Police Encounter in Sonapur:
দৈনিক অগ্ৰদূত ডিজিটেল ডেস্ক:মহানগৰীৰ পাশ্বৱৰ্তী সোণাপুৰত পুৱাই সংঘটিত হ’ল আৰক্ষীৰ এনকাউণ্টাৰ। আৰক্ষীৰ গুলীত ঢলি পৰিল দুই কুখ্যাত গাড়ী চোৰ ৷ সোণাপুৰৰ মৰকদলাত দুই দুৰ্ধৰ্ষ গাড়ী চোৰ বাহৰ পাতি থকাৰ সম্ভেদ লাভ কৰি গুৱাহাটীৰ পানবজাৰ আৰক্ষীৰ এটা আৰক্ষী দলে অভিযান চলাই থাকোতে চোৰ দুটাই আৰক্ষীক দেখি গুলীয়াবলৈ ধৰে ৷ আনহাতে আৰক্ষীয়ে গুলীবৰ্ষণ কৰাত থিতাতে নিহত হয় চাইদুল আলম লস্কৰ আৰু বাবুল সিং নামৰ গাড়ী চোৰ দুটা ৷ নিহত দুই চোৰৰ পৰা দুটা পিষ্টল আৰু গাড়ী চুৰিত ব্যৱহ্ত কেতবোৰ সামগ্ৰী৷
উল্লেখ্য যে নিহত দুই চোৰৰ নেতৃত্বত এটা গাড়ী চোৰৰ চক্ৰই দীৰ্ঘদিন ধৰি গুৱাহাটী আৰু উপকন্ঠ অঞ্চলত গাড়ী চুৰি কাৰ্যৰে সন্ত্ৰাস সৃষ্টি কৰি আহিছিল ৷ এই সন্দৰ্ভত আৰক্ষীৰ ওচৰত একাধিক ভুক্তভোগীয়ে অভিযোগ দাখিল কৰিছিল ৷
আনহাতে আৰক্ষীৰ এনকাউণ্টাৰ সন্দৰ্ভত গুৱাহাটী আৰক্ষীৰ এজন জ্যেষ্ঠ বিষয়াই সদৰী কৰা মতে বুধবাৰে নিশা পানবজাৰ থানালৈ এটা ফোন আহে যে পানবজাৰ অঞ্চলৰ পৰা এখন টাটা ম’বাইল গাড়ী চুৰি হৈছে৷ পানবজাৰ থানাৰ অ’চি তৎক্ষণাত সকলো থানাত সষ্টম কৰি বিশেষ খবৰৰ ভিত্তিত সোণাপুৰৰ মৰকদলা পথত নাকা চেকিং আৰম্ভ কৰে ৷সেই সময়ত চুৰি হোৱা টাটা ম’বাইল গাড়ী খন সেই পথৰে অহাত আৰক্ষীয়ে দূৰৰ পৰা ৰবলৈ সংকেত দিয়ে যদিও বাহন খন নৰখি কিছুদূৰ ফালৰি কাটিবলৈ ধৰোতেই দুৰ্ঘটনা পতিত হয় ৷ পিছত গাড়ী খনৰ ওচৰলৈ আৰক্ষী দল যাবলৈ ধৰোতেই দুই আৰোহীয়ে আৰক্ষীলৈ লক্ষ্য কৰি গুলীচালনা কৰে ৷ প্ৰত্যুত্তৰত আৰক্ষীয়ে গুলীচালনা কৰাত দুই আৰোহী ঢলি পৰে ৷ আৰক্ষীয়ে ততাতৈয়াকৈ গুলীবৃদ্ধ দুই চোৰক সোণাপুৰৰ জিলা চিকিৎসালয়লৈ নিয়ে যদিও চিকিৎসকে মৃত ঘোষণা কৰে।
