পাৰিপাৰ্শ্বিকতা ৰক্ষাত চৰকাৰ তথা জনসাধাৰণৰ উদাসীনতাৰ বিৰূপ প্ৰভাৱ ৰাজ্যত স্পষ্ট হৈ পৰিছে । আবতৰীয়া উষ্ণতা বৃদ্ধি, বৰষুণ অত্যধিক হ্ৰাস আদিয়ে সাধাৰণ জনজীৱন বিপৰ্যস্ত কৰিছে । চলিত বৰ্ষত অসমত অস্বাভাৱিকভাৱে হ্ৰাস পাইছে বৰষুণ । ইতিমধ্যে অসমৰ পৰা মৌচুমী বায়ুৱে বিদায় লৈছে । মৌচুমীৰ প্ৰভাৱত বৰ্ষা ঋতুত অসমত প্ৰচুৰ বৰষুণ হয়; কিন্তু এইবেলি ৰাজ্যত বৰষুণ অস্বাভাৱিকভাৱে হ্ৰাস পাইছে । প্ৰতি বছৰে উপৰ্যুপৰি বানপানীয়ে অসমক আঘাত হানে ।
এইবাৰ মজলীয়া এটা বানপানীয়েহে ৰাজ্যৰ একাংশ অঞ্চলক চুই যায় । সেয়াও অৰুণাচল আৰু ভূটানত হোৱা প্ৰৱল বৃষ্টিপাতৰ বাবেহে হৈছিল বুলি অসম ৰাজ্যিক দুৰ্যোগ ব্যৱস্থাপনা বিভাগৰ তথ্যত প্ৰকাশ । বৰষুণৰ পৰিমাণ বৃহৎ হাৰত হ্ৰাসৰ ফলত অসমে আগন্তুক দিনকেইটাত বৰষুণ নিৰ্ভৰ উৎপাদন ক্ষেত্ৰবোৰত প্ৰবল প্ৰত্যাহ্বানৰ সম্মুখীন হোৱাটো নিশ্চিত হৈছে ।
উল্লেখ্য যে অসমত এপ্ৰিলৰ পৰাই বৰষুণৰ বতৰ আৰম্ভ হয়; কিন্তু আৰম্ভণিৰে পৰা ৰাজ্যত বৰষুণৰ পৰিমাণ এইবাৰ যথেষ্ট হ্ৰাস হয় । আনকি বাৰিষাও ৰাজ্যৰ বহু অঞ্চলত সৃষ্টি হয় খৰাং সদৃশ পৰিস্থিতিৰ । ইয়াৰ ফলত কৃষকসকলৰ মূৰত ৰামটাঙোনৰ কোব পৰিছে । বৰঝাৰস্থিত বতৰ বিজ্ঞান কেন্দ্ৰৰ তথ্য অনুসৰি, যোৱা পহিলা জুনৰ পৰা আজিলৈকে অসমত স্বাভাৱিক বৃষ্টিপাতৰ পৰিমাণ হ’ব লাগে ১,৫৪৪.৩ মিলিমিটাৰ । তাৰ বিপৰীতে এইবাৰ বৰষুণ হয় ১,২২১.৪ মিলিমিটাৰ । তদুপৰি ৰাজ্যৰ সকলো অঞ্চলতে সমপৰিমাণৰ বৰষুণ নহ’ল ।
উক্ত সময়ছোৱাত সামগ্ৰিক বৰষুণৰ পৰিমাণ এইবাৰ ২১ শতাংশ হ্ৰাস হয় বুলি সদৰী কৰে কেন্দ্ৰটোৰ বিজ্ঞানী সঞ্জয় শ্বই । বৰষুণৰ পৰিমাণ হ্ৰাস আৰু বতৰৰ অস্বাভাৱিক পৰিৱৰ্তনৰ বাবে বিগত পাঁচ দিনত অসমত তাপমাত্ৰা ৩৭ ডিগ্ৰীলৈ বৃদ্ধি হয় । অথচ ছেপ্টেম্বৰৰ আৰম্ভণিৰ পৰা স্বাভাৱিক দিনত নিশাৰ ভাগত সাধাৰণভাৱে শীতৰ অনুভৱ হ’বলৈ ধৰে; কিন্তু সেই পৰিৱেশ এইবাৰ সলনি হৈছে । শীতৰ আৰম্ভণিৰ অনুভূতিও বতৰৰ অস্বাভাৱিক পৰিৱৰ্তনত সম্প্ৰতি হেৰাই গৈছে ।
প্ৰসংগক্ৰমে উল্লেখ যে অসম আৰু মেঘালয় অঞ্চলত বিগত ২০১০, ২০১১, ২০১৩, ২০১৬, আৰু ২০১৮তো বৃষ্টিপাতৰ পৰিমাণ স্বাভাৱিকতকৈ কম হৈছিল । ২০২০ত স্বাভাৱিকতকৈ বেছি বৰষুণ হৈছিল ৰাজ্যখনত । তাৰ বিপৰীতে এইবাৰ বৰষুণৰ মাত্ৰা যথেষ্ট হ্ৰাস হোৱাটো উদ্বেগৰ বিষয় বুলি বতৰ বিজ্ঞান কেন্দ্ৰই মন্তব্য কৰে ।
বৰষুণ হ্ৰাসৰ প্ৰভাৱ ইতিমধ্যে ৰাজ্যৰ উৎপাদন ক্ষেত্ৰত ব্যাপকভাৱে পৰিছে । এইবাৰ নৈ, বিল, পথাৰ আদিত পৰ্যাপ্ত পানী নথকাৰ বাবে মাছৰ উৎপাদনত মাধমাৰ পৰিছে । বৰপেটা জিলাৰ মৎস্যপালক সমবায় সমিতিয়ে এই ক্ষেত্ৰত উদ্বেগ প্ৰকাশ কৰি কয় যে, যিখিনি সময়ত বাঢ়নি পানীত মাছৰ স্বাভাৱিক বংশ বৃদ্ধি হ’ব লাগিছিল সেই সময়তে পানীৰ অভাৱ হয় । ফলত মাছৰ বংশবৃদ্ধিত বাধাৰ সৃষ্টি হয় । ইয়াৰ ফলত নৈ, বিল আদিত এইবাৰ মাছ উৎপাদন পূৰ্বৰ তুলনাত হ্ৰাস পোৱাটো নিশ্চিত ।
একেদৰে শালি খেতিৰ সময়ত পানীৰ অভাৱত পথাৰত ছিৰাল ফাট দিছে । প্ৰসংগক্ৰমে উল্লেখ্য যে ৰাজ্যৰ একাংশ জিলাত ২০ শতাংতকৈও অধিক কম হাৰত বৰষুণ হয় । গোলাঘাট জিলাৰ দুটা ৰাজহ চক্ৰত খৰাঙৰ প্ৰভাৱ পৰিব বুলি ৰাজ্য চৰকাৰৰ তথ্যত প্ৰকাশ । তেনেদৰে ওদালগুৰি আৰু তিনিচুকীয়া জিলাৰো বৃহৎ অঞ্চলত খৰং সদৃশ পৰিৱেশৰ সৃষ্টি হোৱা বুলি উল্লেখ কৰা হৈছে । এনে পৰিৱেশত ৰাজ্যত এইবাৰ ধানৰ উৎপাদন হ্ৰাসৰ আশংকা কৰিছে কৃষি বিভাগে ।
খৰাং সদৃশ পৰিস্থিতিয়ে ৰাজ্যৰ চাহ উদ্যোগতো মাধমাৰ শোধাইছে । এই সন্দৰ্ভত নৰ্থ ইষ্ট টি এছ’চিয়েচনৰ উপদেষ্টা বিদ্যানন্দ বৰকাকতিয়ে কয় যে প্ৰধানকৈ মাৰ্চৰ পৰা মে’লৈকে সৃষ্টি হোৱা খৰাং সদৃশ পৰিস্থিতিয়ে চাহ বাগিচাসমূহক মাধমাৰ শোধায় । এই সময়ছোৱাত চাহ গছত নতুন কলি ওলায় । তাৰ বাবে সকলো চাহ উৎপাদকে বৰষুণৰ ওপৰত নিৰ্ভৰ কৰে; কিন্তু সেইখিনি সময়তে এইবাৰ খৰাং সদৃশ পৰিস্থিতিৰ সৃষ্টি হয় ।