IPL High Voltage Match In Barsapara On May 15 And 19:
১৫ আৰু ১৯ মে’ত বৰ্ষাপাৰা ক্ৰিকেট ষ্টেডিয়ামত অনুষ্ঠিত হ’ব ৰাজস্থান ৰয়েলছৰ দুখনকৈ হাইভল্টেজ মেচ। বিশ্বৰ সৰ্ববৃহৎ ক্ৰিকেট ইভেণ্ট আই পি এলৰ গুৱাহাটীত হ’ব লগা দুখন মেচ সন্দৰ্ভত বৃহস্পতিবাৰে এক সংবাদমেল সম্বোধন কৰে ৰাজস্থান ৰয়েলছৰ চি ইঅ’ জেক লুছ মেকক্ৰাম ৷
উল্লেখ্য যে, আই পি এল প্ৰথম ছিজনৰ চেম্পিয়ন ৰাজস্থান ৰয়েলছে ১৭ সংখ্যক আই পিএলৰ দুখনকৈ ঘৰুৱা মেচ দ্বিতীয় খন ঘৰ ৰূপে চিহ্নিত হোম গাউণ্ড বৰ্ষাপাৰাত খেলিব ৷ আনহাতে,গুৱাহাটীত হ’বলগা প্রথমখন মেচৰ বাবে আজিৰে পৰা অনুৰাগীৰ বাবে অনলাইনত টিকট মুকলি কৰিছে ৷ ৰয়েলছ তাৰকা তথা লোকে বয় ৰিয়ান পৰাগৰ খেল ষ্টেডিয়ামত উপভোগ কৰাৰ বাবে হেপাহ আৰু উৎকণ্ঠাত থকা ছাত্র-ছাত্ৰীসকলক এইবাৰ বিশেষ সুবিধা দিছে ৰাজস্থান ৰয়েলছে।
শিক্ষাৰ্থীৰ বাবে এইবাৰ থাকিব ৫০০ টকীয়া টিকটৰ ব্যৱস্থা। অৱশ্যে অন্যান্য টিকটসমূহৰ দাম হ’ব ১,০০০ৰ পৰা ৯,০০০ টকালৈ। ১৮ এপ্রিল বৃহস্পতিবাৰে আবেলি চাৰি বজাৰ পৰা ১৯ এপ্রিল, শুক্ৰবাৰ আবেলি চাৰি বজাৰ ভিতৰত ৰাজস্থান ৰয়েলছ দলৰ অফিচিয়েল টিকেটিং পার্টনাৰ বুক মাই শ্ব'(BOOKMYSHOW)ত আগতীয়াকৈ পঞ্জীয়ন কৰা দৰ্শকৰ বাবে মুকলি কৰি দিয়া হৈছে টিকট।
সঞ্জু ছেমছন নেতৃত্বাধীন ৰাজস্থান ৰয়েলছে ১৫ মে’ত পঞ্জাৱ কিংছ আৰু ১৯ মে’ ত কলকাতা নাইট ৰাইডাৰ্ছৰ মুখামুখি হ’ব বৰ্ষাপাৰা হোম গাউণ্ড ৷ গুৱাহাটীৰ দুয়োখন মেচে নৈশালোকত অনুষ্ঠিত হ’ব।
ইফালে, গুৱাহাটীত হ’বলগা প্রথমখন মেচৰ বাবে আজিৰে পৰা অনুৰাগীৰ বাবে অনলাইনত টিকট মুকলি কৰিছে চলিত আই পি এলৰ পইন্ট তালিকাৰ শীৰ্ষস্থানত থকা ৰয়েলছে।
আনহাতে,যিসকল অনুৰাগীয়ে গুৱাহাটীৰ প্ৰথম মেচৰ টিকট সংগ্ৰহ কৰিব সেইসকলক দ্বিতীয় মেচৰ টিকট ক্ৰয়ৰ সময়ত প্ৰথমে অগ্ৰাধিকাৰ দিয়া হ’ব বুলি সংবাদমেলত উল্লেখ কৰে ৰাজস্থান ৰয়েলছৰ চিইঅ’ গৰাকীয়ে ৷
