Guwahati:প্ৰাণৰ শিল্পীৰ আৰ্বতমানত পূজাথলী উকা
মহাসপ্তমীত সেমেকা পৰিবেশৰ মাজত আজি মহাষ্টমী ,বৈদিক মন্ত্ৰোচ্চাৰণেৰে আয়ম্বৰপূৰ্ণ পূজা অৰ্চনা
:দুর্গতিনাশিনী দেবী দুর্গাৰ বন্দনাৰ সমান্তৰালভাৱে এইবাৰ পূজা মণ্ডপসমূহত বাজিছে প্রিয় শিল্পী জুবিন গাৰ্গৰ গীত। কালি মহা সপ্তমীৰ সেমেকা পৰিবেশৰ মাজতে আজি মহাষ্টমী ৷ মহাষ্টমীত অংশ ল’বৰ বাবে পুৱাৰে পৰা শৰাই শলিতা দিবৰ বাবে ভক্তসকলে ভীৰ কৰিছে পূজা মণ্ডপ সমূহত ৷
যোৱা ১৯ ছেপ্টেম্বৰত ছিংগাপুৰত জুবিনৰ ৰহস্যজনক মৃত্যুৰ ঘটনাত শোকসাগৰত ডুব যোৱা ৰাজ্যবাসীয়ে পৰদ্ৰা অনুসৰি সাত্ত্বিকতা বজাই ৰাখি অনুষ্টুপীয়াকৈ অংশ লৈছে দুর্গা পূজা উৎসৱত। গুৱাহাটী মহানগৰীকে ধৰি ৰাজ্যজুৰি আজি সপ্তমীৰ পুৱাৰ ভাগত মণ্ডপসমূহত জনসমাগম একেবাৰে সেৰেঙা আছিল যদিও সন্ধিয়ালৈ দেবী দুর্গাক শ্রদ্ধার্ঘ্য যাচিবলৈ সামান্য জনসমাগম হয়। দুর্গা পূজা বুলিলেই অসমতো ভাহি আহে ঢাক-ঢোল, পূজাৰ মন্ত্রোচ্চাৰণৰ মাইকৰ ধ্বনি, ৰঙীন বেলুন, সাজ-সজ্জা, ধুনপেচৰ বাহাৰ আৰু জনস্রোত। এইবাৰ অৱশ্যে ছবিখন তেনে নহয়। এইবাৰ মণ্ডপে মণ্ডপে পালন কৰা দুর্গা পূজাত ধর্মীয় ৰীতি-নীতিৰ আনুষ্ঠানিকতা পূৰণ হ’লেও যিমান পাৰি আড়ম্বৰ আৰু আনন্দ-উৎসবৰ আয়োজনৰ পৰা বিৰত আছে আয়েজকসকল।
গুৱাহাটীৰ বিষ্ণুপুৰ বিমলা নগৰ সাৰ্বজনীন দুর্গা পূজাৰ অন্যতম আয়োজক নাৰায়ণ মালাকাৰে কয় যে এইবাৰ পূজাৰ আয়োজন আন কেইবাৰৰ দৰেই বহু পূৰ্বৰে পৰাই কৰা হৈছিল। তেওঁ কয়, ‘পূজা মণ্ডপটো কলা নির্দেশক নুৰুদ্দিন আহমেদে ধুনীয়াকৈ সজাই তুলিছে। পূজা মণ্ডপত জুবিনদাৰ গীতে বজোৱা হৈছে। সুধাকণ্ঠ ভূপেনদাৰ গীতো আমি পৰিবেশন কৰিছো। কালি ভক্তৰ সমাৱেশ পাতলীয়া আছিল যদিও আজি মহাষ্টমী উপলক্ষে পুৱাৰে পৰা সামান্য ভিৰ হৈছে; কিন্তু মানুহৰ মনবোৰ সেমেকা। কোনো হৈ-চৈউল্লাস নাই, সকলোৱে আহি দেৱী বন্দনা কৰিছে আৰু উভতিছে।
জুবিনদাৰ বাবে আমাৰ সকলোৰে মনবোৰ বেথাৰে ভৰি আছে। জুবিনদাৰ আত্মাই শান্তি পাওক আৰু আমি বিচাৰিছো তেওঁৰ পৰিয়াল আৰু অসমৰ ৰাইজে বিচৰাৰ দৰেই তেওঁ ন্যায় লাভ কৰক।’ মালাকাৰে পুনৰ কয়, ‘আমি জুবিনদাৰ আৰু ভূপেনদাৰ বাবেও মাৰ সন্মুখত আবেদন জনাইছো। জুবিনদাৰ আত্মাৰ সদগতি কামনা কৰি দুই মিনিট সময় মৌন প্রার্থনা কৰিছো। তদুপৰি পূজাস্থলীত জুবিনদাৰ এটা কাটআউট আৰু ভূপেনদাৰ প্ৰতিমূর্তি ৰাখিছো। তাত শ্রদ্ধাঞ্জলি যাচিবলৈ ফুল আদি থোৱা হৈছে। সময় কম হোৱাৰ বাবে আমি জুবিনদাৰ প্ৰতিমূর্তি সাজিব নোৱাৰিলো।’ পূজাস্থলীলৈ অহা ভক্তসকলেও প্রিয় শিল্পীৰ আত্মাৰ সদগতিৰ বাবে প্রার্থনা জনাইছে আৰু তেওঁলৈ শ্রদ্ধাঞ্জলি যাচি চকুলো টুকিছে।
কালি মহাসপ্তমীত দিনৰ ভাগত অইনবাৰৰ তুলনাত পূজা মণ্ডপসমূহৰ পৰিৱেশ যথেষ্ট গোমা আছিল যদিও সন্ধিয়ালৈ সামান্য ভিৰ বাঢ়িছে। গণেশগুৰি-গণেশ উদ্যান সার্বজনীন দুর্গা পূজাৰ আয়োজক তাপস বৈশ্যই জনোৱা মতে, সন্ধিয়ালৈ মানুহৰ ভিৰ বাঢ়ে আৰু তেওঁলোকে দুর্গতিনাশিনীৰ বন্দনাৰ লগতে পূজাস্থলীত থকা প্রিয় শিল্পী জুবিন গাৰ্গৰ ফটোত শ্রদ্ধাঞ্জলি জনায়। স্বাভাৱিকতে এইবাৰ পূজাস্থলীত পূৰ্বৰ দৰে হাঁহি-আনন্দ, উৎসৱ উদ্যাপনৰ পৰিৱেশ নাই যদিও সমাজৰ পৰা অসূয়া, অপায়-অমংগল আঁতৰাবলৈ ৰাইজে দুর্গা দেবীক প্রার্থনা জনাইছে। গণেশ উদ্যানৰ পূজাস্থলীত জুবিনৰ শ্ৰদ্ধাঞ্জলিৰ বাবে সুকীয়াকৈ ব্যৱস্থা কৰা হৈছে। মনকৰিবলগীয়া যে ৰাজ্যৰ প্ৰায় প্ৰতিখন পূজাস্থলীতে জুবিন গাৰ্গৰ বৃহৎ বৃহৎ ফটো ৰখা হৈছে আৰু পুষ্পাঞ্জলিৰ ব্যৱস্থাও কৰা হৈছে।
ৰাজ্যৰ বিভিন্ন প্ৰান্তৰ পূজাস্থলীত পূৰ্বতে সপ্তমীৰ বিয়লিৰ পৰাই ৰাইজৰ সোঁত বৈছিল যদিও এইবাৰ নিশা পর্যন্ত তুলনামূলকভারে উপস্থিতি সেৰেঙা হৈছে। পূৰ্বৰ দৰে ব্যাপক যান-জট হোৱা নাই। জাকজমকতা পৰিহাৰ কৰি সাত্ত্বিকভাবে পূজা-অর্চনা কৰা হৈছে। মণ্ডপে মণ্ডপে শ্রদ্ধাঞ্জলিৰ ব্যৱস্থাৰ লগতে কিছুমান স্থানত জুবিন গাৰ্গৰ ন্যায় বিচাৰি প’ষ্টাৰ-বেনাৰো আঁৰা হৈছে। ইতিমধ্যে পূজা সমিতিসমূহে ৰাজ্যজুৰি সাংস্কৃতিক কাৰ্যসূচী পৰিহাৰ কৰা বুলি ঘোষণা কৰিছে। আজিকালি বিভিন্ন পূজা সমিতিত পৰিৱেশত সুৱগা চৰাবলৈ ‘ডিজে’ও অনা হয়। আয়োজন কৰা বিভিন্ন আকর্ষণীয় প্রতিযোগিতা এই সকলোবোৰ এইবাৰ প্রিয় শিল্পীক হেৰুৱাই দুখ-বেদনাত জৰ্জৰিত ৰাইজে স্বইচ্ছাৰে পৰিৱেশ পৰিহাৰ কৰিছে।
মনকৰিবলগীয়া যে ৰাজ্যৰ অন্যতম আনন্দ-উৎসৱসমূহৰ ভিতৰত উল্লেখযোগ্য দুর্গা পূজাৰ আয়োজনৰ বাবে বহু মাহ পূৰ্বৰে পৰাই পৰিকল্পনা কৰা হয়। এই মর্মে বাজেট প্রস্তুত কৰা হয় আৰু সাজ-সজ্জাৰ আয়োজনো কৰা হয়। বিভিন্ন আগশাৰীৰ পূজা মণ্ডপত ৰাজ্যৰ বাহিৰৰ পৰা মণ্ডপ নিৰ্মাণ কৰা শিল্পী, লাইট-ছাউণ্ডৰ ব্যৱস্থা, আলোকসজ্জা-পোহৰ সজ্জাৰ পৰা আৰম্ভ কৰি গোসানীৰ বস্তু-আভূষণ আদিৰো ব্যৱস্থাৰ বাবে বহু পূৰ্বৰে পৰা পৰিকল্পনা কৰা হয়। পূজা মণ্ডপসমূহৰ মাজত একপ্ৰকাৰ প্ৰতিযোগিতা চলে। কোনে কি ‘থীম’ লৈ পূজা মণ্ডপ সাজিলে, দ্বাৰ নিৰ্মাণ কৰিলে এইবোৰেই আলোচ্য বিষয় হৈ পৰে। একেদৰে বিভিন্ন আনন্দমেলা-বাণিজ্য মেলা আদিও পূজাস্থলীৰ আৱশ্যকীয় আংগিক হৈ পৰিছে।
এইবাৰো বহু পূৰ্বৰে পৰা পৰিকল্পনা কৰাৰ বাবে মণ্ডপসমূহ, দেৱী মূর্তিৰ জাকজমকতা আৰু আলোকসজ্জা আদিৰ ব্যৱস্থা স্বাভাৱিকতে কৰা হৈছে যদিও পূজাস্থলীত নাই পূৰ্বৰ দৰে প্রাণ। নাই কোনো উৎসাহ-উদ্দীপনা। আশিস বিচাৰি-মংগল কামনা কৰি অৱশ্যে ভক্তই দেৱীক জনাইছে সেৱা-আৰতি। পূজাস্থলীসমূহত ঢাক-ঢোলৰ শব্দৰ লগত জুবিনৰ গীতে এক আৱেগ বিহ্বল পৰিৱেশৰ সৃষ্টি কৰিছে। সকলো থাকিও কিবা যেন এক উকা পৰিৱেশ। ৰঙীন মণ্ডপেও মানুহৰ মনলৈ আনিব পৰা নাই ৰং-উছাহ।