ভৱানীপুৰৰ উপ নিৰ্বাচনৰ প্ৰচাৰ অভিযান তীব্ৰতৰ হৈছে । শাসক বিৰোধী উভৈ দলৰ লগতে মিত্ৰ দলৰ নেতা সকলেও ভৱানীপুৰ সমষ্টিটোত নিজৰ নিজৰ সমৰ্থিত প্ৰাৰ্থীক জয়ী কৰাবলৈ জোৰদাৰ নিৰ্বাচনী প্ৰচাৰ চলাইছে ৷ ভৱানীপুৰ সমষ্টিৰ উপ নিৰ্বাচনৰ কংগ্ৰেছৰ প্ৰাৰ্থী শৈলেন্দ্ৰ নাথ দাসৰ সমৰ্থনত আজি অসম জাতীয় পৰিষদৰ কেন্দ্ৰীয় নেতৃত্বই নিৰ্বাচনী প্ৰচাৰ চলায় । অসম জাতীয় পৰিষদৰ কেন্দ্ৰীয় নেতৃবৃন্দই আজি সমষ্টিটোৰ চমুৱাগাতিত প্ৰথমে নিৰ্বাচনী প্ৰচাৰ চলায়।
অসম জাতীয় পৰিষদৰ ভৱানীপুৰ সমষ্টি কমিটীয়ে আয়োজন কৰা নিৰ্বাচনী প্ৰচাৰ সভাখনত অংশগ্ৰহণ কৰি দলৰ কেন্দ্ৰীয় সভাপতি লুৰিনজ্যোতি গগৈয়ে বিজেপিক তীব্ৰ সমালোচনা কৰি কয়, ‘ভৱনীপুৰ সমষ্টি হৈছে বীৰ ছহিদৰ স্থান । অসম আন্দোলনৰ প্ৰথম গৰাকী ছহিদ খৰ্গেশ্বৰ তালুকদাৰ আৰু কা আন্দোলনৰ ছহিদ আব্দুল আলীমৰ এই পবিত্ৰ ভৱানীপুৰত জন্ম হৈছিল। এই স্থানৰ লোকে বিভেদকামী শক্তিক প্ৰশ্ৰয় নিদিয়ে ৷’ স্বাভিমানী ইয়াৰ লোকে বিবেকেৰে সিদ্ধান্ত লৈ দালালক কেনেকৈ খেদিব লাগে ভালদৰে জানে বুলিও তেওঁ মন্তব্য কৰে ।
অসম জাতীয় পৰিষদৰ সভাপতি গগৈয়ে নিৰ্বাচনী সভাসমূহত মুখ্যমন্ত্ৰীয়ে দিয়া প্ৰতিশ্ৰুতিৰ কথা উত্থাপন কৰি আৰু কয়, ‘এইখন চৰকাৰ বাকী আৰু ফাঁকিত চলিছে । এইখন চৰকাৰে আজি মূল্য বৃদ্ধিৰ কথা নকয়, বান গৰাখহনীয়াৰ কথা নকয়, চিকিৎসালয়সমূহৰ আন্তঃগাঁথনিৰ কথা নকয় । কিন্তু কয় অমুকত ৩০খন বিচনাযুক্ত মেডিকেল নিৰ্মাণ কৰিব, অৰুনোদইৰ ধন বৃদ্ধি কৰিম, বিনামূলীয়া চাউলৰ বৃদ্ধি কৰা হ’ব ইত্যাদি ইত্যাদি ৷ ৫০ লাখ নিবনুৱাৰ কৰ্মসংস্থাপনৰ কথা নকয় । কয় এক লাখ নিবনুৱাক চাকৰি দিয়াৰ কথা ।’
বাকী ৪৯ লাখ নিবনুৱাৰ অৱস্থা কি হ’ব বুলি প্ৰশ্ন কৰি তেওঁ পুনৰ কয় যে, এক লাখ চাকৰিও নিদিয়ে। বিগত সাধাৰণ নিৰ্বাচনত সোণ দিয়া প্ৰতিশ্ৰুতি হেনো নিৰ্বাচনী বক্তব্য আছিল ৷ এই বেলিও টুপি পিন্ধাইছে । নিৰ্বাচন পাৰ হ’লে ক’ব সেইবোৰ ৰাজনৈতিক বক্তব্য বুলি । নিৰ্বাচনী প্ৰতিশ্ৰুতিৰ লগে লগে অসাংবিধানিক কথা বতৰাবোৰে পৰিৱেশ দূষিত কৰিব ধৰিছে । বিধায়কক ভেন্সাৰ বুলি কি বুজাব বিচাৰিছে ? মুখ্যমন্ত্ৰীয়ে পৈত্ৰিক সম্পত্তিৰে আঁচনিৰ নামত ধন ব্যয় নকৰে । আপোনাৰ মোৰ কৰ কাতলৰ টকাৰে আঁচনিৰ ধন আবন্টন দিয়ে । তাত ৰাইজৰ সম্পূৰ্ণ অধিকাৰ আছে । মাজনী সোনজনী যি আঁচনিৰ প্ৰাপ্য সকলোৱে পাব লাগিব। তাৰ বিনিময়ত ভোট দিব লাগিব বুলি কথা থাকিব নোৱাৰে বুলিও তেওঁ মন্তব্য কৰে ৷
লগতে হিন্দুসকলৰ সংকট নামি আহিছে বুলি ধৰ্মীয় মেৰুকৰণেৰে বিজেপিয়ে ভোট আদায়ত নামিছে বুলি কৈ এই সন্দৰ্ভত তেওঁ কয় যে, কোনো হিন্দু বা কোনো মুছলমানৰ একো সংকট নামি অহা নাই। সংকট নামি আহিছে জনমুৰি ২৭ হেজাৰ টকাৰ ঋণৰ বোজা জাপি ল’বলৈ ওলোৱা অসমীয়াৰ। জাতিটোৰ এই সংকট দূৰ কৰিবলৈ বিজেপি আৰু এ আই ইউ ডি এফৰ মিতিৰালি ভংগ কৰি দুয়োটা দলক উৎখাত কৰিব লাগিব বুলিও তেওঁ কয় ।
অসম জাতীয় পৰিষদৰ বজালী জিলাৰ সম্পাদক হৰিধন লহকৰে আঁত ধৰা সভাখনত দলৰ কেন্দ্ৰীয় কমিটীৰ সাধাৰণ সম্পাদক জগদীশ ভূঞাই অংশ গ্ৰহণ কৰি ভাষণত মহিলাসকলক ভোট দিবলৈ যাওঁতে ছিলিণ্ডাৰটোত সেৱা কৰি যাবলৈ কৈ মূল্য বৃদ্ধিৰ প্ৰসংগ টানি আনে । তেওঁ ভাষণ প্ৰসংগত ভৱানীপুৰ সমষ্টিৰ বিজেপি প্ৰাৰ্থী ফণীধৰ তালুকদাৰক সমালোচনা কৰি কয় যে মাটিৰ দালালক গামোচা পিন্ধাই বিদায় দিয়াৰ পৰিৱৰ্তে মুখ্যমন্ত্ৰীয়ে গামোচাৰে বিখ্যাত দালালক আদৰিলে । সেই দালালকে আকৌ ভোট দিবলৈ ৰাইজক আহ্বান কৰাটো কিমান দূৰ্ভাগ্যজনক কথা হ’ব পাৰে চিন্তা কৰক । এতিয়া ১০০ টকাতকৈ অধিক, ২০০ টকাতকৈ অধিক পেট্ৰ’ল, মিঠাতেলৰ দাম বঢ়াই নৰেন্দ্ৰ মোডী, আদানি আম্বানী সুখত থাকিব পাৰে । কিন্তু ভাৰত বৰ্ষৰ জনসাধাৰণৰ দুখ দূৰ্গতিৰ সীমা নোহোৱা হৈছে বুলি কৈ তেওঁ আৰু কয় অসমৰ চাৰি সীমাৰ ভিতৰত অসমীয়া ভাষা উচ্ছেদ কৰাটো বিজেপিৰ ‘কা’ৰ প্ৰতিফলন ৷ আমাৰ ভাষা আমাৰ সংস্কৃতি আমাৰ সম্পত্তি আজি বিজেপিৰ শাসনত মুঠেই সুৰক্ষিত নহয়।
আজিৰ নিৰ্বাচনী প্ৰচাৰৰ অভিযানত অংশ গ্ৰহণ কৰে অসম জাতীয় পৰিষদৰ উপ সভাপতি চামচেৰ সিং, সম্পাদক অম্ৰিত খাটনিয়াৰ, বাণী দাস, প্ৰিন্স ফইজুল হক, অমল ডেকা, ৰাজীৱ ভট্টাচাৰ্য, ফনী পাঠক, মুখপাত্ৰ জীৱাউৰ ৰহমান, সাংগঠনিক সম্পাদক মনোজ শৰ্মা, মহেশ শৰ্মা, গোবিন্দ গায়ন, বাগসা জিলা কমিটীৰ সভাপতি শৈলেন্দ্ৰ দাস, বিত্তীয় সম্পাদক নৃপেন দাসকে ধৰি ভালে সংখ্যক নেতাই । ভৱানীপুৰ সমষ্টিৰ উপ নিৰ্বাচনৰ কংগ্ৰেছৰ প্ৰাৰ্থী শৈলেন্দ্ৰ নাথ দাসৰ সমৰ্থনত প্ৰচাৰ চলোৱো অসম জাতীয় পৰিষদৰ নেতা সকলে চমুৱাগাতিৰ পৰা কা আন্দোলনৰ ছহিদ আব্দুল আলীমৰ হলংবাৰীৰ গৃহলৈ আৰু অসম আন্দোলনৰ প্ৰথম ছহিদ খৰ্গেশ্বৰ তালুকদাৰৰ উজান বৰবড়ীৰ গৃহলৈ যায় । তাত ছহিদ পৰিয়াল দুটাৰ লগতে স্থানীয় লোকৰ লগতো মত বিনিময় কৰে।
ইয়াৰ পাছতে সৰুপেটাত এখন পথ সভাত অংশগ্ৰহণ কৰে। পাছত ভৱানীপুৰত ছহিদ খৰ্গেশ্বৰ তালুকদাৰৰ প্ৰতিমূৰ্ত্তিত পুষ্পাঞ্জলি অৰ্পণ কৰি নিৰ্বাচনী প্ৰচাৰ চলায় ।
