Punjub:বিগত ৩৭ বছৰত ইমান ভয়াৱহ বানপানী দেখা পোৱা নাই পঞ্জাৱত। ধাৰাবাহিকভাৱে হোৱা বৰষুণৰ বাবে পঞ্জাৱৰ বৃহৎ অঞ্চল পানীত ডুব গৈছে। হুৰা হুৰে বৃদ্ধি পাইছে মৃতকৰ সংখ্যা ।
গুৰুত্বৰ এই পৰিস্থিতিত পঞ্জাৱক ‘দুৰ্যোগ ৰাজ্য’ হিচাপে ঘোষণা কৰিছে আপ চৰকাৰে ।পৰিস্থিতি ইমানেই বেয়া যে উদ্ধাৰ অভিযানত সেনা, নৌসেনা আৰু বায়ুসেনাও নামিছে । ৰাষ্ট্ৰীয় দুৰ্যোগ সঁহাৰি বাহিনীৰ ২৩টা দলে ৰাজ্যত উদ্ধাৰ অভিযান চলাইছে।
চৰকাৰী প্রতিবেদন অনুসৰি পঞ্জাৱৰ ২৩খন জিলাৰ আটাইকেইখনেই বানত ক্ষতিগ্ৰস্ত হৈছে। ৩০ জন লোকৰ মৃত্যুৰ উপৰি ৩.৪৫ লাখ লোক বানত ক্ষতিগ্ৰস্ত হৈছে।
প্ৰায় ১৪০০ খন গাঁও পানীৰ তলত। ২০ হেজাৰ লোকক উদ্ধাৰ কৰাৰ উপৰিও পাঁচ হেজাৰ লোকক সাহায্য শিবিৰলৈ প্ৰেৰণ কৰা হৈছে।
চৰকাৰী প্ৰতিবেদন অনুসৰি পাঠানকোটত বানপানীৰ ফলত আটাইতকৈ বেছি ক্ষতিগ্ৰস্ত হৈছে।পাঠানকোটত ছজন লোকৰ মৃত্যু হোৱাৰ উপৰিও তিনিজন নিৰুদ্দেশ হৈছে। লুধিয়ানাত চাৰিজনৰ মৃত্যু।
এই পৰিস্থিতিৰ মাজতে পঞ্জাৱৰ বৃহৎ অঞ্চলত ধাৰাবাহিকভাৱে বৰষুণ অব্যাহত আছে।ক্ষয়-ক্ষতিৰ ক্ষেত্ৰত গুৰদাসপুৰ জিলাই শীৰ্ষস্থান দখল কৰিছে, এই পৰ্যন্তত ইয়াত ৩২৪খন গাঁও ডুব গৈছে, তাৰ পাছতে আছে অমৃতসৰ (১৩৫খন গাঁও) আৰু হোছিয়াৰপুৰ (১১৯খন গাঁও)।
আন আক্ৰান্ত জিলাসমূহৰ ভিতৰত বৰ্ণালা, বাথিণ্ডা, ফিৰোজপুৰ, পাটিয়ালা, এছ এ এছ নগৰ, সংগ্ৰুৰ, তৰ্ণ তৰণ আৰু ফাজিলকা। বানত ১.৪৮ লাখ হেক্টৰৰো অধিক শস্য ধ্বংস হোৱাৰ লগতে প্ৰায় ৩.৭৫ লাখ হেক্টৰ কৃষিভূমি ডুব গৈছে।
এই পৰিস্থিতিৰ স’তে মোকাবিলা কৰিবলৈ মাননে কেন্দ্ৰলৈ পত্ৰ লিখি ৬০ হেজাৰ কোটি টকাৰ সাহায্য বিচাৰিছে। পৰ্যাপ্ত সংখ্যক এনডিআৰএফ বাহিনী আৰু সেনা শিবিৰ মোতায়েন কৰি সাহায্য আৰু উদ্ধাৰ অভিযানত কোনো ধৰণৰ ত্ৰুটি নাথাকিব বুলি গৃহমন্ত্ৰী অমিত শ্বাহে মানক আশ্বাস দিছে।
সেই অনুসৰি উদ্ধাৰ অভিযানৰ বাবে সেনা, নৌসেনা আৰু বায়ুসেনাৰ ১২টা দল নিয়োগ কৰা হৈছে, আৰু আঠটা দল ষ্টেণ্ডবাইত আছে।
উদ্ধাৰ অভিযানৰ বাবে প্ৰায় ৩০-৩৫খন হেলিকপ্টাৰ, ১১৪খন নাও আৰু এখন ৰাজ্যিক হেলিকপ্টাৰো নিয়োগ কৰা হৈছে। বিএছএফ আৰু এছডিআৰএফকো মোতায়েন কৰা হৈছে।
ধাৰাবাহিকভাৱে হোৱা বৰষুণৰ বাবে হিমাচল প্ৰদেশৰ অৱস্থা ভয়াৱহ। আকস্মিক বানপানী আৰু ভূমিস্খলনৰ ফলত মৃত্যু হোৱা লোকৰ সংখ্যা দ্ৰুতগতিত বৃদ্ধি পাইছে।
ভয়ংকৰ প্ৰাকৃতিক দুৰ্যোগৰ বাবেই মুখ্যমন্ত্ৰী সুখৱিন্দৰ সিং চুখুৱে হিমাচলক ‘দুৰ্যোগ আক্ৰান্ত ৰাজ্য’ হিচাপে ঘোষণা কৰিছে।
বাৰিষা আৰম্ভ হোৱাৰ পৰা অৰ্থাৎ ২০ জুনৰ পৰা হিমাচলত ৩২০ জন লোকৰ মৃত্যু হৈছে। হিমাচল প্ৰদেশ, জম্মু-কাশ্মীৰ, উত্তৰাখণ্ডৰ বান পৰিস্থিতি ভয়াৱহ।
