আগৰ দৰে গৃহবন্দী হৈ থাকিবলগীয়া হোৱা নাই, কিন্তু স্বাধীনতা নাই । ইউৰোপৰ বিভিন্ন দেশত এতিয়া বাসিন্দাসকলক জাপি দিয়া হৈছে টিকাকৰণৰ বোজা । কেফেত চাহ-কফি খোৱা, ৰেস্তোৰাঁত নৈশ ভোজ বা ষ্টেডিয়ামত খেল চোৱা এই সকলোবোৰ কামৰ বাবে প্ৰয়োজন হয় ভেকচিনেচন কাৰ্ডৰ ।
এই নতুন নিয়ম বাতিলৰ দাবীত সপ্তাহান্তত ইটালী আৰু ফ্ৰান্সৰ পথত উলাই আহিল হেজাৰ হেজাৰ লোক । কৰ’না বিধি প্ৰত্যাহাৰৰ দাবীত আজি জাৰ্মানীৰ বাৰ্লিনটো প্ৰতিবাদ কৰা হয় । বিক্ষোভকাৰীসকলে মোহন দাস কৰমচান্দ গান্ধী আৰু মাৰ্টিন লুথাৰৰ দৰে শান্তিদূতৰ প’ষ্টাৰ হাতত লয় । প্ৰতিবাদকাৰীসকলৰ স’তে আৰক্ষীৰ ব্যাপক সংঘৰ্ষৰ সৃষ্টি হয় ।
ইটালী আৰু ফ্ৰান্স দুই দেশৰ নেতাই টিকাকৰণ কাৰ্ড আৰম্ভ কৰিবলৈ বদ্ধপৰিকৰ । ইটালীত এই কাৰ্ডক নাম দিয়া হৈছে ‘গ্ৰীণ পাছ’ আৰু ফ্ৰান্সত ‘হেল্থ পাছ’ । টিকাকৰণৰ ওপৰত জোৰ দিবৰ বাবেই চৰকাৰে এই ব্যৱস্থা গ্ৰহণ কৰিছে । এই পৰ্যন্তও বাসিন্দাসকলৰ একাংশ ক’ভিডৰ টিকাকৰণৰ বিৰোধী । প্ৰতিষেধক গ্ৰহণ কৰিবলৈ জোৰ দিয়াক তেওঁলোকে মানৱ অধিকাৰ হস্তক্ষেপ কৰা হৈছে বুলি দাবী কৰিছে । কোনো কোনো আকৌ প্ৰতিষেধকবিধ কিমান নিৰাপদ তাক লৈ চিন্তিত ।প্ৰতিষেধক নহয়, স্বাধীনতা লাগে – এই দাবীত সপ্তাহান্তত প্ৰায় ৮০ হেজাৰ লোক ইটালীৰ বিভিন্ন চহৰৰ পথত উলাই আহিছিল ।
ইউৰোপৰ কোনো দেশতে টিকাকৰণ বাধ্যতামূলক নহয় । সেয়ে বহুসংখ্যক দেশত প্ৰচাৰো কৰা হোৱা নাই । কিন্তু একাধিক দেশত ‘ভেকচিন পাছ’ৰ নিয়ম জাৰি কৰা হৈছে । ডেনমাৰ্কত ইতিমধ্যে পাছ আৰম্ভ হৈছে । বেলজিয়ামত নিয়ম জাৰি কৰা হৈছে যে, কোনো আউটড’ৰ ইভেণ্টত ডেৰ হেজাৰৰ বেছি লোক সমাবেত হ’বলৈ ভেকচিন চাৰ্টিফিকেট লাগিব ।
আগষ্টৰ মাজভাগত এই নিয়ম কাৰ্যকৰী হ’ব । দেশখনত বন্ধ স্থানত অনুষ্ঠান আয়োজন কৰাৰ অনুমতি নাই । ছেপ্টেম্বৰৰ পৰা অনুমোদন পত্ৰ দিয়া হ’ব । কিন্তু ইয়াৰ বাবে ভেকচিনেচন চাৰ্টিফিকেট লাগিব । স্পেনত সকলোৱে নিজ ইচ্ছামতেই প্ৰতিষেধক গ্ৰহণ কৰিছে ।ইটালীৰ ভেৰোনাত এজন প্ৰতিবাদকাৰীয়ে কয়, ‘এই পদ্ধতিৰে বাসিন্দাসকলৰ মাজত ব্যাপক বৈষম্যৰ সৃষ্টি কৰা হৈছে ।
এদল নাগৰিকক ফাৰ্ষ্ট-ক্লাছ নাগৰিকৰ বেজ দিয়া হৈছে । তেওঁলোকে চৰকাৰী সেৱা লাভ কৰিব, থিয়েটাৰ যাব পাৰিব, কেফে-ৰেস্তোৰাঁত সোমাব পাৰিব । ইপিনে এদল দ্বিতীয় শ্ৰেণীৰ নাগৰিকে এইসমূহ সুবিধা উপভোগ কৰিব নোৱাৰিব । এইবোৰ নাজি শাসন !’
পেৰিছত প্ৰতিবাদকাৰীসকল সংঘৰ্ষত লিপ্ত হয় । সংঘৰ্ষত কেইজনমান আৰক্ষী আহত হয় । ১৯জন প্ৰতিবাদকাৰীক গ্ৰেপ্তাৰ কৰা হৈছে ।