বৰঝাৰস্থিত লােকপ্রিয় গােপীনাথ বৰদলৈ আন্তঃৰাষ্ট্রীয় বিমানকোঠৰ দাঁতি- কাষৰীয়া গাঁও কৈটাসিদ্ধি আৰু ৰাইবড়ীৰ স্থানীয় বাসিন্দাৰ দীর্ঘদিনীয়া প্রতিবাদ আৰু আন্দোলনৰ অন্তত শুকুৰবাৰে শেহতীয়াকৈ বিমানকোঠৰ পৰিচালনাৰ দায়িত্ব লাভ কৰা আদানি গ্রুপে ঘােষণা কৰে যে উল্লেখিত গাঁও দুখনত ‘ফক লাইট’ নহয় ‘এপ্রােচ্ছ লাইটিং ছিষ্টেম’হে স্থাপন কৰা হ’ব যাৰ দ্বাৰা আশংকা কৰাৰ দৰে স্থানীয় লােকৰ কোনাে ক্ষতি নহয়।
শেহতীয়াকৈ কৈটাসিদ্ধি আৰু ৰাইবড়ী গাঁৱৰ বাসিন্দাৰ মাজত সৃষ্টি হােৱা শংকাৰ সন্দৰ্ভত নিজৰ প্রতিক্রিয়া প্রকাশ কৰি লােকপ্রিয় গােপীনাথ বৰদলৈ আন্তঃৰাষ্ট্ৰীয় বিমানকোঠৰ মুখ্য প্রশাসনিক বিষয়া উৎপল বাদল বৰুৱাই ‘দৈনিক অগ্রদূত’ক কয়, ‘কৈটাসিদ্ধি আৰু ৰাইবড়ীত একাংশই ‘ফক লাইট’ স্থাপন কৰা হ’ব বুলি মিছা বাতৰি বিয়পাইছে আৰু তাৰ দ্বাৰা গাঁওবাসীক বিভ্রান্তিৰ মাজলৈ ঠেলি দিয়া হৈছে।
আমাৰ তেনে কোনাে পদক্ষেপ হাতত নাই। আমি কেৱল ‘এপ্রােচ্ছ লাইটিং ছিষ্টেম স্থাপন কৰিম আৰু তাৰ দ্বাৰা স্থানীয় লােকৰ কোনাে ধৰণৰ হানি-বিঘিনি নহয়। ‘বিশ্বৰ প্ৰায়বােৰ দেশৰ বিমানকোঠত ‘এপােচ্ছ লাইটিং ছিষ্টেম স্থাপন কৰা হৈছে আৰু তাৰ দ্বাৰা কোনাে ধৰণৰ ক্ষতিৰ প্রমাণ নাই বুলি দাবী কৰি বৰুৱাই কয় যে বর্তমান বৰঝাৰ বিমানকোঠত স্থাপন কৰা ‘এপ্রােচ্ছ লাইটিং ছিষ্টেম’ৰ পৰিসীমা মাত্র ১৮০ মিটাৰ কিন্তু তাৰ বিপৰীতে প্রয়ােজন আছে অন্ততঃ নশ মিটাৰ।
মাত্র ১৮০ মিটাৰ পৰিসীমাৰ ‘এপ্রােচ্ছ লাইটিং ছিষ্টেম’ত স্বাভাৱিকভাৱে বিমান এখন অৱতৰণ কৰাত যথেষ্ট অসুবিধা আছে বুলি উল্লেখ কৰি মুখ্য প্রশাসনিক বিষয় বাই কয় যে পূর্বে বিমানকোঠ প্রাধিকৰণে ‘এপ্রােচ্ছ লাইটিং ছিষ্টেম’ৰ পৰিসীমা নশ মিটাৰলৈ বৃদ্ধি কৰিবলৈ চেষ্ট কৰিছিল যদিও তাৰ বাবে স্থানীয় লােকৰ ভূমি অধিগ্রহণ কৰিব লাগিলহেঁতেন, সেই হেতুকে উদ্দেশ্যত সফল হ’ব নােৱাৰিলে।
তেওঁ কয়, স্থানীয় মানুহখিনিক যাতে উচ্ছেদ কৰিবলগীয়া নহয় তাৰ বাবে আমি সম্প্রতি ‘এলিভেটেড’ পদ্ধতিৰে এপ্রােচ্ছ লাইটিং ছিষ্টেম স্থাপন কৰিবলৈ সিদ্ধান্ত লৈছাে। এই পদ্ধতিত মাত্র এটা খুটাৰ ওপৰত বিশেষ আকৃতিৰে পােহৰ স্থাপন কৰিম। বর্তমানৰ ব্যৱস্থাত কম পােহৰত, বিশেষকৈ পুৱা আৰু আবেলি বিমান এখনে অৱতৰণ কৰাত যথেষ্ট অসুবিধা আছে।
ন্যূনতম মাটিকালিত খুঁটা বহুৱাই’ লাইটিং’ স্থাপন কৰাটোৱেই একমাত্র উপায় বুলি উল্লেখ কৰি বৰুৱাই কয় যে মাটিৰ মালিকক খুটাটো চোৱা-চিতা কৰাৰ বাবদ কর্তৃপক্ষই উপযুক্ত মাননি দিব। তেওঁ কয়, এই ব্যৱস্থাতাে যদি স্থানীয় বাসিন্দাই আমাক সহযােগ নকৰে তেন্তে পৰৱর্তী পদক্ষেপত তেওঁলােকৰ যথেষ্ট ক্ষতি হ’ব।
কিয়নাে ‘এলিভেটেভ’ পদ্ধতিৰ এপ্রােচ্ছ লাইটিং ছিষ্টেম স্থাপন কৰিবলৈ নিদিলে স্থানীয় বাসিন্দাৰ স্থানান্তৰকৰণেই শেষ উপায় হ’ব। ‘সম্প্রতি কৈটাসিদ্ধিত ‘এপােচ্ছ লাইটিং ছিষ্টেম ‘স্থাপন কৰিলে অতি কমেও ৫৫০ মিটাৰ পৰিসীমা পর্যন্ত বিমানৰ অৱতৰণত সহায়ক হ’ব বুলিও তেওঁ উল্লেখ কৰে।
বৰুৱাই লগতে কয়, ‘ন্যূনতম মণিব পৰা দূৰত্বত আচলতে আমাক ১৩শ মিটাৰ পৰিসীমাৰ ‘এপােচ্ছ লাইটিং ছিষ্টেম’ লাগে। তেতিয়া আমি সকলাে সময়তে বিমান অৱতৰণৰ কাৰণে স্থান নির্ধাৰণ কৰি দিব পাৰিম। অন্যথা বিমানকোঠৰ উত্তৰণ আৰু সম্প্ৰসাৰণত যথেষ্ট অসুবিধা আহি পৰিব। পাৰস্পৰিক সহযােগিতা আৰু বুজাপৰা নাথাকিলে আমি পৰৱৰ্তী সময়ত একপক্ষীয় সিদ্ধান্ত ল’বলৈ বাধ্য হ’ম।’
