Preparations for the Durga Puja:
ইতিমধ্যে ৰাজ্যৰ লগতে তেজপুৰ তথা শোণিতপুৰৰ খনিকৰসকল পূর্ণোদ্যমে ব্যস্ত হৈ পৰিছে বিশ্বকর্মা আৰু দশভূজা দুর্গা প্রতিমা নিৰ্মাণৰ কামত। পূর্বে বিশ্বকর্মা পূজাৰ পৰা আৰম্ভ হোৱা দুর্গোৎসৱৰ পৰিৱেশ আজিকালি আগতীয়াকৈ আৰম্ভ হয় গণেশ চতুর্থীৰ পৰাই। তেজপুৰত বৰ্তমান গণেশ পূজাৰ সংখ্যা বাঢ়ি অহাৰ বাবেই মৃন্ময় প্রতিমা নিৰ্মাণ কৰা খনিকৰসকলৰ ব্যস্ততাৰো বৃদ্ধি পায় আগতীয়াকৈ। এনে অৱস্থাত বিশ্বকর্মা পূজালৈ মাজত মাত্র এটা সপ্তাহো বাকী নথকাৰ উপৰি শাৰদীয় দুর্গা পূজালৈ মাজত আছে মাত্র এটা পষেক। এনে অৱস্থাত তেজপুৰ, ঢেকিয়াজুলি, বিহগুৰি, বিন্দুকুৰি, খেলমাটি, বালিপৰা আদি সকলোতে খনিকৰসকলে বিশ্বকর্মা প্রতিমাৰ সমানে নির্মাণ কৰিছে দুৰ্গাৰ মৃন্ময় মূর্তি। একেদৰে ৰাজহুৱা দুর্গা পূজা সমিতিসমূহৰ বহুসংখ্যকৰেই মণ্ডপ নিৰ্মাণৰ কামো আৰম্ভ হৈছে।
এনে পৰিৱেশৰ মাজতে আগন্তুক দুর্গা পূজা আৰু কালী পূজা শান্তিপূর্ণভাবে উদ্যাপনৰ পৰিপ্ৰেক্ষিতত সাজু হৈছে শোণিতপুৰ প্রশাসন। ইতিমধ্যে আয়ুক্ত আনন্দ কুমাৰ দাসৰ অধ্যক্ষতাত জিলা আয়ুক্ত কাৰ্যালয়ৰ দুই নম্বৰ সভা কক্ষত এখন প্রস্তুতিমূলক সভাও অনুষ্ঠিত হৈ গৈছে। উল্লেখ্য যে, আগন্তুক দুর্গা পূজা উদ্যাপন আৰু অন্যান্য পূজা উৎসব উদ্যাপন যাতে শান্তিপূর্ণভাবে হয় তাৰ বাবে আহ্বান জনোৱাৰ লগতে পূৰ্বৰ দৰেই শোণিতপুৰ জিলা প্রশাসনে শ্রেষ্ঠ পূজা সমিতিসমূহক প্রথম, দ্বিতীয় আৰু তৃতীয় স্থানেৰে পুৰস্কৃত কৰিব আৰু লগতে সকলো সমজিলা আয়ুক্তসকলক নিজ নিজ সমজিলাত একেধৰণৰ পদক্ষেপ গ্রহণ কৰিবলৈ আহ্বান জনায়।
তদুপৰি তেওঁ মূর্তি বিসৰ্জনৰ সময়ত অনুশাসনৰ দ্বাৰা দুর্ঘটনামুক্ত কৰাৰ সকলো ব্যৱস্থা গ্রহণত গুৰুত্ব দিয়া হৈছে। আনহাতে, পূজা সমিতিসমূহৰ দ্বাৰা সংশ্লিষ্ট বিভাগৰ পৰা প্ৰয়োজনীয় আপত্তিবিহীন প্রমাণপত্রসহ অনুমতিৰ বাবে আবেদন সম্পর্কীয় বিষয়সমূহ, পূজা মণ্ডপৰ উপযুক্ততা, বিদ্যুৎ সংযোগৰ উপযুক্ততা, পৰিবেশ অনুকুলে উদ্যাপন সম্পর্কত প্রদূষণ নিয়ন্ত্রণ ব’ৰ্ডৰ নিৰ্দেশনা মানি চলাৰ বাবে আহ্বান জনোৱা হৈছে। পূজা সমিতিসমূহে অহা ১৮ ছেপ্টেম্বৰ বা তাৰ পূৰ্বে শোণিতপুৰ জিলাৰ জ্যেষ্ঠ আৰক্ষী অধীক্ষকৰ পৰা এন অ’ চিৰ বাবে আবদন কৰিব লাগিব।
আৰক্ষীৰ পৰা এন’ চি লাভ কৰাৰ পাছত ২৩ ছেপ্টেম্বৰৰ ভিতৰত জিলা আয়ুক্ত বা নিজ নিজ সমজিলা আয়ুক্তৰ কাৰ্যালয়ৰ পৰা এন অ’ চিৰ বাবে আবেদন কৰিব লাগিব। প্রশাসনে পূজা মণ্ডপসমূহত স্বচ্ছতা বজাই ৰাখি আগন্তুক পূজা উদ্যাপনৰ সন্দৰ্ভত গুৰুত্ব আৰোপ কৰে আৰু জিলা প্ৰশাসনৰ বিশদ নির্দেশনাসমূহ মানি চলিবলৈ সমিতিসমূহক আহ্বান জনায়। উল্লেখ্য যে পূজা মণ্ডপত চিচিটিভি বাধ্যতামূলকভাৱে স্থাপন কৰা, অগ্নিনির্বাপক সেৱা, এম্বুলেন্স, আৰক্ষী আৰু নিয়ন্ত্রণ কক্ষৰ দৰে স্থানীয় জৰুৰীকালীন নম্বৰ প্ৰদৰ্শন, নৈশ ৰক্ষীৰ ব্যৱস্থা, স্বেচ্ছাসেৱকক নিয়োগ কৰা, যান-বাহন ব্যৱস্থাপনা, বিসর্জনস্থলীৰ পথৰ কাষৰ গছৰ শাখাবোৰ ট্রিমিং কৰা, বিপজ্জনক বিদ্যুৎ লাইন পৰীক্ষা কৰিবলৈ কোৱাৰ লগতে পুৱা আঠ বজাৰ পূৰ্বে আৰু নিশা ১০ বজাৰ পাছত লাউডস্পীকাৰ ব্যৱহাৰ কৰাৰ পৰা বিৰত থাকিবলৈ আৰু সুৰক্ষাৰ স্বাৰ্থত বিসৰ্জনৰ সময়ত সৰু ল’ৰা-ছোৱালী যাতে সমরেশত উপস্থিত নাথাকে তাৰ বাবে দৃষ্টি ৰাখিবলৈও সমিতিসমূহক আহ্বান জনোৱা হৈছে।