Protest:✒️বিগত ১১ বছৰে ৰাজ্যৰ ছয় জনগোষ্ঠীৰ জনজাতিকৰণৰ স্বয়ং প্রধানমন্ত্রী নৰেন্দ্ৰ মোদীৰ প্রতিশ্রুতি ওলমি ৰোৱাৰ পৰিপ্ৰেক্ষিতত পুনৰ ৰাজ্য উত্তাল হ’বলৈ ধৰিছে। কেন্দ্ৰ-ৰাজ্যৰ বিজেপি নেতৃত্বাধীন চৰকাৰৰ এই প্ৰতাৰণাৰ বিৰুদ্ধে তাই আহোমকে ধৰি ছয় জনগোষ্ঠী আন্দোলনমুখী হোৱাৰ সময়তে ৰাজ্যৰ অন্যতম ভূমিপুত্ৰ মৰাণ জনগোষ্ঠীক জনজাতিকৰণ আৰু ষষ্ঠ অনুসূচীভুক্ত স্বায়ত্তশাসন প্রদানৰ দাবীত জনগোষ্ঠীটোৰ ছটাকৈ সংগঠনেও ধাৰাবাহিক আন্দোলনৰ কাৰ্যসূচী লৈছে।
উল্লেখ্য যে কেন্দ্রীয় গৃহমন্ত্রী অমিত শ্বাহৰ শেহতীয়া অসম ভ্ৰমণৰ সময়তে জনজাতিকৰণৰ দাবীত তীব্র প্রতিবাদী কাৰ্যসূচী ৰূপায়ণ কৰে তাই আহোম জনগোষ্ঠীয় সংগঠনে। আনকি কেন্দ্রীয় গৃহমন্ত্রীক মিছলীয়াও আখ্যা দিয়ে এই সংগঠনসমূহে।
পূৰ্বে ঘোষণা কৰা অনুসৰি মঙলবাৰে তালাপত মৰাণ জনগোষ্ঠীৰ ছয় সংগঠনে জোঁৰ সমদল কাৰ্যসূচী ৰূপায়ণ কৰে। লক্ষ্যণীয়ভাবে এই আন্দোলন ব্যর্থ কৰিবলৈ ড° হিমন্ত বিশ্ব শৰ্মাই কৰা চেষ্টা ব্যর্থ হোৱাৰ আভাস স্পষ্ট হৈছে। আনহাতে, এই আন্দোলনৰ কাৰ্যসূচীৰ সফল ৰূপায়ণ কৰিবলৈ বিগত সপ্তাহৰ পৰা গাঁৱে-ভূঞে, ঘৰে ঘৰে, চুবুৰীয়ে চুবুৰীয়ে মৰাণ জনগোষ্ঠী ৰাইজক সজাগ কৰিবলৈ কৰা প্ৰচেষ্টাৰ অন্তত মঙলবাৰে সন্ধিয়া তালাপত জোঁৰ সমদল উলিয়ায় সদৌ মৰাণ ছাত্ৰ সন্থাই।
জোঁৰ সমদলকাৰীসকলক বাধা দিবলৈ তিনিচুকীয়া জিলা প্রশাসনে পূৰ্বৰে পৰা বৃহৎ সংখ্যক নিৰাপত্তাৰক্ষী নিয়োজিত কৰি ৰাখে যদিও নিৰাপত্তাৰক্ষীৰ বেহু ভেদি সদৌ মৰাণ ছাত্ৰ সন্থাৰ নেতৃত্বত দুই সহস্রাধিক প্রতিবাদকাৰীয়ে তালাপ নগৰত উপস্থিত হৈ তালাপ নগৰৰ পৰা প্ৰায় ডেৰ কিলোমিটাৰ পৰ্যন্ত উলিওৱা জোঁৰ সমদলত অংশগ্ৰহণকাৰীসকলে ‘বিজেপি চৰকাৰ হুঁচিয়াৰ, মৰাণসকলক জনজাতিকৰণ কৰক, মুখ্যমন্ত্রী ড° হিমন্ত বিশ্ব শর্মা চৰকাৰ হায় হায়, জনজাতি পৰিক্ৰমা মন্ত্রী বাক থু, আজি মৰাণ জাগিছে, জাগিবই, সংগ্রাম চলিছে, চলিবই, সদৌ মৰাণ ছাত্র সস্থা জিন্দাবাদ, জনজাতিকৰণ ন্যায্য দাবী, নৰেন্দ্ৰ মোদী হায় হায়, অমিত শ্বাহ লেই লেই ছেই ছেই, ন’ এছটি ন’ বেষ্ট’ আদি শ্ল’গানৰে আকাশ-বতাহ কঁপাই তোলে।
জোঁৰ সমদল উলিওৱাৰ পূৰ্বে সমদলকাৰীসকলক উদ্দেশি সদৌ মৰাণ ছাত্ৰ সন্থাৰ সভাপতি পলিন্দ্র বড়া আৰু সাধাৰণ সম্পাদক জয়কান্ত মৰাণে কয় যে জনজাতিকৰণ মৰাণসকলৰ ন্যায্য দাবী। মৰাণ জনগোষ্ঠীয়ে জনজাতিকৰণ লাভ নকৰা পর্যন্ত ধাৰাবাহিক আন্দোলন চলাই নিয়া হ’ব। ‘
২৬ৰ বিধানসভা নিৰ্বাচনৰ পূৰ্বে মৰাণসকলক জনজাতিকৰণ প্ৰদান কৰি ন্যায্যতা দিব লাগিব কেন্দ্ৰীয় চৰকাৰে। অন্যথা আগন্তুক নির্বাচনত বিজেপিয়ে উচিত শিক্ষা পাব বুলি হুংকাৰ দিয়ে মৰাণ ছাত্র নেতাদ্বয়ে। আনহাতে, চাৰি ছেপ্টেম্বৰত কাকপথাৰ, ছয় ছেপ্টেম্বৰত মাৰ্ঘেৰিটা আৰু ১০ ছেপ্টেম্বৰত তিনিচুকীয়াত জোঁৰ সমদল কাৰ্যসূচী ৰূপায়ণ কৰা হ’ব।
আন্দোলনৰ ব্যৰ্থ কৰাৰ মুখ্যমন্ত্ৰীৰ চেষ্টা ব্যর্থ!
জনজাতিকৰণৰ দাবীত ধাৰাবাহিক আন্দোলন ৰোধ কৰিবলৈ চৰকাৰে চলোৱা চেষ্টা একপ্ৰকাৰ ব্যৰ্থ হৈছে। যোৱা নিশা মুখ্যমন্ত্রী ড° শৰ্মাৰ নিৰ্দেশত তিনিচুকীয়া জিলাৰ অভিভাৱক মন্ত্রী বিমল বড়াই তিনিচুকীয়াৰ কনভেন্সন চেণ্টাৰত জিলা আয়ুক্ত স্বপ্নীল পাল আৰু জ্যেষ্ঠ আৰক্ষী অধীক্ষক অভিজিৎ গৌৰৱৰ উপস্থিতিত সদৌ মৰাণ ছাত্ৰ সন্থাৰ নেতৃবৰ্গৰ স’তে এক আলোচনাত মিলিত হয়।
আলোচনাৰ সময়ত মৰাণসকলৰ জনজাতিকৰণৰ বিষয়টোক লৈ অহা ২৩ ছেপ্টেম্বৰত মুখ্যমন্ত্ৰীৰ স’তে সদৌ মৰাণ ছাত্ৰ সন্থাৰ নেতৃত্বৰ এক মুখামুখি আলোচনাৰ প্ৰস্তাৱ উত্থাপন কৰি মঙলবাৰে পৰা হ’বলগীয়া ধাৰাবাহিক আন্দোলন স্থগিত ৰাখিবলৈ আহ্বান জনায় মন্ত্রী বড়াই।
অভিভাৱক মন্ত্রী আৰু তিনিচুকীয়া জিলা প্রশাসনে দিয়া প্রস্তাৱত সদৌ মৰাণ ছাত্ৰ সন্থাৰ সভাপতি পলিন্দ্র বড়া আৰু সাধাৰণ সম্পাদক জয়কান্ত মৰাণে কয়, ‘জনজাতিকৰণৰ আন্দোলন স্থগিত কৰিব পৰা নহ’ব। গাঁৱে গাঁৱে ইতিমধ্যে সকলো মৰাণ ৰাইজক সজাগ কৰি আন্দোলনত অংশগ্রহণ কৰিবলৈ নেতৃত্বই জনোৱা আহ্বানক সমর্থন জনাই ৰাজপথত আন্দোলন কৰিবলৈ ঐক্যবদ্ধ হৈছে। ৰাইজক আন্দোলনৰ বাবে দিন-বাৰ চূড়ান্ত কৰি জনোৱা আহ্বানক সালসলনি বা আন্দোলন স্থগিত ৰাখিলে মৰাণ জনগোষ্ঠীৰ ৰাইজৰ ৰোষত দুয়োজন ছাত্র নেতা পৰিব বুলি স্পষ্ট কৰি দি ধাৰাবাহিক আন্দোলন চলাই নিয়া হ’ব বুলি সদৰী কৰে। ফলত চৰকাৰ-প্রশাসনৰ এই প্রচেষ্টা বিফল হয়।
