space:মহাকাশত প্রতিদিনে ১৬বাৰ সূৰ্য উদয় হয় আৰু অস্ত যায়। এনে অৱস্থাত মহাকাশচাৰীসকলে কেনেকৈ শুৱে বুলি প্রশ্ন উত্থাপন হয়। বহুতৰ বাবে ই এক কৌতূহলৰ বিষয়।
সম্প্রতি এই ৰহস্যৰ ভেদ ভাঙিলে ভাৰতীয় মহাকাশচাৰী শীর্ষ বায়ুসেনা বিষয়া শুভাংশু শুক্লাই। সম্প্রতি আন্তর্জাতিক মহাকাশ কেন্দ্র (আইএছএছ)ত থকা মহাকাশচাৰীজনে মঙলবাৰে ভাৰতীয় মহাকাশ গবেষণা সংস্থা (ইছৰ’)ৰ মেঘালয়ৰ উমিয়ামস্থিত উত্তৰ-পূব মহাকাশ প্রয়োগ কেন্দ্ৰ (এনইএছএচি) ৰ ছাত্ৰ-ছাত্ৰীসকলৰ স’তে ভাব বিনিময় কৰে।
এই ভাব বিনিময়ৰ সময়ত তেওঁ উৎসুক ছাত্র-ছাত্রীসকলে কৰা এক প্ৰশ্নৰ উত্তৰ দি কয়, ‘আন্তর্জাতিক মহাকাশ কেন্দ্রত সদায়ে ১৬বাৰ সূর্য উদয় আৰু ১৬বাৰ মাৰ যায়। কাৰণ আমি প্রতি ৯০ মিনিটত পৃথিৱীৰ চাৰিওফালে প্ৰদক্ষিণ কৰি থাকো। সূৰ্যৰ পোহৰ অনুসৰণ কৰি আমি কাম নকৰো। আমি গ্রীণউইছ মান সময় (ভাৰতীয় সময়তকৈ চাৰে পাঁচ ঘণ্টা পিছপৰি থাকে) অনুসৰি, কাম-কাজ কৰো।’
মহাকাশত মধ্যাকর্ষণশূন্য পৰিৱেশত মহাকাশচাৰীসকলে কেনেদৰে কাম কৰে সেই সম্পর্কতো মহাকাশচাৰীজনে ব্যাখ্যা কৰে। তেওঁ কয়, ‘পৃথিৱীত মাধ্যাকৰ্ষণৰ মাজত আমি ডাঙৰ হ’লো; কিন্তু মহাকাশত এই শক্তি নাই। গতিকে ইয়াত শৰীৰৰ অনেক পৰিৱৰ্তন ঘটে। এই পৰিৱৰ্তনৰ স’তে মিলাই কাম-কাজ কৰিবলগীয়া হয়। প্রথমে অস্বস্তি (স্পেচ ছিকনেছ) হয়। ইয়াৰ বাবে ঔষধ আছে। আমি দ্রুততৰে পৰিস্থিতিৰ স’তে মিলি পৰিছো।’
মহাকাশত শৰীৰ কেনেদৰে সুস্থ ৰাখিছে সেই সম্পর্কতো তেওঁ সদৰী কৰে। শুক্লাই কয়, ‘মাধ্যাকর্ষণশূন্য পৰিৱেশত মাংসপেশী আৰু হাড়ৰ ক্ষয় হয়। আমি সদায় ট্রেড মিল চাইকেল শক্তি-দৃঢ়তা প্রশিক্ষণ যন্ত্ৰত শৰীৰচৰ্চা কৰো। এই অভিযানত আৰু পৃথিৱীত ঘূৰা পর্যন্ত সুস্থ থকাটো প্রয়োজন।’
আন্তর্জাতিক মহাকাশ কেন্দ্রত কেতবোৰ কাম-কাজত ৰবট বাহু ব্যৱহাৰ কৰা বুলি তেওঁ জানিবলৈ দিয়ে। উল্লেখ্য যে যোৱা ২৬ জুনত আন তিনি মহাকাশচাৰীসহ শুক্লা আন্তর্জাতিক মহাকাশ কেন্দ্রত উপস্থিত হয়। ড্রেগনযানযোগে আন্তর্জাতিক মহাকাশ কেন্দ্রত উপস্থিত হোৱাৰ পাছৰে পৰা চাৰিওজন মহাকাশচাৰী বিভিন্ন গৱেষণাত ব্যস্ত আছে। শুক্লাই হৈছে আন্তর্জাতিক মহাকাশ কেন্দ্রত পদার্পণ কৰা প্রথম ভাৰতীয় মহাকাশচাৰী।
