কেন্দ্ৰীয় কেবিনেটে তিনিখন ৰাজ্যৰ ১৫ জনগোষ্ঠীক জনজাতিকৰণত অনুমোদন জনোৱাৰ পিছতে অসমৰ ছয় জনগোষ্ঠীয় যৌথ সমিতি ক্ষোভিত হৈ পৰে৷অসমৰ ছটা জনগোষ্ঠীক পুনৰ বঞ্চিত কৰাক লৈ যৌথ কমিটিয়ে বৃহস্পতিবাৰে দিছপুৰ ঘেৰাও কাৰ্যসূচী ঘোষনাৰ পিছতে থৰকাছুটি হেৰায় ৰাজ্য চৰকাৰৰ৷ইতিমধ্যে জনগোষ্ঠীয় নেতৃবৰ্গক মন্ত্ৰী পৰ্যায়ত আলোচনাৰ বাবে আমন্ত্ৰণ জনোৱা হৈছিল যদিও নেতৃবৰ্গই একেমুখে প্ৰত্যাখ্যান কৰে ৷
ছয় গোষ্ঠীয় নেতৃবৰ্গই এই স্থিতিক গুৰুত্বসহকাৰে লৈ যেনেতেনে সৈমান কৰাবলৈ আহোপুৰুষাৰ্থ চেষ্টা অব্যাহত ৰাখে ৷ আনকি মুখ্যমন্ত্ৰী গৰাকী দিল্লীৰ পৰা গুৱাহাটীলৈ উভতে ৷ উল্লেখ্য যোৱাকালি মুখ্যমন্ত্ৰী ড:হিমন্ত বিশ্ব শৰ্মাই মুখ্যমন্ত্ৰী পৰ্যায়ত আলোচনাৰ বাবে আমন্ত্ৰণ কৰে ৷ কিন্তু আজি মাজনিশা মুখ্যমন্ত্ৰীৰে হ’ব লগা বৈঠক বৰ্জন ঘোষণা কৰে ছয় জনগোষ্ঠীয় যৌথ সমিতিৰ হৈ আটছাৰ সভাপতি ধীৰাজ গোৱালা আৰু আটাছুৰ যুটীয়া সম্পাদক মিলন বুঢ়াগোঁহাই-এ ৷
আনহাতে, বৃহস্পতিবাবে ছয় জনগোষ্ঠী যৌথ সমিতিয়ে দিছপুৰ ঘেৰাও কাৰ্যসূচী ৰূপায়নৰ প্ৰতি লক্ষ্য ৰাখি গুৱাহাটী মহানগৰ প্ৰশাসনে দিছপুৰ সচিবালয় আৰু বিধায়ক আবাসৰ সমগ্ৰ অঞ্চলটোত কটকটীয়া নিৰাপত্তা বেষ্টনী গঢ়ি তুলিছে ৷ আজি পুৱাৰে পৰা দিছপুৰ ৰাজধানী চৌহদত আৰক্ষী,অসম বেটেলিয়ন আৰু চিআৰ পি এফ মোতায়েন কৰা পৰিলক্ষিত হয় ৷ এফালে ছয় জনগোষ্ঠীৰ দিছপুৰ ঘেৰাওৰ হুংকাৰ৷আনফালে চৰকাৰী পক্ষৰ আন্দোলনকাৰীক সৈমানেৰে বিষয়টো আলোচনাৰ মাধ্যমেৰে সমাধান কৰাত বদ্ধপৰিকৰ ৷
উল্লেখ্য যে ছয় জনগোষ্ঠী যৌথ সমিতিৰ স্পষ্ট মত এতিয়াৰ পৰা আলোচনা অসম চৰকাৰৰ সৈতে নহয় ৷ হ’ব দিল্লীৰ স’তে ৷ দিল্লীয়ে ছয় জনগোষ্ঠীক জনজাতিকৰণত অনুমোদন জনাবই লাগিব বুলি হুংকাৰ দিয়ে নেতৃবৰ্গই ৷