Bihar Election: ✒️বিশেষ গভীৰ পুনৰীক্ষণ (এছআইআৰ) ৰ নাম লৈ বিহাৰৰ আগন্তুক বিধানসভা নিৰ্বাচনৰ খচৰা ভোটাৰ তালিকাৰ পৰা ৬৫ লক্ষ ভোটাৰক আঁতৰ কৰা দেশৰ নিৰ্বাচন আয়োগক অৱশেষত নাকী লগালে উচ্চতম ন্যায়ালয়ে।
এই নজিৰবিহীন কাৰ্যৰে দেশজুৰি আলোড়ন তোলা আয়োগক ভোটাৰ তালিকাৰ পৰা বাদ পৰা এই ৬৫ লক্ষ ভোটাৰৰ নাম প্রকাশ কৰিবলৈ কালি ন্যায়ালয়ে আয়োগলৈ নির্দেশ জাৰি কৰে।
কেৱল সেয়াই নহয়, এই বৃহৎ সংখ্যক ভোটাৰৰ নাম কৰ্তনৰ কাৰণ ৰাজহুৱা কৰিবলৈ আয়োগক নির্দেশ দিছে ন্যায়ালয়ে। উল্লেখ্য যে খচৰা ভোটাৰ তালিকাৰ পৰা বাদ পৰা এই ৬৫ লক্ষ ভোটাৰৰ নাম প্রকাশ কৰিবলৈ একপ্ৰকাৰ অনিচ্ছা প্রকাশ কৰি আহিছে আয়োগে।
অলপতে এই এছআইআৰ সম্পৰ্কীয় এক গোচৰৰ শুনানিৰ সময়ত উচ্চতম ন্যায়ালয়ৰ এক নির্দেশ মর্মে আয়োগে ন্যায়ালয়ক অৱগত কৰে যে বাদ পৰা ভোটাৰসকলৰ নাম ৰাজহুৱা কৰাৰ ক্ষেত্ৰত আইনী বাধ্যবাধকতা নাই।
আনহাতে, আগন্তুক বিহাৰ বিধানসভা নির্বাচনত বিজেপিক সহায় কৰাৰ উদ্দেশ্যে আয়োগে ৰাজ্যখনৰ লাখ লাখ ভোটাৰৰ নাম ভোটাৰ তালিকাৰ পৰা কৰ্তন কৰা বুলি বিৰোধী পক্ষ সংসদৰ বাহিৰে-ভিতৰে সৰৱ হৈ আহিছে।
আনকি অলপতে বিৰোধী শিবিৰৰ তিনিশ সাংসদে দিল্লীও কঁপায়। গতিকে বিষয়টো দেশে-বিদেশে চর্চিত হৈ আছে। এনে অবস্থাতে আজি ন্যায়াধীশ সূর্য কান্ত আৰু ন্যায়াধীশ জয়মাল্য বাগচিৰ এখন বিচাৰপীঠে এই ৬৫ লক্ষ ভোটাৰৰ নাম আৰু তেওঁলোকৰ নাম ভোটাৰ তালিকাৰ পৰা বাদ দিয়াৰ কাৰণ ৰাজহুৱা কৰিবলৈ আয়োগলৈ নিৰ্দেশ জাৰি কৰে।
ন্যায়ালয়ৰ এই নির্দেশ অনুসৰি এই বিপুল সংখ্যক ভোটাৰৰ নাম আৰু তেওঁলোক ভোটাৰ তালিকাৰ পৰা বাদ পৰাৰ কাৰণ আয়োগে নিজৰ ৱেবছাইটসমূহত উল্লেখ কৰিব লাগিব। কালি ন্যায়ালয়ে আন এক নির্দেশ জাৰি কৰি আয়োগৰ কাম-কাজত লক্ষ্মণ ৰেখা টানে।
আয়োগলৈ আন এক নির্দেশ জাৰি কৰি দুজনীয়া বিচাৰপীঠখনে কয় যে ভুলবশতঃ যিসকলৰ নাম কর্তন হৈছে সেইসকলে আধাৰ কাৰ্ডৰ প্রতিলিপিসহ আপত্তি দাখিল কৰিব পাৰিব। লক্ষ্যণীয়ভাবে আধাৰ কাৰ্ডক নাগৰিকত্বৰ প্ৰমাণৰূপে গ্রহণ কৰিবলৈ নির্বাচন আয়োগে অস্বীকাৰ কৰি আহিছে।
উল্লেখ্য যে খচৰা ভোটাৰ তালিকাৰ পৰা বাদ পৰা ৬৫ লক্ষ ভোটাৰৰ ২২ লাখ মৃত বুলি আয়োগে প্রকাশ কৰিছে। এই সম্পর্কত আজি ন্যায়াধীশ কান্তে কয়, ‘যদি ২২ লাখ লোকৰ মৃত্যু হৈছে তেন্তে এই তথ্য বুথ পর্যায়ত কিয় প্রকাশ কৰা হোৱা নাই? ৰাজনৈতিক দলসমূহৰ ওপৰত নাগৰিকসকল নিৰ্ভৰ কৰাটো আমি নিবিচাৰো।’
আয়োগৰ জিলা পৰ্যায়ৰ ৱেবছাইটসমূহত উপলব্ধ হ’ব লাগিব তথ্য
নির্বাচন আয়োগৰ মুখত চুণ সানি আজি উচ্চতম ন্যায়ালয়ে কয়, ‘২০২৫ৰ ভোটাৰ তালিকাত অন্তর্ভুক্ত থকা কিন্তু খচৰা ভোটাৰ তালিকাত নথকা ৬৫ লাখ ভোটাৰৰ নাম আয়োগৰ জিলা পৰ্যায়ৰ ৱেবছাইটসমূহত উপলব্ধ হ’ব লাগিব। লগতে তেওঁলোকৰ নাম ভোটাৰ তালিকাৰ পৰা কৰ্তন হোৱাৰ কাৰণো ৱেবছাইটত উপলব্ধ হ’ব লাগিব।’
এই তথ্য সংবাদ মাধ্যমৰ জৰিয়তেও বহুলভাবে প্রকাশ কৰিবলৈও ন্যায়ালয়ে নির্দেশ জাবি কবে। ‘সর্বোচ্চ প্রচলন থকা অ-ইংৰাজী বাতৰি কাকতৰ জৰিয়তে বহুল প্রচাৰ কৰিব লাগিব। লগতে দূৰদৰ্শন আৰু অন্যান্য চেনেলসমূহৰ জৰিয়তেও প্ৰচাৰ কৰিব লাগিব।’ ন্যায়ালয়ে নির্দেশত এইদৰে কয়।
বাদ পৰা ভোটাৰসকলৰ নাম আৰু বাদ পৰাৰ কাৰণ প্ৰকাশ কৰিলে নির্বাচন আয়োগৰ ওপৰত ভোটাৰসকলৰ আস্থা বৃদ্ধি পাব বুলিও ন্যায়ালয়ে মন্তব্য কৰে। এই নির্দেশ জাৰিৰ সময়ত আয়োগৰ অধিবক্তা ৰাকেশ দ্বিবেদীয়ে কয় যে ভোটাৰসকলে নিজৰ ফটোযুক্ত ভোটাৰ পৰিচয়পত্ৰৰ নম্বৰ ব্যৱহাৰ কৰি নিজৰ ভোটাৰৰ পৰ্যায়ৰ কথা জানিব পাৰিব।
তেতিয়া তেওঁক উভতি ধৰি ন্যায়াধীশ বাগচিয়ে কয়, ‘আপোনালোক (নির্বাচন আয়োগ)-এ কিয় নিজেই মৃত/প্রব্রজিত/নকল ভোটাৰৰ নামসমূহ ৱেবছাইটত প্রকাশ নকৰে? যদি আপোনালোকে এই তথ্যসমূহ ৱেবছাইটত উপলব্ধ কৰে তেতিয়া নির্বাচন আয়োগৰ বিৰুদ্ধে সৃষ্ট বাকধাৰা দূৰ হ’ব। স্বচ্ছতাই ভোটাৰসকলৰ আস্থা বৃদ্ধিত সহায় কৰিব। আপোনালোকে কিয় ৱেবছাইটত তথ্য প্রকাশৰ বাবে অতিৰিক্ত পদক্ষেপ লোৱা নাই?
ন্যায়াধীশ কান্তে এই বুলিও কয় যে বিশেষ শিক্ষা-দীক্ষা নথকা লোকে বুজি পোৱাকৈ সবাতোকৈ সহজ-সবল ভাষাত বাজহুৱা জাননীৰ জৰিয়তে ভোটাৰ সম্পৰ্কীয় এই তথ্যসমূহ আয়োগে প্রকাশ কৰা উচিত। এই ক্ষেত্রত তেওঁ এটা উদাহৰণ দি কয়, ‘যদি পুনম দেৱীৰ নাম কৰ্তন কৰা হৈছে তেন্তে পুনম দেবীয়ে তেওঁৰ নাম কৰ্তনৰ বিষয়ে আৰু তেওঁ নাম কর্তনৰ কাৰণ জানিব লাগিব। ‘ এই সম্পর্কত ন্যায়ালয়ে কঠোৰভাৱে কয় যে ভোটাৰে আধাৰ কাৰ্ডৰ প্ৰতিলিপিও জমা দিব পাৰিব।
কালি উচ্চতম ন্যায়ালয়ে নির্বাচন আয়োগলৈ এই নির্দেশ জাৰি কৰাৰ লগে লগে বিৰোধী শিবিৰত সন্তুষ্টিৰ হাঁহি বিৰিঙিছে। কাৰণ বিৰোধীয়ে পূৰ্বৰে পৰা আশংকা কৰি আহে যে এই নজিৰবিহীন বিশেষ গভীৰ পুনৰীক্ষণৰ জৰিয়তে আয়োগে লাখ লাখ ভোটাৰৰ নাম ভোটাৰ তালিকাৰ পৰা কৰ্তনৰ ষড়যন্ত্ৰ কৰিছে।
ইতিমধ্যে এই সম্পর্কত বিৰোধীয়ে আইনী আৰু জনসজাগতামূলক কাৰ্যসূচী গ্ৰহণ কৰিছে। সমগ্র ৰাজ্যখনত সেই সম্পর্কীয় সজাগতা অভিযান চলাব বুলি ইতিমধ্যে বিৰোধীয়ে ঘোষণা কৰিছে। নির্বাচন আয়োগৰ এই কার্যৰ বিৰোধিতা কৰি এছ’চিয়েছন ফৰ ডেম’ক্রেটিক বিফর্মো উচ্চতম ন্যায়ালয়ৰ দ্বাৰস্থ হৈছে। বৃহস্পতিবাৰে প্রশান্ত ভূষণ, কপিল শিবাল, অভিষেক মনু সিংভী, বৃন্দা গ্ৰভাৰ আদি বৃহৎ সংখ্যক বিখ্যাত অধিবক্তাই আবেদনকাৰী পক্ষসমূহৰ হৈ যুক্তি প্রদর্শন কৰে।’
