Zubeen Garg:✒️’তেওঁ মোক বৰদেউতা বুলি সম্বোধন কৰিছিল। মোক কৈছিল আপুনি আৰু বহুদিন জীয়াই থাকিব লাগিব, মই জীয়াই থাকিলো। মোৰ এতিয়া ৮২ বছৰ হ’ল। কিন্তু মোক ভাল হৈ থাকিবলৈ কৈ তেওঁ নিজেই গ’লগৈ অ বোপাই। বৰ দুখ পালো। ‘কৃষ্ণ কৃষ্ণ।’
ধুমুহাৰ স’তে নচা জুবিন হৈ পৰিছে তেজপুৰৰ পিঠাখোৱা গাৰ্গক হেৰুৱাই এইদৰে বেদনাহত নিৱাসী ঢোল ওজা অনিৰাম নাথ। অশীতিকৰ এইজন ৰাজ্য চৰকাৰৰ শিল্পী পেন্সপ্রাপক নাথক ২০১৯৩ তেজপুৰত কণ্ঠশিল্পী জুবিন গাৰ্গৰ নেতৃত্বত আয়োজিত কলাগুৰু বিষ্ণুপ্ৰসাদ ৰাভা সংগীত মহোৎসৱত কলাগুৰু বঁটা প্ৰদান কৰা হৈছিল। এজন গ্রাম্য শিল্পী, কৃষকৰূপে সমগ্ৰ জীৱনটো ঢোলটোকে কঢ়িয়াই লৈ ফুৰা শিল্পী নাথক শোণিতপুৰ জাৰ্ণেলিষ্ট ইউনিয়নে প্ৰণৱ সিং বঁটা আগবঢ়োৱাৰ পাছত জুবিন গাৰ্গৰ নেতৃত্বত গঢ় লৈ উঠা কলাগুৰু আর্টিস্ট ফাউণ্ডেছনৰ উদ্যোগত তেজপুৰৰ হজৰাপাৰত ২০১৯ৰ ২১ আৰু ২২ জানুৱাৰীত আয়োজিত কলাগুৰু সংগীত মহোৎসৱত ঢোলৰ ওজা নাথলৈ এই বঁটা আগবঢ়োৱা হৈছিল।
উল্লেখ্য যে নগাঁও আৰু বৰপেটাৰ পাছত তেজপুৰত আয়োজিত এই অনুষ্ঠানৰ পূৰ্বে ২০১৮ৰ ১১ ডিচেম্বৰত জুবিন গাৰ্গৰ পত্নী গৰিমা গাৰ্গসহ এই সংগীত মহোৎসৱত জড়িত বিষয়ববীয়াসকলে নাথক সেই বৰ্ষৰ বঁটা আগবঢ়োৱাৰ কথা ঘোষণা কৰে। ইয়াৰ পূর্বে গৰিমা গাৰ্গ আৰু আয়োজিক সমিতিৰ বিষয়ববীয়াসহ জুবিন গাৰ্গৰ আন এজন সুহৃদ শিল্পী পংকজ বৰদলৈৰ উপস্থিতিত শোণিতপুৰ জার্নেলিষ্ট ইউনিয়নত উপস্থিত হৈ এই বঁটাৰ বাবে উপযুক্ত এজন গ্রাম্য শিল্পীৰ সন্ধান কৰিছিল।
শোণিতপুৰ জার্নেলিষ্ট ইউনিয়নৰ সদস্য তথা বিষয়ববীয়াসকলে জনোৱা অনুসৰিয়ে গৰিমা গাৰ্গসহ আয়োজক সমিতিৰ বিষয়ববীয়াসকলে চহা শিল্পী নাথৰ পিঠাখোৱাৰ ঐতিহ্যমণ্ডিত বৰনামঘৰৰ কাষৰ পঁজাত উপস্থিত হৈ ওজাজনক লগ পাই কলাগুৰু বঁটাৰ বাবে এজন উপযুক্ত শিল্পী বুলি নিশ্চিত হয়।
ইয়াৰ পাছতে কঠোৰ পৰিশ্ৰমী কৃষক শিল্পীজনক লগ পাই জুবিন গার্গে। বঁটা আগবঢ়াই দিয়াৰ সময়ত সাবটি ধৰি ওজা নাথক আৰু বহুদিন জীয়াই থাকিব লাগিব বুলি কোৱা আৰু পাছত তেওঁৰ বাসগৃহলৈ যোৱাৰ স্মৃতি স্মৰণ কৰি নাথে কয়, ‘অনবৰতে ফুৰ্তিত থকা ল’ৰাটো এনেকে গুচি গ’ল খবৰটো পোৱাৰ পৰাই মনতো বৰ অশান্ত হৈ পৰিছিল। মোৰ পুত্ৰসম আছিল জুবিন গাৰ্গ। ঘৰত মই তেওঁৰ কথা উলিয়াই থাকো। আজি বৰনামঘৰৰ সন্মুখলৈ ওলাই গৈছিলো, কিন্তু তাতো জুবিন গাৰ্গৰ কথা ওলাল। মনতো গধুৰ হৈ পৰাত ঘৰলৈ উভতি আহিলো।’
ক্ষন্তেক তভকমাৰি অশ্রুসিক্ত দুচকুৰে তেওঁ পুনৰ ক’লে,’মোৰ লগত ফটো উঠিছিল বোৱাৰীৰ লগতো উঠিছিল। তেওঁৰ পৰিবাৰেও ফটো উঠিছিল বোৱাৰী আৰু মোৰ লগত। বৰ মৰমিয়াল। ল’ৰাটো জীয়াই থাকিব লাগিছিল। এনেদৰে গুচি যাব নালাগিছিল। কিন্তু কি কৰিম গুচিয়েই গ’ল। বহু কথা পাতিছিলো। মোৰ শৰীৰ এতিয়া থৰকবৰক। বহু কথা পাহৰিলো।’
কঠোৰ পৰিশ্ৰমী জীৱনৰ বিয়লিবেলাত পূর্বতকৈ শীর্ণকায় হৈ পৰা চহা শিল্পীজনে আকৌ ক’লে, ‘১৯৯৬৩ বিষ্ণুপ্ৰসাদ ৰাভাৰ আশীর্বাদ পাইছিলো, তাৰ পাছদিনা মই গহপুৰ ওলাইছিলো গৈ গুৰু মহেন্দ্র শইকীয়াৰ ঘৰ। তেওঁৰ তত্ত্বাৱধানত ঢোলৰ ২৪টা ছেও শিকিলো। ভূপেন হাজৰিকাকো পালো, শেষত জুবিন গাৰ্গকো পালো। এতিয়া তেওঁ য’ত আছে তাতে ভালে থাকক। তাত তেওঁৰ ভাল হ’ব। ভগৱানক প্ৰাৰ্থনা জনাইছো। মোক তেওঁ স্টেজত বহুৱাই ৰাখিছিল।’ মায়াবী যাদুকৰ কণ্ঠশিল্পী জুবিন গার্গে আগবঢ়োৱা বঁটা, জাপি আৰু ৫১ হেজাৰ টকাৰ চেকখন সজাই থোৱা স্থানৰ পৰা আনি কান্ধত লৈ থকা গামোচাখনৰে আলফুলে মচি দিলে অশীতিপৰ শিল্পীজনে।
উল্লেখ্য যে এই সন্মান লাভৰ পাছতে ২০২২ত নাথে ৰাজ্য চৰকাৰৰ শিল্পী পেন্সন লাভ কৰে। আনহাতে, ২০২৩ত নলবাৰী জিলা ছাত্ৰ সন্থা আৰু নলবাৰী জিলা উন্নতি সভাই মোহন ভাইৰা স্মাৰক বঁটা আগবঢ়ায়। উল্লেখ্য যে এনে বহুজন মাটিৰ মানুহ আৰু নির্ভেজল শিল্পীৰ স’তে আছিল জুবিন গাৰ্গৰ সম্বন্ধ। সেয়ে বিহগুৰি, পিঠাখোৱাৰ প্ৰতিটো অঞ্চলত এতিয়া জুবিন গাৰ্গৰ অৱৰ্তমানত সকলোৰে হৃদয় ৰিক্ত হৈ পৰিছে। কিশোৰ একোজনেও নিজৰ ঘৰৰ চোতালত জুবিন গাৰ্গৰ বাঁহীৰ সুৰত তুলিছে সুৰ। কোনেও যেন ছিঙিব পৰা নাই শিল্পীজনৰ মায়াৰ শিকলি।