দৈনিক অগ্ৰদূত ডিজিটেল ডেস্ক : জুবিন গাৰ্গক কি কাৰণত, কি ধৰণে আৰু কি পৰিৱেশত হত্যাকৰা হ’ল তাৰ সঠিক তদন্ত আজিও সাঁথৰ হৈ থাকিল । শনিবাৰে জনতাৰ প্ৰাণৰ শিল্পী জুবিন গাৰ্গৰ প্ৰথম মৃত্যুবার্ষিকীত এনেদৰে প্ৰচণ্ড ক্ষোভ প্রকাশ কৰে অসম জাতীয়তাবাদী যুৱ-ছাত্র পৰিষদৰ সাধাৰণ সম্পাদক বিজন বায়নে।
কালি পৰিষদে ইয়াত জুবিন গাৰ্গৰ পূৰ্ণাংগ প্রতিমূৰ্তিৰ আধাৰশিলা স্থাপন কৰে। এই অনুষ্ঠানত বক্তব্য আগবঢ়াই পৰিষদৰ সাধাৰণ সম্পাদক বায়নে কয়, ‘যিখিনি সময়ত আমি জুবিনৰ মৃত্যু ৰহস্যজনক বুলি কৈছিলো সেই সময়ত মুখ্যমন্ত্রীয়ে জুবিন গাৰ্গক হত্যা কৰা বুলি কৈছিল; কিন্তু জুবিন গাৰ্গক কি ধৰণে, কি পৰিৱেশত আৰু কি কাৰণত হত্যা কৰা হ’ল তাৰ চৰকাৰীভাৱে সঠিক তদন্ত আজিও সাঁথৰ হৈ থাকিল। গতিকে আমি এটা বছৰ অতিক্ৰম কৰিলো। এই এটা বছৰত জুবিন গাৰ্গ সন্দৰ্ভত বহুখিনি কথা আধৰুৱা হৈ থাকিল।’
ৰাজ্য চৰকাৰক সমালোচনাৰে থকাসৰকা কৰি বায়নে পুনৰ কয়, ‘বিগত বৰ্ষৰ ১৯ ছেপ্টেম্বৰৰ দিনটো অসমীয়া জাতিৰ বাবে, অসমৰ সাংস্কৃতিক ক্ষেত্ৰৰ বাবে এটা কালিকা লগা দিন। অসমীয়াৰ হার্টথ্র’ব জুবিন গাৰ্গৰ মৃত্যু ৰহস্যজনক। তেওঁৰ মৃত্যুৰ বাবে আমি অসম জাতীয়তাবাদী যুৱ-ছাত্র পৰিষদৰ লগতে ৰাজ্যৰ সকলো জাতীয়-জনগোষ্ঠীয় সংগঠনে অসম চৰকাৰ আৰু কেন্দ্ৰীয় চৰকাৰৰ ওচৰত দাবী উত্থাপন কৰিছিলো যে প্ৰাণৰ শিল্পীগৰাকীৰ মৃত্যুৰ ৰহস্য উদ্ঘাটন কৰিব লাগে আৰু এই ক্ষেত্ৰত এক উচ্চ পৰ্যায়ৰ তদন্ত হ’ব লাগে। পৰৱৰ্তী পৰ্যায়ত জুবিন গাৰ্গৰ মৃত্যুৰ লগত জড়িত কে’বাজনো ব্যক্তি আটক কৰা হ’ল; কিন্তু তেওঁক কি কাৰণত, কি পৰিৱেশত আৰু কি কাৰণে হত্যা কৰা হ’ল সেয়া ৰহস্যৰ আৱৰ্ততে আছে।’
জুবিন গাৰ্গৰ হত্যাৰ প্ৰকৃত ৰহস্য শীঘ্ৰে চৰকাৰে উদ্ঘাটন কৰিব লাগিব বুলিও তেওঁ সতর্ক কৰি দিয়ে। তেওঁ লগতে কয়, ‘জুবিনৰ হত্যাকাৰীক উচিত শাস্তি দিব লাগিব। জুবিনৰ সমাধিক্ষেত্ৰৰ নিৰ্মাণ কাৰ্য শীঘ্ৰে সম্পূৰ্ণ কৰিব লাগিব। এইবোৰ কথা যাতে পুনৰ আলোচনা কৰিবলগীয়া নহয় তাৰ বাবে চৰকাৰে সঠিক পদক্ষেপ গ্রহণ কৰক।’
আনহাতে, যুৱ-ছাত্ৰ পৰিষদৰ সাধাৰণ সম্পাদকজনে সোণাপুৰ জুবিনক্ষেত্ৰ নিৰ্মাণ কাৰ্য চৰকাৰে সম্পূৰ্ণ নকৰাক লৈয়ো ক্ষোভ প্রকাশ কৰে। তেওঁ কয়, ‘জুবিন গাৰ্গৰ সোণাপুৰৰ সমাধিক্ষেত্ৰৰ নিৰ্মাণ কাৰ্য আজিও চৰকাৰে সম্পূৰ্ণ নকৰিলে। চৰকাৰে দ্বিতীয় সমাধিক্ষেত্ৰ যোৰহাটত নিৰ্মাণ কৰাৰ কথা ঘোষণা কৰিছিল যদিও আজিও কাম আৰম্ভ নকৰিলে। ইমান ডাঙৰ এখন চৰকাৰে এবছৰতো জুবিন গাৰ্গৰ সমাধিক্ষেত্ৰৰ নিৰ্মাণ কাৰ্যৰ পূৰ্ণাংগ ৰূপ দিব নোৱাৰি আধৰুৱা কৰি ৰখা এনেকুৱা এখন চৰকাৰ পোৱাটো অসমীয়া জাতিৰ বাবে দুর্ভাগ্যজনক কথা।’
জুবিনলৈ শ্রদ্ধাঞ্জলি জনাই তেওঁ আৰু কয়, ‘জুবিন গাৰ্গ এটা নাম নহয়। জুবিন গাৰ্গ হৈছে অসম আৰু অসমীয়াৰ বুকুত অনুৰণিত হৈ থকা এক অনুভৱ, এক সুৰ, এক অম্লান সত্তা। জুবিন গাৰ্গৰ সোঁৱৰণ কৰাৰ অন্ত নাই। তেওঁ অসম আৰু অসমীয়াৰ হৃদয়ত চিৰদিন জ্বলি থকা এক অমৰ দীপশিখা। জুবিন গাৰ্গৰ সৃষ্টিৰাজিক অসমৰ প্ৰতিটো প্ৰজন্মৰ মাজত অমৰ কৰি জীয়াই ৰাখিবলৈ বিচাৰিছো। সেয়েহে আজি সৰুপেটাৰ মাজমজিয়াত বিদ্যামন্দিৰ হাইস্কুল প্রাংগণত অসম জাতীয়তাবাদী যুৱ-ছাত্ৰ পৰিষদৰ উদ্যোগত প্ৰথমটো জুবিন গাৰ্গৰ পূৰ্ণাংগ প্রতিমূৰ্তিৰ নিৰ্মাণ কাৰ্যৰ আধাৰশিলা স্থাপন কৰা হ’ল।’ ৰাজ্যৰ বিভিন্ন প্ৰান্তত পৰিষদৰ উদ্যোগত শিল্পীজনৰ পূর্ণাংগ আৰু আৱক্ষ মূর্তি নির্মাণ কৰা হ’ব বুলিও বায়নে ঘোষণা কৰে।
শনিবাৰে দিনৰ ১১ বজাত সৰুপেটা বিদ্যামন্দিৰ হাইস্কুল প্রাংগণত জুবিন গাৰ্গৰ পূৰ্ণাংগ প্রতিমূৰ্তিৰ নিৰ্মাণ কাৰ্যৰ আধাৰশিলা স্থাপন কৰে অসম জাতীয়তাবাদী যুৱ-ছাত্ৰ পৰিষদৰ কেন্দ্ৰীয় সাধাৰণ সম্পাদক বিজন বায়নে। লগতে জুবিন গাৰ্গৰ প্ৰতিচ্ছবিত ৰাজহুৱা শ্রদ্ধাঞ্জলি নিবেদন কৰা হয়।
এই উদ্দেশ্যে যুৱ নেতা নিপল ডেকা, যুৱ-ছাত্ৰ পৰিষদৰ সৰুপেটা আঞ্চলিক সমিতিৰ সভাপতি অভিজিৎ তালুকদাৰ আৰু সাধাৰণ সম্পাদক দীপক দাসৰ পৰিচালনাত অনুষ্ঠিত সভাত সন্মানীয় অতিথিৰূপে প্রাক্তন বিধায়ক ড° মনোৰঞ্জন দাস, সৰুপেটাৰ ৰাজহ চক্ৰ বিষয়া পৰিণীতা চক্রবর্তী, সৰুপেটা বিদ্যামন্দিৰ হাইস্কুলৰ প্ৰধান শিক্ষক জয়ন্ত দাস আদিয়ে অংশগ্রহণ কৰে। সভাত সমূহীয়াভাৱে জুবিন গাৰ্গৰ অমৰ সৃষ্টি ‘মায়াবিনী ৰাতিৰ বুকুত’ গীতটো পৰিবেশন কৰা হয়।
আনহাতে, জাতীয়তাবাদী যুৱ-ছাত্ৰ পৰিষদৰ ভৱানীপুৰ আঞ্চলিক সমিতিয়ে আজি ভৱানীপুৰ উচ্চতৰ মাধ্যমিক বিদ্যালয়ৰ বাকৰিত জুবিন দিৱস উদ্যাপন কৰে। এই উপলক্ষে শিল্পীজনৰ প্ৰতিচ্ছবিত শ্রদ্ধাঞ্জলি নিবেদন, আয়তীৰ নাম-কীর্তন, জুবিন গাৰ্গৰ গীতৰ পৰিবেশন, সমূহীয়া বস্তি প্রজ্বলন আদি কার্যসূচী ৰূপায়ণ কৰা হয়। লগতে ভৱানীপুৰ উচ্চতৰ মাধ্যমিক বিদ্যালয়ৰ বাকৰিত যুৱ-ছাত্ৰ পৰিষদৰ ভবানীপুৰ আঞ্চলিক সমিতিৰ উদ্যোগত জুবিনৰ এটা আৱক্ষ মূর্তি স্থাপনৰ বাবে ভূমি আনুষ্ঠানিকভাৱে মুকলি কৰা হয়।
কালি ভৱানীপুৰত শাখা লেখিকা সমাৰোহ সমিতিৰ উদ্যোগতো জুবিন দিৱস পালন কৰা হয়। সৰুপেটাৰ হাজিৰঘাটত জেদ জি ৰক্তদান বজালী গ্ৰুপৰ উদ্যোগত সৰুপেটাৰ ৰেলৱে পার্কিঙত জুবিন গাৰ্গ ফেন ক্লাব আৰু ঐকতান-সৰুপেটাৰ উদ্যোগত সৰুপেটাৰ বিএইছবি মহাবিদ্যালয়ৰ খেলপথাৰত মহাবিদ্যালয়ৰ ছাত্ৰ একতা সভা, মহাটেজাছ ট্রাষ্ট আৰু ইউথেলিয়া জুবিন গাৰ্গৰ উদ্যোগত শনিবাৰে পৃথকে পৃথকে বর্ণাঢ্য কার্যক্রমণিকাৰে জুবিন দিৱস উদ্যাপন কৰা হয়।
গেৰুৱাপাৰ ৰূপজ্যোতি সংঘৰ উদ্যোগত সংঘৰ বাকৰিত আজিৰে পৰা দুদিনীয়া কাৰ্যসূচীৰে উদ্যাপন কৰা হৈছে জুবিন দিৱস। শালবাৰী মহাবিদ্যালয়তো কালি দিনজোৰা কাৰ্যসূচীৰে জুবিন দিৱস উদ্যাপন কৰা হয়।