SSB :
উত্তৰ-পূব ভাৰতৰ আগশাৰীৰ জৈৱ বৈচিত্ৰ্য সংৰক্ষণ সংস্থা আৰণ্যক আৰু সীমান্ত সুৰক্ষা সংস্থা সশস্ত্ৰ সীমা বলে (Sashastra Seema Bal) যুটীয়াভাৱে নামনি অসমত বন্যপ্ৰাণী অপৰাধৰ ওপৰত দুখনকৈ সজাগতা কৰ্মশালা অনুষ্ঠিত কৰে ।
শনিবাৰে ষষ্ঠ বেটেলিয়ন এছএছবি বিঅ’পিৰ দাদগিৰিত অনুষ্ঠিত কৰ্মশালাত ৩৫ জনতকৈও অধিক এছএছবি বিষয়া আৰু ৰয়েল ভূটান কৰ্তৃপক্ষৰ (Royal Bhutan Authority) দুজন জ্যেষ্ঠ বিষয়া কৰ্মশালাত অংশগ্ৰহণ কৰে ।
আনহাতে শুকুৰবাৰে ৬৪ বেটেলিয়ন এছএছবি বৰমা শিবিৰত অনুষ্ঠিত কৰ্মশালাত এছএছবিৰ ৩০ জনতকৈও অধিক বিষয়া আৰু ৰয়েল ভূটান আৰক্ষীৰ (Royal Bhutan Police) দুজন বিষয়া অংশগ্ৰহণ কৰে । এই কৰ্মশালাত ৰঙিয়াৰ খণ্ড মুখ্য কাৰ্যালয়ৰ ডিআইজি শ্ৰীযুত জগদীপ পাল সিংও উপস্থিত আছিল ।
আৰণ্যকৰ বিশেষজ্ঞ ডঃ জিমি বৰা আৰু আইভি ফাৰহিন হুছেইনে দুয়োখন কৰ্মশালাত সম্পদ ব্যক্তি হিচাপে অংশগ্ৰহণ কৰে । ড০ বৰাই আঞ্চলিক, ৰাষ্ট্ৰীয় আৰু গোলকীয় ক্ষেত্ৰত বন্যপ্ৰাণী অপৰাধৰ বিভিন্ন বিষয়ত ব্যাপকভাৱে আলোচনা কৰে ।
তেওঁ উল্লেখ কৰে যে এছএছবিয়ে অবৈধ বন্যপ্ৰাণী সৰবৰাহ হ্ৰাস কৰাত অতি গুৰুত্বপূৰ্ণ ভূমিকা ল’ব পাৰে আৰু এই জঘন্য অপৰাধ প্ৰতিৰোধ কৰিব পৰা বিভিন্ন উপায়ৰ বিষয়ে আলোচনা কৰে ।
আনহাতে হুছেইনে মানাহ লেণ্ডস্কেপৰ ওপৰত বিশেষ গুৰুত্ব দি স্থানীয় দৃষ্টিকোণত বন্যপ্ৰাণী অপৰাধৰ বিষয়ে পুংখানুপুংখভাৱে আলোচনা কৰে । তেওঁ বন্য জীৱ-জন্তু যেনে বাঘ, হাতী, পেঙ্গোলিন, গঁড়, হিমালয়যেন ক’লা ভালুকৰ অবৈধ চোৰাং ব্যৱসায়ৰ বিষয়ে আলোচনা কৰে আৰু এছএছবিয়ে এই অপৰাধ কেনেদৰে প্ৰতিৰোধ কৰিব পাৰে তাৰ ওপৰত গুৰুত্ব আৰোপ কৰে।