kahilipara Incident:
‘লিভ ইন টুগেদাৰ’ৰ দৰে সম্পৰ্কৰ তথাকথিত ব্যৱস্থাৰে চলি অহা এহাল যুৱক-যুৱতীৰ শেষ পৰিণতি ৰাজ্যজুৰি চৰ্চাৰ বিষয় হৈ পৰে। বুধবাৰে নিশা মহানগৰীৰ কাহিলিপাৰাৰ কল্যাণী নগৰৰ ২৪ নম্বৰ গৃহৰ ভাড়াতীয়া কোঠাত টিহুৰ নৱজ্যোতি তালুকদাৰ নামৰ এজন যুৱকে চিপ লৈ আত্মহত্যা কৰে। তাৰ পূৰ্বে ঘৰটোৰ আন এটা কোঠাত প্রেমিকা যুৱতীক আবদ্ধ কৰি থয়।
নৱজ্যোতিয়ে আত্মহত্যা কৰাৰ পাছত যুৱতী গৰাকীয়ে বন্ধ কোঠাৰ ভিতৰৰ পৰাই ভাড়া ঘৰটোৰ গৰাকী, নৱজ্যোতিৰ পিতৃ আৰু আৰক্ষীক খবৰ দি নিজেও বাঁওহাতৰ সিৰা কাটি আত্মহত্যাৰ চেষ্ট চলায়। পাছত আৰক্ষীৰ দলে এটা কোঠাত নৱজ্যোতিৰ ওলমি থকা মৃতদেহটো উদ্ধাৰ কৰে আৰু কাষৰ আন এটা কোঠাৰ পৰা তেজৰ ডোঙাত লুতুৰি-পুতুৰি হৈ মুমূর্ষু অৱস্থাত পৰি থকা যুৱতীগৰাকীক উদ্ধাৰ কৰে। ৰহস্যজনকভাৱে মৃতদেহ উদ্ধাৰৰ সময়ত নৱজ্যোতিৰ শৰীৰত কাপোৰ প্ৰায় নাছিলেই।
আৰক্ষীয়ে ততাতৈয়াকৈ যুৱতীগৰাকীক লালগণেশৰ এখন ব্যক্তিগত চিকিৎসালয়লৈ প্ৰেৰণ কৰে। চিকিৎসকে শেহতীয়াকৈ সদৰী কৰা অনুসৰি, যুৱতীগৰাকী বৰ্তমান সংকটমুক্ত। নৱজ্যোতিয়ে ভাৰতীয় জীবন বীমা নিগমৰ এজেণ্টৰূপে কৰ্মৰত থকাৰ বিপৰীতে যুৱতীগৰাকী গুৱাহাটীৰ এটা ব্যক্তিগত খণ্ডৰ বৈদ্যুতিন সংবাদ মাধ্যমত কৰ্মৰত হৈ আছে। তেওঁৰ ঘৰ নলবাৰীত।
#কি পৰিস্থিতিত সংঘটিত হ’ল ঘটনা ?
চাঞ্চল্যকৰ এই ঘটনাৰ তদন্ত ভগদত্তপুৰ আৰক্ষীয়ে অব্যাহত ৰাখিছে। আৰক্ষীয়ে এই পর্যন্তলাভ কৰা তথ্য অনুসৰি, দীর্ঘদিনৰ পৰা প্ৰেমৰ সম্পৰ্কত থকা দুয়োরে যোৱা এবছৰৰ পৰা ভাড়াঘৰটোত একেলগে বাস কৰিছিল। নৱজ্যোতিৰ পৰিয়ালৰ লোকৰ ভাষ্য অনুসৰি, অহা জানুৱাৰীত দুয়োৰে বিবাহ সম্পন্ন হোৱাৰ কথা আছিল। তাৰ বাবে নৱজ্যোতিয়ে টিহুৰ ঘৰত নতুন কোঠা নিৰ্মাণৰ কামো আৰম্ভ কৰিছিল। অৱশ্যে ভাড়াঘৰৰ স্বত্বাধিকাৰীয়ে আজিহে গম পায় যে দুয়ো অবিবাহিত আছিল। কাৰণ দুয়ো পতি-পত্নী বুলি পৰিচয় দি ঘৰটো ভাড়ালৈ লৈছিল। ভাড়াঘৰটোৰ গৰাকীয়ে জনায় যে নৱজ্যোতিৰ পৰিয়ালৰ লোকৰ লগতে যুৱতী গৰাকীৰ পৰিয়ালৰ লোকো মাজে মাজে ঘৰটোলৈ আহিছিল। গতিকে তেওঁলোক পতি-পত্নী নহয় বুলি সন্দেহো কৰিব পৰা নাছিল।
আৰক্ষীৰ লগতে ভাড়াঘৰটোৰ গৰাকীয়ে জনায় যে যোৱা নিশা প্রায় ৯.৩০ বজাত ঘৰটোৰ দৰ্জাত কে’বাবাৰো জোৰেৰে ঢকিওৱাৰ শব্দ হৈছিল। তাৰ পাছত যুৱতী গৰাকীয়ে ভাড়াঘৰৰ গৰাকীলৈ ফোন কৰি তেওঁক নৱজ্যোতিয়ে এটা কোঠাত আবদ্ধ কৰি ৰখা বুলি খবৰ দিছিল। তাৰ পাছতে যুৱতীগৰাকীয়ে নৱজ্যোতিৰ পিতৃ আৰু আৰক্ষীক খবৰটো দিছিল। সেইমতে আৰক্ষীৰ দল ঘটনাস্থলীত উপস্থিত হৈছিল।
এই ঘটনাৰ অন্তৰালৰ কাৰণ অদ্যাপি স্পষ্ট হোৱা নাই; কিন্তু চিকিৎসাধীন যুৱতীগৰাকীৰ পৰা যি প্রাথমিক তথ্য উদ্ধাৰ কৰা হৈছে, তাৰ ভিত্তিত সন্দেহেই ইয়াৰ মূল কাৰণ বুলি আৰক্ষী নিশ্চিত হৈছে। নৱজ্যোতিৰ কিছুমান আচৰণক লৈ যুৱতীগৰাকীৰ সন্দেহ ওপজিছিল। আনহাতে, তেনে সন্দেহ অমূলক বুলি নৱজ্যোতিয়ে কৈছিল। তথাপি প্ৰেমৰ সম্পৰ্কত জন্মা সন্দেহ যুৱতীগৰাকীৰ মনত গাঢ় হৈছিল। ইয়াকে লৈ দুয়োৰে মাজত বিগত প্রায় দুমাহৰ পৰা সংঘাতৰ সৃষ্টি হৈছিল। সেই সংঘাতে প্রায়ে কাজিয়াৰ ৰূপ লৈছিল। বুধবাৰে একে ধৰণৰ কাজিয়াৰ সূত্রপাত হৈছিল আৰু শেষত নৱজ্যোতিয়ে প্রেমিকাক এটা কোঠাৰ ভিতৰত সুমুৱাই বাহিৰৰ পৰা দৰ্জা বন্ধ কৰি দিছিল।
আনহাতে, নিজে কাষৰ কোঠাটোত আত্মহত্যাৰ পথ বাছি লৈছিল। আত্মহত্যা কৰাৰ পূৰ্বে নৱজ্যোতিয়ে প্রেমিকাক চিঞৰি নিজৰ সিদ্ধান্তৰ বিষয়ে অৱগত কৰিছিল। বাহিৰৰ পৰা দৰ্জা বন্ধ কৰি দিয়া কোঠাৰ পৰা ওলাবলৈকে যুৱতীগৰাকীয়ে দৰ্জাত গাৰ সমস্ত শক্তিৰে ঢকিয়াইছিল। সেই শব্দ কাণত পৰিছিল ভাড়াঘৰটোৰ গৰাকীৰ।
# হত্যাৰ অভিযোগ !
ইপিনে, পুত্ৰ হত্যাৰ বলি হোৱা বুলি অভিযোগ কৰে নৱজ্যোতিৰ পিতৃ-মাতৃয়ে। পিতৃয়ে এই বুলিও অভিযোগ কৰে যে যোৱা নিশা যুৱতী গৰাকীয়ে তেওঁক ফোন কৰি ‘ওম শান্তি ওম শান্তি, ওম শান্তি… আপোনাৰ ল’ৰাটোক বিদায় দিলো’ বুলি কোৱাৰ অভিযোগ কৰে। গতিকে নৱজ্যোতিক পৰিকল্পিতভাৱে হত্যা কৰা হৈছে বুলি পিতৃয়ে আৰক্ষীক জনায়।
আনহাতে, মাতৃয়ে কয় যে যোৱা নিশা প্রায় আঠ বজাত তেওঁ পুত্রলৈ আঠ-১০ বাৰ ফোন কৰিও সঁহাৰি পোৱা নাছিল। অথচ নৱজ্যোতিয়ে পূর্বে কেতিয়াও তেনে কৰা নাছিল। গতিকে ফোন নধৰা সময়ৰ পৰাই তেওঁৰ মনতো যথেষ্ট অস্থিৰ হৈ পৰিছিল। তদন্তকাৰী আৰক্ষীয়ে সুস্থ হৈ উঠাৰ পাছতে চিকিৎসাধীন যুৱতীগৰাকীক সোধপোছ কৰিব বুলি জনায়।