Gaurav Gogoi:✒️লোকসভাৰ বিৰোধী উপ-দলপতি তথা প্রদেশ কংগ্ৰেছৰ সভাপতি গৌৰৱ গগৈৰ ‘পাকিস্তান সংযোগ’ৰ অভিযোগৰ সন্দৰ্ভত ৰাজ্য চৰকাৰে গঠন কৰি দিয়া বিশেষ তদন্তকাৰী গোটে (এছআইটি) যোৱা ১০ ছেপ্টেম্বৰত মুখ্যমন্ত্ৰীৰ হাতত তদন্ত প্রতিবেদন দাখিল কৰাৰ পাছতে এই বিষয়ত প্রথমবাৰলৈ মুখ খুলিছে কংগ্ৰেছৰ সাংসদজনে।
দেওবাৰে দিল্লীত সংবাদ মাধ্যমৰ আগত সাংসদ গগৈয়ে কয় যে এছআইটিয়ে এবাৰো তেওঁক সোধপোছ কৰা নাছিল। অৱশ্যে তেওঁৰ পত্নী এলিজাবেথ কলবার্ণক দুদিন এছআইটিয়ে জেৰা কৰা বুলি তেওঁ সদৰী কৰে।
প্ৰদেশ কংগ্ৰেছৰ সভাপতিজনে কয়, ‘এছআইটি মোৰ ওচৰলৈ অহা নাছিল, মোৰ পৰিবাৰৰ ওচৰলৈ আহিছিল। দুদিন বিভিন্ন কথা সুধিছিল। সেয়ে ময়ো বাট চাই আছো এছআইটিৰ প্রতিবেদন পঢ়িবলৈ যে কি কাহিনী বনালে, কি কথা পালে।’
লগতে পাকিস্তান ভ্ৰমণৰ সন্দৰ্ভত সাংসদজনে কয়, ‘মুখ্যমন্ত্রী ড° হিমন্ত বিশ্ব শৰ্মাৰ লগতে বিজেপিৰ নেতাসকলে বিভিন্ন সময়ত কৈ আহিছে যে মই ১৫ বাৰ পাকিস্তানলৈ গৈছো। মই জনাত মই এবাৰহে পাকিস্তানলৈ গৈছিলো, তাকো ১১ বছৰ আগত। তেন্তে বাকী ১৪ বাৰ পাকিস্তানলৈ কোন গ’ল?’ তেওঁৰো কোনোবা বডী ডাবল এইবাৰ ওলাল নেকি বুলি প্রশ্ন কৰি সাংসদজনে পুনৰ কয়, ‘মোৰো কোনোবা বডী ডাবল ওলাল নেকি?
মুখ্যমন্ত্রী হিমন্ত বিশ্ব শর্মাই যিদৰে ৰাহুল গান্ধীৰ বডী ডাবল দেখা পাইছিল, মোৰো বডী ডাবল ওলাইছে নেকি, যিয়ে মোৰ নাম-পৰিচয় লৈ পাকিস্তানলৈ ১৪বাৰ গ’ল। সেয়ে ময়ো বিচাৰো যে এছআইটিৰ প্ৰতিবেদন ৰাজহুৱা হওক, এই ১৪ বাৰ পাকিস্তানলৈ যোৱা মানুহজনৰ আধাৰকাৰ্ড, পাৰ্ছপ’ৰ্ট সকলো ৰাজহুৱা কৰি দিয়ক। প্রয়োজন হ’লে এই বডী ডাবলৰ ওপৰত মইহে গোচৰ তৰিম।’
লোকসভাৰ বিৰোধী উপ-দলপতিজনে পুনৰ কয়, ‘মুখ্যমন্ত্রী ভয়াতুৰ, ফ্লপ শ্ব’ ৰাইজক নেদেখালে; সেয়েহে এছআইটিৰ প্ৰতিবেদন গোপন কৰি ৰাখিছে। গম পাইছে যে ৰাইজে ফ্লপ বেটিং দিব। যিয়ে নহওক মই বিচাৰো যে ফ্লপ হ’লেও এই প্রতিবেদন ৰাইজে চাব লাগে। সেয়েহে এছআইটিৰ প্ৰতিবেদন ৰাজহুৱা কৰক। কোনোবা এটা ৱেবছাইটত আপলোড কৰি দিয়ক, পঢ়ি ৰাইজে সিদ্ধান্ত ল’ব।’ লগতে তেওঁৰ শেহতীয়া বিহু নাচৰ সন্দৰ্ভত মুখ্যমন্ত্ৰীয়ে কৰা মন্তব্যৰ প্রতিক্রিয়া প্রকাশ কৰি কয়, ‘মুখ্যমন্ত্ৰীয়ে নাচি ভাল পায়, ময়ো নাচি ভাল পাওঁ, কিয়নো আপত্তি? তেওঁ নাচি থাকক মোৰ আপত্তি নাই, মোৰ নাচ চাই তেওঁৰ আপত্তি হ’ব নালাগে।’
বিজ্ঞাপনৰ ধনৰ লোভতে ভাৰতীয় দলটোক পাকিস্তানৰ বিৰুদ্ধে খেলিবলৈ দিয়া হৈছে
ইফালে, এছিয়া কাপত ভাৰত আৰু পাকিস্তানৰ মাজত মেচ অনুষ্ঠিত হোৱাক লৈ প্রতিক্রিয়া প্রকাশ কৰি প্ৰদেশ কংগ্রেছ সভাপতি গগৈয়ে কয় যে বিজ্ঞাপনৰ ধনৰ লোভতে ভাৰতীয় দলটোক আজি পাকিস্তানৰ বিৰুদ্ধে খেলিবলৈ দিয়া হৈছে। পাকিস্তানৰ বিৰুদ্ধে খেলিবলৈ সন্মত হোৱা সিদ্ধান্তক গৰিহণা দি তেওঁ কয়, ‘আইচিচি আজি ভাৰতৰ দখলত আছে। বিচিচিআই আছেই। যদি আন্তঃৰাষ্ট্ৰীয় এখন প্রতিযোগিতাৰ পৰা আমি পাকিস্তানক বাহিৰত ৰাখিব নোৱাৰো তেন্তে মোদী ডাঙৰীয়া বিশ্বগুৰু হোৱাৰ অৰ্থটো কি হ’ল?’
পূর্বে বিভিন্ন সময়ত ভাৰতে পাকিস্তানৰ বিৰুদ্ধে থকা মেচবৰ্জন কৰিছে বুলি উল্লেখ কৰি এইবাৰ কিয় তেনে কৰিব পৰা নাই বুলিও প্রশ্ন কৰে গগৈয়ে। একমাত্র বিজ্ঞাপনৰ ধনৰ লোভতে বিজেপি চৰকাৰ আৰু বিচিচিআয়ে পহলগামৰ ছহিদক অপমান কৰিছে বুলি লোকসভাৰ বিৰোধী উপ-দলপতিজনে অভিযোগ কৰে। ইয়াৰ বাবে বিজেপি চৰকাৰে ছহিদ পৰিয়ালৰ সদস্যসকলৰ ওচৰত ক্ষমা বিচাৰিবলৈ তেওঁ দাবী জনায়।