কৰাৰ ক্ষেত্ৰত অপাৰগতা স্বীকাৰ কৰিছে । ফলত দুখীয়া শ্ৰেণীৰ পৰিয়ালসকলে লাভ কৰা বিনামূলীয়া চাউল যোগান বন্ধ হোৱাৰ দিশে আগবাঢ়িছে । যদিহে চৰকাৰে এই ধনসমূহ অতি সোনকালেই মুকলি কৰি নিদিয়ে তেন্তে দুখীয়া লোকসকলে বিনামূলীয়াভাবে লাভ কৰি অহা এই চাউল যোগান বন্ধ হৈ পৰিব সেইয়া নিশ্চিত । সেয়ে সমবায় সমিতিসমূহে পাব লগা সমুদায় ধন মুকলাই দিয়াৰ বাবে মুখ্যমন্ত্ৰী ড০ হিমন্ত বিশ্ব শৰ্মাক বিনম্ৰতাৰে অনুৰোধ জনাইছে ।
