Ali khamenei -Donald Trump:
কাটাৰৰ ড’হাস্থিত মার্কিন বায়ুসেনা ঘাটি অল-উদেইদত আক্রমণ কৰি ইৰানে আমেৰিকা যুক্তৰাষ্ট্ৰৰ মুখত প্রচণ্ড আঘাত হানিলে। এই দাবী ইৰানৰ সৰ্বোচ্চ ধর্মীয় নেতা আয়াতুল্লা আলী খামেনেইৰ। শেহতীয়া ইৰান-ইজৰাইলৰ যুদ্ধৰ পাছত প্ৰথমবাৰলৈ টেলিভিছনযোগে বক্তব্য আগবঢ়াই খামেনেই হুংকাৰ দিয়ে যে ইৰানে কেতিয়াও মার্কিন যুক্তৰাষ্ট্ৰৰ ওচৰত আত্মসমর্পণ নকৰে। উল্লেখ্য যে ইৰান-ইজৰাইল যুদ্ধই জটিল ৰূপ ধাৰণ কৰাৰ সময়তে অলপতে মার্কিন বাহিনীয়ে পাৰস্য উপসাগৰীয় দেশখনৰ তিনিটা পৰমাণু কেন্দ্রক বোমা আৰু ক্ষেপণাস্ত্ৰৰে আক্রমণ কৰে।
এই আক্ৰমণৰ প্ৰত্যুত্তৰ দি ইৰানে কাটাৰস্থিত মার্কিন বায়ুসেনা ঘাটিত অল-উদেইদত আক্রমণ কৰে। ইয়াক কেন্দ্ৰ কৰি তৃতীয় বিশ্বযুদ্ধৰ অৱতাৰণা ঘটাৰ আশংকা প্ৰবল হোৱাৰ সময়তে ইৰান আৰু ইজৰাইলে যুদ্ধবিৰতিৰ প্ৰতি সম্মতি প্রকাশ কৰা বুলি মার্কিন ৰাষ্ট্ৰপতি ট্রাম্পে ঘোষণা কৰে। অৱশ্যে ইয়াৰ পূৰ্বে ট্রাম্পে ইৰানক বিনাচতে আত্মসমর্পণ কৰিবলৈ ভাবুকি দিছিল। ইৰান-ইজৰাইলে যুদ্ধবিৰতি মানি লোৱাৰ পাছত আজি খামেনেইয়ে মার্কিন প্রশাসনলৈ কঠোৰ বাক্যবাণ নিক্ষেপ কৰে। তেওঁ কয়, ‘মার্কিন ৰাষ্ট্ৰপতিয়ে তেওঁৰ এটা বিবৃতিত ইৰানে আত্মসমর্পণ কৰিব লাগিবই বুলি উল্লেখ কৰিছিল। এনে ঘটনা (আত্মসমর্পণ) কেতিয়াও সংঘটিত নহয়।
এয়া কেতিয়াও নঘটে।’ ট্রাম্পক লক্ষ্য কৰি তেওঁ আৰু কয়, ‘মার্কিন যুক্তৰাষ্ট্ৰৰ মুখত ইৰানে প্রচণ্ড চৰ শোধালে। পশ্চিম এছিয়াস্থিত মার্কিন সামৰিক বাহিনীৰ অন্যতম মূল ঘাটি অল-উদেইদ বায়ুসেনা ঘাটিত ইৰানে আক্ৰমণ কৰি ক্ষতিসাধন কৰে।’ পশ্চিম এছিয়াস্থিত মূল মার্কিন সামৰিক ঘাটিসমূহত প্ৰৱেশ কৰিবলৈ ইৰান ইছলামিক গণৰাজ্য সক্ষম হ’ল বুলিও তেওঁ দাবী কৰে। এনেদৰে ট্রাম্পক সকীয়াই দি ধর্মীয় নেতাজনে আৰু কয়, ‘মধ্য এছিয়াস্থিত মূল মার্কিন সামৰিক ঘাটিসমূহত প্ৰৱেশ কৰিবলৈ ইৰান সক্ষম হোৱাটো আৰু প্রয়োজনত ব্যৱস্থা গ্রহণ কৰিব পৰাটো এটা গুৰুত্বপূৰ্ণ কথা। ভবিষ্যতেও এনে পদক্ষেপ (অল-উদেইদ বায়ুসেনা ঘাটিত আক্রমণ) গ্ৰহণ কৰিব পৰা হ’ব। আগ্রাসনকাৰীয়ে প্ৰচণ্ড মূল্য ভৰিব লাগিব।’ খামেনেইৰ এই মন্তব্যসমূহ সামাজিক মাধ্যম ‘এক্স’তো উপলব্ধ হৈছে।
ইৰানৰ হাতত ক্ষেপণাস্ত্র অথবা দেশখনে পৰমাণু অস্ত্র তৈয়াৰ কৰিবলৈ লোৱাৰ অজুহাত শত্রুবে দিলেও দৰাচলতে দেশখনে আত্মসমর্পণ কৰাটোহে বিচাৰে বুলিও খামেনেইয়ে ক্ষোভ প্রকাশ কৰে। এই ক্ষেত্ৰত ট্রাম্পৰ নাম উচ্চাৰণ কৰি তেওঁ কয়, ‘ট্রাম্পে সত্যটো উন্মোচন কৰিলে যে কেবল ইৰানৰ আত্মসমর্পণেহে মার্কিন যুক্তৰাষ্ট্ৰক সন্তুষ্ট কৰিব। কিন্তু আত্মসমর্পণ কেতিয়াও কৰা নহ’ব। আমাৰ ৰাষ্ট্ৰ শক্তিশালী।’ মার্কিন যুক্তৰাষ্ট্ৰৰ বিৰুদ্ধে ইৰানৰ প্ৰতিৰোধক প্রশংসা কৰি ইয়াক তেওঁ দেশখনৰ বিজয় বুলি অভিহিত কৰে। খামেনেইয়ে কয়, ‘মার্কিন শাসকৰ বিৰুদ্ধে আমাৰ মৰমৰ ইৰানৰ বিজয়ক মই শুভেচ্ছা জনালো।
এই যুদ্ধত মার্কিন শাসক প্রত্যক্ষভাৱে লিপ্ত হয়, কাৰণ তেওঁলোকে অনুভৱ কৰে যে যদি তাকে নকৰে, তেন্তে ইহুদী শাসক (ইজৰাইল) সম্পূর্ণৰূপে ধ্বংস হ’ব।’ ইজৰাইলক ৰক্ষা কৰিবলৈ যুদ্ধত লিপ্ত হ’লেও মার্কিন যুক্তৰাষ্ট্ৰই কোনো সফলতা অর্জন নকৰিলে বুলিও খামেনেইয়ে দাবী কৰে। লগতে তেওঁ দাবী কৰে যে শেহতীয়া যুদ্ধত ইৰানে ইজৰাইলক চূর্ণ-বিচূর্ণ কৰে। সামাজিক মাধ্যমত খামেনেইয়ে কয়, ‘অত হৈ-চৈ কৰাৰ পাছতো ইৰানৰআঘাতত বাস্তৱতে ইজৰাইল চূর্ণ-বিচূর্ণ হ’ল।’
উল্লেখ্য যে শেহতীয়া ইৰান-ইজৰাইল যুদ্ধৰ সময়ত খামেনেইৰ সন্ধান উলিয়াবলৈ সক্ষম হোৱা নাছিল ইজৰাইল আৰু মার্কিন প্রশাসন। ইয়াক লৈ চর্চা চলি থকাৰ সময়তে আজি তেওঁ টেলিভিছন বার্তাটো প্ৰেৰণ কৰাৰ লগতে সামাজিক মাধ্যমতো সক্রিয় হৈ উঠে। খামেনেইয়ে লগতে দাবী কৰে যে মার্কিন বাহিনীৰ আক্ৰমণত ইৰানৰ তিনি পাৰমাণৱিক ক্ষেত্ৰৰ সামান্য ক্ষতিহে হয়।