Arunachal police recovered stolen cars:
এখন নহয়, দুখন ৫৭ খনকৈ বিলাসী তথা ব্যয়বহুল গাড়ী এটা চুৰি চক্ৰৰ পৰা উদ্ধাৰ কৰিলে অৰুণাচল প্রদেশৰ পৰা এখন আৰক্ষী থানাই। ইটানগৰ আৰক্ষীয়ে এই বৃহৎ গাড়ী চুৰি চক্ৰ উৎখাত কৰি চক্ৰটোৰ কবলৰ পৰা উদ্ধাৰ কৰা ৫৭ খন চুৰি গাড়ীৰ মাজত অডি, ফ’ৰ্ড এনডেভাৰ, টয়টা ফচুনাৰ আৰু মহিন্দ্ৰাথাৰ আছে।
এই বিলাসী তথা অত্যাধুনিক গড়ীসমূহ চক্রটোৱে দিল্লী, হাৰিয়ানা, উত্তৰ প্ৰদেশকে ধৰি বিভিন্ন ৰাজ্যৰ পৰা চুৰি কৰি অৰুণাচল প্রদেশলৈ আনে। চক্রটোৰ কবলৰ পৰা উদ্ধাৰ কৰা এই অর্ধশতাধিক গাড়ীৰ মূল্য ৩০ কোটিৰো অধিক টকাৰ হ’ব। উত্তৰ ভাৰতৰ পৰা দেশৰ একেবাৰে পূব সীমান্তৰ অৰুণাচল প্রদেশলৈ জাল বিস্তৃত থকা এই গাড়ী চুৰি চক্ৰৰ বিৰুদ্ধে যোৱা দুই জুলাইত ইটানগৰ আৰক্ষীয়ে অভিযান আৰম্ভ কৰে।
এই অভিযানত এই বৃহৎ সংখ্যক চুৰি বিলাসী বাহন উদ্ধাৰ হয়। উল্লেখ্য যে এখন আৰক্ষী থানাই এনে বৃহৎ সংখ্যক চুৰি বাহন উদ্ধাৰ কৰাটো দেশৰ ভিতৰতে এইটোৱে প্ৰথম ঘটনা। এই বৃহৎ চুৰি চক্ৰই ঘাইকৈ দিল্লী আৰু ৰাষ্ট্ৰীয় ৰাজধানী অঞ্চল তথা ওচৰ-পাঁজৰৰ ৰাজ্যসমূহৰ পৰা বিলাসী গাড়ী চুৰি কৰাৰ তথ্য ইটানগৰ আৰক্ষীৰ তদন্তত উদ্ধাৰ হৈছে।
এই সম্পৰ্কত জ্যেষ্ঠ আৰক্ষী বিষয়া জুম্মাৰ বাছাৰে সাংবাদিকক কয়, ‘যোৱা দুই জুলাইৰ পৰা আৰম্ভ হোৱা এই অভিযানৰ সময়ত ইটানগৰ ৰাজধানী অঞ্চলৰ বিভিন্ন স্থানৰ পৰা ৫৭ খন চুৰি বাহন উদ্ধাৰ হয়। এই বাহনসমূহৰ অধিকাংশই বিলাসী আৰু ব্যয়বহুল বাহন। দিল্লী, হাৰিয়ানা, উত্তৰ প্ৰদেশ আৰু অন্যান্য ৰাজ্যত ৰুজু হোৱা গাড়ী চুৰিৰ গোচৰৰ স’তে এই বাহনসমূহৰ সম্পৰ্ক আছে।’
আৰক্ষী বিষয়াজনে লগতে সদৰী কৰা অনুসৰি অপৰাধী চক্ৰটোৱে গাড়ী চুৰি কৰাৰ পাছত দালালৰ সহায় লয়। দালালৰ সহযোগত চক্রটোৱে ইঞ্জিন আৰু চেছিছ নম্বৰ বিকৃত কৰে। ইয়াৰ জৰিয়তে চক্ৰটোৱে চুৰি গাড়ীৰ ভুৱা পঞ্জীয়নপত্ৰ তৈয়াৰ কৰি লয়। এনে ভুৱা পঞ্জীয়নপত্ৰ ব্যৱহাৰ কৰি চক্ৰটোৱে উত্তৰ ভাৰত বা দেশৰ আন স্থানৰ পৰা চুৰি গাড়ী অৰুণাচল প্ৰদেশলৈ সহজে লৈ আহে।
এই বৃহৎ গাড়ী চুৰি চক্ৰৰ স’তে বিদেশী অপৰাধী চক্র জড়িত থকাৰো সম্ভাৱনা ব্যক্ত কৰিছে তদন্তকাৰী আৰক্ষীয়ে। এই সম্পৰ্কত বাছাৰে কয় যে কেতবোৰ ডিজিটেল বিত্তীয় লেন-দেন আৰু সীমান্ত পাৰ হৈ কৰা চালচলনে এই চুৰি চক্ৰৰ স’তে বিদেশী অপৰাধী জড়িত থকাৰ ইংগিত বহন কৰিছে।
এই দিশো তদন্তৰ আওতালৈ অনা হৈছে বুলি সদৰী কৰে বাছাৰে। তেওঁ কয় যে এই বিষয় সম্প্রতি বিশদ অনুসন্ধানৰ অধীনত আছে। আৰক্ষীয়ে লগতে সাধাৰণ জনতাক সতর্ক কৰি দিছে যে ছেকেণ্ড হেণ্ড বা পুৰণি গাড়ী ক্ৰয়ৰ ক্ষেত্ৰত সকলোরে সাৱধানতা অৱলম্বন কৰা উচিত। গাড়ীৰ নথিপত্ৰ ভালদৰে পৰীক্ষা-নিৰীক্ষা কৰিহে একোখন পুৰণি গাড়ী ক্রয় কৰা উচিত বুলি আৰক্ষীয়ে সতৰ্ক কৰি দিছে।