NRC:✒️অৱশেষত ৰাষ্ট্ৰীয় নাগৰিকপঞ্জী (এনআৰচি) পুনৰীক্ষণৰ আবেদন গ্রহণ কৰিলে দেশৰ উচ্চতম ন্যায়ালয়ে। সর্বোচ্চ ন্যায়ালয়ৰ তত্ত্বাৱধানত চলা ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াৰ প্ৰাক্তন সমন্বয়ক হিতেশ দেৱ শৰ্মাই দাখিল কৰা আবেদন গ্রহণ কৰি দেশৰ ন্যায়ালয়ৰ খণ্ড বিচাৰপীঠে কালি ভাৰত চৰকাৰ, অসম চৰকাৰ, দেশৰ মহাপঞ্জীয়ক আৰু ৰাষ্ট্ৰীয় নাগৰিকপঞ্জীৰ সমন্বয়কলৈ জাননী জাৰি কৰে।
উল্লেখ্য যে আবেদনকাৰীৰ হৈ যুক্তি দর্শোৱা জ্যেষ্ঠ অধিবক্তা কমল নয়ন চৌধুৰীয়ে এই সন্দৰ্ভত কয় যে প্রাক্তন সমন্বয়ক প্রতীক হাজেলাৰ পাছতে ৰাষ্ট্ৰীয় নাগৰিকপঞ্জী উন্নীতকৰণৰ সমন্বয়কৰূপে আবেদনকাৰী দেৱ শৰ্মাই কাৰ্যভাৰ গ্ৰহণ কৰিছিল।
তেতিয়া তেওঁৰ চকুত বহু বিসংগতি ধৰা পৰিছিল। নাগৰিকত্ব সংশোধনী আইনৰ ধাৰা ছয় (এ)ৰ গোচৰৰ শুনানি সংবিধানপীঠত চলি থকাৰ সময়তে ৰাষ্ট্ৰীয় নাগৰিকপঞ্জীখন পুনৰীক্ষণ কৰিব লাগে বুলি এক আবেদন দাখিল কৰা হৈছিল।
জ্যেষ্ঠ অধিবক্তাগৰাকীয়ে কয় যে নাগৰিকত্ব সংশোধনী আইনৰ বৈধতাৰ ওপৰত আলোচনা হ’ল, কিন্তু এই বিষয়বোৰ থাকি গ’ল। নাগৰিকপঞ্জী পুনৰীক্ষণৰ আহ্বান জনাই দাখিল কৰা আবেদন সেই সময়ত উচ্চতম ন্যায়ালয়ে বিবেচনাই নকৰিলে।
শেহতীয়াকৈ প্রাক্তন সমন্বয়ক দেৱ শৰ্মাই নতুনকৈ আবেদন দাখিল কৰে আৰু আজি ন্যায়াধীশ পি এছ নৰসিংহ আৰু এ এছ ছন্দুকাৰৰ খণ্ডপীঠে এই আবেদন গ্রহণ কৰি ভাৰত চৰকাৰ আৰু অসম চৰকাৰৰ লগতে দেশৰ মহাপঞ্জীয়ক, এনআৰচিৰ সমন্বয়কলৈ জাননী জাৰি কৰিছে বুলি জ্যেষ্ঠ অধিবক্তাজনে সদৰী কৰে। লগতে তেওঁ এয়া খিলঞ্জীয়া মানুহৰ কাৰণে ভাল খবৰ বুলি উল্লেখ কৰি কয়, ‘যদি এনআৰচিখন পুনৰীক্ষণ হয়, আমি আশাবাদী যে কমেও ২০-৩০ লাখ মানুহৰ নাম ওলাব।’
প্রসংগত জ্যেষ্ঠ অধিবক্তা চৌধুৰীয়ে কয়, ‘২০১৮ৰ ২৭মার্চত উচ্চতম ন্যায়ালয়ে এটা নির্দেশনা দিছিল যে যিসমূহ নথিৰ পৰীক্ষা কৰিব পৰা নাই (বেক এণ্ড ভেৰিফিকেচন), সেইসমূহ ডিএমআইটি (নিৰীক্ষণৰ এটা প্ৰক্ৰিয়া)ত এই পৰীক্ষা কৰিব লাগে। পানকাৰ্ডকে ধৰি এনেকুৱা বহু নথি আছিল। ইতিমধ্যে বিত্ত মন্ত্রণালয়ে স্পষ্ট কৰিছিল যে এইখিনি নথি বৈধ আৰু এইখিনি অবৈধ। হাজেলাই অবৈধ বুলি কোৱা পানকার্ডসমূহ ডিএমআইটি কৰি অন্তৰ্ভুক্ত কৰি দিছিল। এই শিতানতে অতি কমেও ১৬ লাখ আছে। এনেবোৰ কাৰণতে গোচৰটো দাখিল কৰা হৈছে।’
তেওঁ কয় যে এই গোটেই প্রক্রিয়াটো উচ্চতম ন্যায়ালয়ৰ তত্ত্বাৱধানতে চলি আছিল আৰু তাৰ পাছতো আজি জাননী জাৰি কৰা বিষয়টো যথেষ্ট তাৎপর্যপূর্ণ। আবেদনকাৰী পক্ষৰ হৈ অধিবক্তা চৌধুৰীৰ উপৰি মনীষ গোস্বামী, ৰংগন চৌধুৰীয়ে যুক্তি দর্শায়।