Nepal:
দৈনিক অগ্ৰদূত ডিজিটেল ডেস্ক: জলপ্ৰলয়ৰ কৱলত পৰা নেপালক এনে ভয়ংকৰ প্ৰাকৃতিক দুৰ্যোগৰ সম্মুখীন হোৱাৰ সকীয়নি পাঁচ মাহ পূর্বে কে’বাখনো দেশৰ বিশেষজ্ঞৰে গঠিত এটা আন্তঃচৰকাৰী সংস্থাই দুবাৰকৈ দিছিল। কাঠমাণ্ডুত কার্যালয় অৱস্থিত ইণ্টাৰনেচনেল চেণ্টাৰ ফৰ ইন্টিগ্রেটেড মাউন্টেইন ডেভেলপমেন্ট (আইচিআইএমঅ’ডি) শীর্ষক এই সংস্থাই যোৱা মাৰ্চতে এনে প্রাকৃতিক দুৰ্যোগৰ পূৰ্বানুমান কৰি দুখন প্রতিবেদন প্রকাশ কৰিছিল। ভাৰত, নেপাল, ভূটান আৰু চীন আদিক সামৰি লৈ অধ্যয়ন কৰি থকা এই সংস্থাৰ বিশেষজ্ঞসকলে উক্ত প্রতিবেদন দুখনত আঙুলিয়াই দিছিল যে ১৯৭৫ৰ পৰা হিমালয়ত হিমবাহৰ ২৭ মিটাৰ উচ্চতা ১০ পর্যন্ত বৰফ গলিছে।
ইয়াৰ পৰিণতিত নেপালৰ এই জলপ্রলয় সদৃশ ভয়াবহ দুর্যোগৰ সৃষ্টি হ’ব পাৰে বুলি প্রতিবেদন দুখনত আশংকা কৰা হৈছিল। এই হিমবাহসমূহক পানীৰ টাৱাৰৰ স’তে তুলনা কৰিছে এই বিশেষজ্ঞসকলে। এই পানীৰ টাৱাৰৰ তলত ভাৰত, নেপাল, চীন আদিৰ দুশ কোটি লোকে বাস কৰি আছে। প্রতিবেদন দুখনত উদ্বেগ প্রকাশ কৰা হৈছিল যে হিমালয় অঞ্চলত যি হাৰত হিমবাহৰ বৰফ গলি আছে সেয়া ভয়ংকৰ। আনহাতে, নেপালৰ জলপ্ৰলয় সম্পৰ্কত ভাৰত চৰকাৰৰ অধীনৰ ডেৰাডুনস্থিত বাদিয়া ইনষ্টিটিউট অব হিমালয়ান জিঅ’লজীৰ এজন বিজ্ঞানীয়ে কয়, ‘১৯৯০ৰ পৰা ২০২০লৈ হিন্দুকুশ হিমালয় অঞ্চলৰ হিমবাহসমূহে ১২ শতাংশ বৰফ হেৰুৱায়।’
অর্থাৎ এই হিমবাহসমূহৰ এই বিশাল ৰাশিৰ বৰফ গলি পানী হৈ বিভিন্ন নৈবে বৈ আহে। এই ক্ষেত্রত আন এটা উদ্বেগৰ বিষয় হ’ল যে এতিয়ালৈ ছিকিম, ভূটান, কাৰাকোৰাম আদিৰ প্ৰকাণ্ড প্রকাণ্ড হিমবাহসমূহৰ কোনো বৈজ্ঞানিক নিৰীক্ষণ হোৱা নাই। গতিকে এই সমূহতো ভয়ংকৰভাৱে বৰফ গলিবলৈ ধৰিছে নেকি সেয়া পোহৰলৈ অহা নাই। তদুপৰি উক্ত প্রতিবেদন দুখনত লগতে আঙুলিয়াই দিয়া হৈছে যে হিন্দুকুশ অঞ্চলত মুঠ ৩৮ টা হিমবাহৰ মাথোঁ সাতটাৰহে বৈজ্ঞানিক নিৰীক্ষণ সম্পন্ন হৈছে। উল্লেখ্য যে সমগ্র হিমালয়ত ৬৩,৭০০ হিমবাহ আছে। এই হিমবাহসমূহে ৫৫ হেজাৰৰো অধিক বর্গকিলোমিটাৰ ভূমি আগুৰি আছে। এই হিমবাহসমূহ হৈছে এছিয়াৰ ১০ খন প্রধান নৈৰ পানীৰ উৎস।
উল্লেখ্য যে ইয়াৰ পূর্বে ২০১৯তো একাংশ ভূতত্ত্ববিদে নেপালত জলপ্ৰলয়ৰ আশংকা কৰিছিল। তিব্বতত পুনৰ পাৰ ভাঙিলে হ্রদে নেপালত সতর্কতা জাৰি জলপ্রলয়ত দিশহাবা নেপাললৈ পুনৰ এক অশনি সংকেত আনিছে। নেপাল চৰকাৰে প্ৰকাশ কৰা অনুসৰি তিব্বতৰ গিবং বন্দৰৰ ওচৰত এটা হ্রদে সম্প্ৰতি পাৰ ভাঙিছে। সেয়েহে পুনৰ দেশখন প্রচণ্ড বানৰ কৱলত পৰাৰ আশংকা কৰি নেপাল চৰকাৰে কঠোৰ সতৰ্কতা জাৰি কৰিছে। ইয়াৰ আধাৰত বান দুৰ্গতসকলক উদ্ধাৰ কাৰ্যত নিয়োজিত নিৰাপত্তা বাহিনী, উদ্ধাৰ কৰ্মী আৰু সাধাৰণ লোকক সতর্ক হৈ থাকিবলৈ আৰু নিৰাপদ স্থানলৈ যাত্রা কৰিবলৈ নেপাল আৰক্ষীয়ে আহ্বান জনাইছে। আনহাতে, এই সকীয়নি জাৰিৰ পাছতে ৯০ মিনিটৰ বাবে বান দুৰ্গতৰ উদ্ধাৰ কাৰ্য বন্ধ কৰা হয়। গতিকে হেজাৰ হেজাৰ লোক এতিয়াও সন্ধানহীন হৈয়ে আছে। একেদৰে তিব্বততো চীনে উদ্ধাৰ অভিযান আজি স্থগিত ৰাখিছে।
