NASA discovers the smallest planet in the universe:
দৈনিক অগ্ৰদূত ডিজিটেল ডেস্ক:অৱশেষত বিশ্বব্ৰহ্মাণ্ডৰ সৰ্বকনিষ্ঠ গ্ৰহটোৰ সন্ধান ওলাল। মার্কিন মহাকাশ সংস্থা ‘নাছা’ৰ বিজ্ঞানীসকলে শেহতীয়াভাৱে এক ‘নৱজাতক’ গ্রহ বিশ্বব্রহ্মাণ্ডত বিচাৰি পাইছে। এই গ্ৰহৰ বয়স ১০ লাখ বছৰতকৈও কম বুলি ‘নাছা’ৰ বিজ্ঞানীসকলে দাবী কৰিছে। এই বিজ্ঞানীসকলে সদ্য আবিষ্কৃত গ্ৰহটোৰ নাম ‘এলিয়াছ-২-২৪ বি’ ৰাখিছে। ‘নাছা’ৰ বিজ্ঞানীসকলৰ মতে এই ‘নৱজাতক ‘গ্ৰহৰ গঠন এতিয়াও সম্পূর্ণ হোৱা নাই।
গ্ৰহটোৰ বক্ষত গেছ, ধূলিকণা, বৰফ আৰু শিলৰ বলয়ৰ মাজত এতিয়াও ঘূৰ্ণস্থলী আছে। নাছাৰ বিজ্ঞানীসকলে প্ৰকাশ কৰা অনুসৰি পৃথিৱীৰ পৰা এই সদ্য আৱিষ্কৃত গ্ৰহৰ দূৰত্ব ৪৫০ আলোকবর্ষ। উল্লেখ্য যে এক আলোকবর্ষৰ অৰ্থ হ’ল পোহৰে প্ৰতি ছেকেণ্ডত তিনি লাখ কিলোমিটাৰ বেগত এবছৰত যিমান দূৰত্ব অতিক্ৰম কৰে, তাৰ মুঠ পৰিমাণ। এই সদ্য আৱিষ্কৃত গ্রহ সম্পর্কত ‘দ্য এষ্ট্র’ফিজিকেল জার্ণেল লেটাছ শীর্ষক পত্রিকাত গৱেষণাপত্র প্রকাশ হৈছে।
গ্ৰহটোৰ সাম্প্ৰতিক অৱস্থাই সৃষ্টিৰ সময়তপৃথিৱীৰ অৱস্থা কেনে আছিল তাৰো আভাস দিব পাৰে বুলি বিজ্ঞানীসকলে মত পোষণ কৰিছে গ্ৰহটো ঘূৰি থকাৰ ফলত তাৰ চাৰিওফালে এটা ফাঁকৰ সৃষ্টি হৈছে। এই ফাঁক লক্ষ্য কৰি বিজ্ঞানীসকলে গ্রহটো আৱিষ্কাৰ কৰিছে।
এই সম্পর্কত বিজ্ঞানী লুকাছ ছিয়েজাই কয় যে ইয়াৰ পূৰ্বে যিটো সর্বকনিষ্ঠ গ্ৰহৰ সন্ধান বিজ্ঞানীসকলে পাইছিল, সেই গ্ৰহটোৰ বয়স ৫০ লক্ষ বছৰ আছিল। অর্থাৎ এলিয়াছ-২০২৪ নি এই গ্ৰহণৰ তুলনাত তেনেই কম বয়সৰ। বিজ্ঞানীসকলৰ মতে, মহাকাশত ঘূর্ণীয়মান গেছ আৰু ধূলিকণাৰ বিশাল মেঘৰ ভিতৰত নক্ষত্ৰৰ জন্ম হয়। তাৰ পাছতে সেই নক্ষত্ৰক চাৰিওফালে বর্ধিত উপাদান বা যি অৱশিষ্ট ধূলি-মাকতি থাকে, সেইবোৰ লাহে লাহে একগোট হৈ এটা নির্দিষ্ট কক্ষপথ তৈয়াৰ কৰে। নিৰ্দিষ্ট নক্ষত্রক কেন্দ্র কৰি সেই কক্ষপথ তৈয়াৰ হয়। তাতে গ্ৰহৰ জন্ম হয়। অৱশ্যে এনে নৱজাত গ্ৰহৰ সন্ধান উলিওৱাটো সহজ নহয়।
কাৰণ এনে এক গ্রহক প্রচণ্ড ধূলিয়ে আগুৰি থাকে। তৎসত্ত্বেও বিজ্ঞানীসকলে বিশ্বব্ৰহ্মাণ্ডৰ বহু গ্ৰহৰ সন্ধান উলিয়াবলৈ সক্ষম হৈছে। এই সম্পর্কত বিজ্ঞানীসকলৰ ব্যাখ্যা হ’ল যে যেতিয়া একোটা নতুন গ্রহই সংশ্লিষ্ট নক্ষত্ৰৰ ওচৰৰে পাৰ হয়, তেতিয়া সেই নক্ষত্ৰৰ পৰা পৃথিৱীলৈ অহা পোহৰৰ পৰিমাণ কিছু হ্রাস পায়। ফলত বিজ্ঞানীসকলে একোটা নতুন গ্রহ আৱিষ্কাৰ কৰিবলৈ সক্ষম হয়। এনেদৰে এই পর্যন্ত বিজ্ঞানী সকলে কমেও ছহেজাৰ গ্ৰহৰ সন্ধান পাবলৈ সক্ষম হৈছে। এইসমূহ গ্ৰহৰে সৰ্বকনিষ্ঠ হৈছে এলিয়াছ-২-২৪ বি।