Guwahati Police Encounter:
মহানগৰীত পুনৰ আৰক্ষীৰ এনকাউণ্টাৰ ৷ শুক্ৰবাৰে ফুট গধুলিতে ভেটাপাৰাত এগৰাকী যুৱতীক ছুৰিকাঘাত কৰা অপৰাধীলৈ আৰক্ষীয়ে কৰে গুলীবৰ্ষণ ৷ গুলীবৃদ্ধ যুৱকজনৰ নাম আজুল হক৷ যুৱতীক ছুৰিকাঘাত কৰাৰ পিছতে ৰাইজৰ ৰোষত পৰি দলবদ্ধ আক্ৰমণৰ সন্মুখীন হয় ৷পিছত হাতীগাঁও আৰক্ষীয়ে আটক কৰি নিয়ে ৷
আনহাতে নিশাই চিকিৎসালয়ত স্বাস্থ্য পৰীক্ষা কৰি থানালৈ আহি থকা পথত আজুল হক আৰক্ষী জিন্মাৰ পৰা পলাবলৈ চেষ্টা কৰোতেই আৰক্ষীয়ে গুলীচালনা কৰে ৷ ফলত সোঁভৰিত গুলীবৃদ্ধ হোৱা আজিজুলক ভৰ্তি কৰা জিএমচিএইছত ৷
উল্লেখ্য যে, বৃহস্পতিবাৰে সন্ধিয়া ভাগত ভেটাপাৰাৰ গ্লডেত পথেৰে আহি থকা এগৰাকী যুৱতীক আজুল হকে ছুৰিকাঘাত কৰা ঘটনাই সম্প্রতি সমগ্র অঞ্চলজুৰি চাঞ্চল্যৰ সৃষ্টিৰ কৰিছে। ডিঙিত গুৰুতৰ আঘাত পাই ৰাজপথতে বাগৰি পৰা সোণালী দাস (২২) ওৰফে ফুলমতী নামৰ যুৱতীগৰাকী নিশাই সংকটজনক অৱস্থাত গুৱাহাটী চিকিৎসা মহাবিদ্যালয় হাস্পতালত ভৰ্তি কৰা হয়।
আনহাতে,ঘটনা সংঘটিত কবি পলায়নৰ চেষ্টা কৰা আজুল হক নাম যুৱকজনক প্রত্যক্ষদর্শীয়ে খেদি খেদি কৰায়ত্ত কৰি উত্তম-মধ্যম শোধাই আৰক্ষীক গতাই দিয়ে। মূৰত আঘাত পোৱা যুৱকজনো সম্প্রতি চিকিৎসাধীন হৈ আছে। এই ঘটনা সংঘটিত হোৱাৰ খবৰ লাভ কৰিয়েই পূব গুৱাহাটী জিলা আৰক্ষীৰ শীর্ষ বিষয়াসহ এটা বৃহৎ আৰক্ষী দল ঘটনাস্থলীত উপস্থিত হৈ স্থানীয় লোকে কৰায়ত্ত কৰি ৰখা যুৱকজনক গ্ৰেপ্তাৰ কৰে।
অৱশ্যে আহত যুৱতী আৰু অভিযুক্ত যুৱকজনৰ ঠিকনা নিশা পর্যন্ত আৰক্ষীয়ে লাভ কৰা নাই। লগতে ঘটনাৰ উদ্দেশ্য স্পষ্ট হোৱা নাই যদিও প্রেমজনিত কাৰণতে এই ঘটনা সংঘটিত হয় বুলি আৰক্ষীয়ে সদৰী কৰিছে। সন্ধিয়া প্রায় ৫-৩০ বজাত এই নৃশংস ঘটনা সংঘটিত হয়। প্রত্যক্ষদর্শীয়ে সদৰী কৰা অনুসৰি, গ’ল্ডেন পথৰে যুৱতীগৰাকী খোজকাঢ়ি আহি আছিল আৰু সেই সময়তে যুৱকজনে হঠাৎ হাতত লৈ থকা চোকা অস্ত্ৰৰে যুৱতীগৰাকীৰ ডিঙিটো ৰেপি দিয়ে।
লগে লগে এক চিৎকাৰ মাৰি যুৱতীগৰাকী ৰাজপথত বাগৰি পৰে আৰু ডিঙিৰ পৰা হোৱাহোৰে তেজ ওলাবলৈ ধৰে। এই ঘটনা সংঘটিত কৰিয়েই যুৱকজনে দৌৰিবলৈ ধৰে আৰু যুৱতী গৰাকীৰ নিলগত থকা কিছু লোকে ‘মাৰিলে মাৰিলে’ বুলি চিঞৰ মৰাত সংশ্লিষ্ট স্থানত থকা লোকসকল সক্রিয় হৈ পলায়নৰ চেষ্টা কৰা যুৱকজনক খেদি গৈ কৰায়ত্ত কৰে। স্থানীয় লোকৰ তৎপৰতাত ততাতৈয়াকৈ আহত যুৱতী গৰাকীক প্ৰেৰণ কৰা হয় চিকিৎসালয়লৈ ।
