Hired workers in Nagaon FCI:
ভাৰতীয় খাদ্য নিগম (এফচি আই)নগাঁৱস্থ মাণ্ডলিক কার্যালয়ত অনিয়মৰ পয়োভৰ ঘটিছে | মাণ্ডলিক কার্যালয়টোত একাংশ তৃতীয় আৰু চতুর্থ শ্রেণীৰ কর্মচাৰীয়ে অতিৰিক্ত সময়ৰ কর্তব্য সম্পাদন কৰা দেখুৱাই ওপৰঞ্চি সময়ৰ ভাত্তাৰ নামত ভুৱা তথ্যৰে প্রতি বছৰে লাখ লাখ টকা লুণ্ঠন চলাই অহাৰ গুৰুতৰ অভিযোগ উত্থাপিত হৈছে।
অ’টিএ অর্থাৎ ওপৰঞ্চি সময়ৰ ভাত্তাৰ নামত কর্মচাৰীসকলৰ একাংশই কৰা এই দুর্নীতিত পূর্ণ সহযোগিতা আগবঢ়াইছে এফচিআইৰ নগাঁও মাণ্ডলিক কার্যালয়ন একাংশ বিষয়া-কর্মচাৰীয়ে। এফ চিআইৰ নগাঁও মাণ্ডলিক কার্যালয়ত বছৰ বছৰ চলি থকা এই দুর্নীতি-অনিয়মৰ সন্দৰ্ভত বিভিন্ন পক্ষই অভিযোগ উত্থাপন কৰি আহিছে যদিও তালৈ কেৰেপকে নকৰে দুর্নীতিগ্ৰস্ত চক্রটোৱে।
প্রাপ্ত তথ্য অনুসৰি, এফচিআইৰ নগাঁও মাণ্ডলিক কার্যালয়ৰ অধীনস্থ ২১ জন তৃতীয় আৰু চতুর্থ শ্রেণীৰ কর্মচাৰীয়ে ২০১৯- ২০২০ত নিজৰ কৰ্ম সময়ৰ বাহিৰেও বহু ওপৰঞ্চি সময় কর্তব্য সম্পাদন কৰিছিল বুলি বিভাগীয় নথিত উল্লেখ আছে। ইয়াৰ বাবদ সেই কৰ্মচাৰীসকলক ওপৰঞ্চি সময়ৰ ভাত্তা আদায় দিয়া হৈছিল। ওপৰিঞ্চি সময় কর্তব্য সম্পাদন কৰা ২১ জন কৰ্মচাৰীক ওপৰঞ্চি সময়ৰ ভাত্তাৰ বাবদ মুঠ ১৪ লাখ ৫৫ হেজাৰ ১৩২ টকা আদায় দিয়া হৈছিল।
ইয়াৰ ভিতৰত বৰ্ষটোত ওপৰঞ্চি সময়ৰ ভাত্তা পোৱাসকলৰ ভিতৰত সৰ্বনিম্ন ১৫,২৬৮ টকা আৰু সৰ্বাধিক ১,৫৬,৩৩৮ টকা লাভ কৰিবলৈ সক্ষম হয়। ঠিক একেদৰে ২০২০-২০২১ বিত্তীয় বৰ্ষটো এফচিআইৰ নগাঁও মাণ্ডলিক কার্যালয়ত ভুৱা তথ্যৰে একাংশ চতুৰ্থ আৰু তৃতীয় শ্ৰেণীৰ কৰ্মচাৰীয়ে ওপৰঞ্চি সময়ৰ ভাত্তাৰ বাবদ লাখ লাখ টকা সৰকাই নিবলৈ সক্ষম হয়।
বিত্তীয় বর্ষটোত মাণ্ডলিক কার্যালয়টোৰ অধীনত কৰ্মৰত মুঠ ৩৫ জন তৃতীয় আৰু চতুৰ্থ শ্ৰেণীৰ কৰ্মচাৰীয়ে ওপৰঞ্চি সময় কৰ্তব্য সম্পাদন কৰা দেখুৱাই ওপৰঞ্চি সময়ৰ ভাত্তাৰ বাবদ পৰিশোধ কৰে মুঠ ১৮ লাখ ৬২ হেজাৰ ৬৭৬ টকা। বিত্তীয় বৰ্ষটোত ও পৰঞ্চি সময়ৰ ভাত্তাৰ বাবদ একোজন কৰ্মচাৰীয়ে সর্বাধিক ১,২৭,৭০০ টকা আৰু সর্বনিম্ন ৪,৯৯০ টকা লাভ কৰিছিল।
নগাঁও এফচিআইয়ে সংমণ্ডলটোৰ যিসকল তৃতীয় আৰু চতুৰ্থ শ্ৰেণীৰ কৰ্মচাৰীক ওপৰঞ্চি সময়ৰ ভাত্তা আদায় দিছে তেওঁলোকে একোটা বিত্তীয় বর্ষত ৫০-৫৫ ঘন্টা পর্যন্ত ওপৰিঞ্চি সময়ৰ কাম কৰা বুলি বিভাগীয় নথিত উল্লেখ আছে। উল্লেখ্য যে এফচিআইৰ ওপৰঞ্চি সময় কাম কৰা কৰ্মচাৰীসকলৰ নামৰ তালিকাখন প্রথমে অনুমোদন জনায় অ’টিএ কমিটীয়ে। পাছত চূড়ান্ত তালিকাখনত স্বাক্ষৰ কৰি অনুমোদন জনায় মাণ্ডলিক প্ৰৱন্ধক আৰু জেনেৰেল মেনেজাৰে।
তাৰ পাছতহে ওপৰঞ্চি সময় কাম কৰা কৰ্মচাৰীসকলক ওপৰঞ্চি সময় ভাত্তাৰ ধন আদায় দিয়া হয়। অভিযোগ অনুসৰি, এই প্রক্রিয়াটোতেই ব্যাপক দুর্নীতি আৰু অনিয়ম সংঘটিত হয়। একাংশ কৰ্মচাৰীয়ে কাৰ্যালয়লৈ দুপৰীয়া আহি দিনৰ দিনটো কেৱল আড্ডা মাৰি কটাই তেওঁলোকেই বিয়লি পলমকৈ কাৰ্যালয়ৰ পৰা ৰাওনা হয়। তেওঁলোকৰেই একাংশই ওপৰঞ্চি সময়ৰ কাম কৰা দেখুৱাই বছৰি হেজাৰ হেজাৰ টকা সৰকাই আহিছে।
এই কৰ্মচাৰীসকলে অ’টিএ কমিটীৰ একাংশ সদস্য, এফচিআইৰ একাংশ বিষয়া-কর্মচাৰীক মেনেজ কৰি এই দুর্নীতি-অনিয়ম সংঘটিত কৰি অহা বুলিও এফচিআইৰ একাংশ কৰ্মচাৰীয়েই অভিযোগ তুলিছে। এফচিআইৰ নগাঁও মাণ্ডলিক কার্যালয়ত ওপৰঞ্চি সময়ৰ কাম কৰা দেখুৱাই কেৱল তৃতীয় আৰু চতুৰ্থ শ্ৰেণীৰ কৰ্মচাৰীয়েই যে দুর্নীতি আৰু অনিয়মৰে লুণ্ঠন সংঘটিত কৰি আহিছে তেনে নহয়। অনুৰূপ লুণ্ঠন চলাই আহিছে আন একাংশ বিষয়া-কর্মচাৰীয়েও।
নগাঁও এফচিআইৰ মাণ্ডলিক কাৰ্যালয়ত ওপৰঞ্চি সময়ৰ ভাত্তাৰ নামত বছৰ বছৰ ধৰি চলি থকা লুণ্ঠনৰ সন্দৰ্ভত এক উচ্চ পৰ্যায়ৰ তদন্ত কৰিলে বহু ৰৌ-বৰালি জালত পৰাৰ সম্ভাৱনা আছে। আনহাতে, নগাঁও এফচিআইৰ নিয়মীয়া শ্রমিকে নিজে কাম কৰিবলৈ নাহি ভাৰাতীয়া শ্ৰমিকৰ হতুৱাই কাম কৰাই থকা বুলিও আন এক গুৰুতৰ অভিযোগ উত্থাপিত হৈছে। এই শ্রমিকসকলে প্রতিমাহে ৬০-৭০ হেজাৰ টকাকৈ দৰমহা লাভ কৰে।
তেওঁলোকে নিয়োগ কৰা শ্ৰমিকক ২০-২৫ হেজাৰ টকাৰ মজুৰি দি নিজে ঘৰত থাকি অন্য ব্যৱসায়ত জড়িত হৈ কর্তব্যত ফাঁকি দি অহা পৰিলক্ষিত হৈছে। এফচিআইৰ নগাঁও মাণ্ডলিক কার্যালয়টোত ওপৰঞ্চি ভাত্তাৰ নামত ২০২২-২০২৩, ২০২৩-২০২৪ বর্ষতো অনুৰূপ দুর্নীতি সংঘটিত হোৱা বুলিও একাংশ কৰ্মচাৰীয়ে অভিযোগ উত্থাপন কৰিছে।