Rahul Gandhi :জুবিন গাৰ্গ কাঞ্চনজংঘা: ৰাহুল গান্ধী

অসমবাসীৰ হিয়াৰ আমঠু জুবিন গাৰ্গৰ পৰিয়াল বৰ্গক সমবেদনা জনাবৰ বাবে আজি বিয়লি গুৱাহাটী উপস্থিত হোৱা কংগ্ৰেছৰ শীৰ্ষ নেতা ৰাহুল গান্ধীয়ে জুবিন গাৰ্গৰ কাহিলি পাৰাৰ বাসগৃহত উপস্থিত হৈ গৰিমা গাৰ্গ সহ পৰিয়ালক সাক্ষাৎ কৰি আৱেগিক হৈ পৰে ৷ জুবিনৰ বৃদ্ধ পিতৃ কপিল বৰঠাকুৰ আৰু পত্নী গৰিমা গাৰ্গৰ স’তে মতবিনিময় কৰি তেওঁলোকৰ দুখৰ সমভাগী হয় লোকসভাৰ বিৰোধী দলপতি গৰাকীয়ে ৷

জুবিনৰ পৰিয়াল বৰ্গৰ সাক্ষাৎ কৰি সংবাদ মাধ্যমৰ সন্মুখত ৰাহুল গান্ধীয়ে কয়,জুবিন গাৰ্গ এজন শিল্পীয়েই নাছিল ৷ জুবিন গাৰ্গ প্রকৃতার্থতেই সফল মানৱদৰদী ৷ অসমবাসী ইয়াৰ বাবে নিশ্চিতভাৱে গৌৰৱী I তেওঁৰ চিৰযুগমীয়া গীত সমূহ অকল অসমত সীমাবদ্ধ নাছিল সীমাৰ পৰিধি ভাঙি দেশ – বিদেশতো সমাদৃত আছিল। তেওঁৰ আকস্মিক বিয়োগ অসম নহয় পৃথিৱীৰ বাবে ক্ষতি I

গান্ধীয়ে কয়,মই এসময়ত যেতিয়া ছিকিমত পৰ্বতাৰোহনৰ প্ৰশিক্ষণ লৈ আছিলো ৷ তেতিয়া দূৰত থকা কাঞ্চনজংঘা শৃংগৰ নৌসৰ্গিক ৰূপ দেখি মই আপ্লুত হৈছিল ৷ সেই কাঞ্চনজংঘাৰ দৰেই জুবিন গাৰ্গ ৷ তেওঁৰ গাত কাঞ্চনজংঘাৰ গুণ আছে I তেওঁৰ চিন্তা আৰু মানৱতাবোধ সদায় অনুৰাগীয়ে হ্দয়ংগম কৰি যাব।

ছিংগাপুৰত জুবিন গাৰ্গৰ ৰহস্যজনক মৃত্যু সন্দৰ্ভত তদন্ত কৰি থকা সন্থাই অচিৰেই সত্য ঘটনা পোহৰলৈ আনি জুবিনক ন্যায় প্ৰদান কৰক ৷ জুবিনৰ সৈতে কি হৈছিল জনোৱাটো চৰকাৰৰ দায়িত্ব I কংগ্ৰেছ দল সদায় জুবিনৰ মৃত্যুৰ ন্যায়ৰ বাবে ৰাইজৰ স’তে সহৱস্থান কৰি যাব ৷

উল্লেখ্য যে, তাৎপৰ্যপূৰ্ণ যে ৰাহুল গান্ধীয়ে সাংবাদিকৰ আগত কোনো ধৰণৰ ৰাজনৈতিক মন্তব্য দিয়াৰ পৰা বিৰত থাকে ৷

আনহাতে ৰাহুল গান্ধী বিয়লি দুই বজাত গুৱাহাটী বিমানকোঠত অৱতৰণ কৰাৰ পিছত তাৰ পৰা পোণেপোণে ৰাওনা হয় সোণাপুৰস্থ জুবিন গাৰ্গৰ সমাধিক্ষেত্ৰত ৷ জুবিনক্ষেত্ৰত উপস্থিত হৈ কংগ্ৰেছৰ জ্যেষ্ঠ নেতা গৰাকীয়ে জুবিন গাৰ্গলৈ শ্ৰদ্ধা জনাই ৰাহুল গান্ধীয়ে অৰ্পণ কৰে গামোচা আৰু ফুল। লগতে ধুপ আৰু বন্তি আগবঢ়াই। ইয়াৰ পিচতে আয়তীৰ সৈতে নাম-প্রসংগতো অংশ লয় নেতা গৰাকীয়ে।

ৰাহুল গান্ধী শিল্পী গৰাকীৰ অতি প্ৰিয় নাহৰ পুলি এটাও জুবিনক্ষেত্ৰৰ চৌহদত ৰোপণ কৰে ৷

ইয়াৰ পিছতে তেওঁ ৰাওনা হয় জুবিন গাৰ্গৰ কাহিলিপাৰাস্থ বাসগৃহলৈ ৷ ৰাহুল গান্ধীৰ গুৱাহাটীত থকা সময়ত তেওঁক সংগ দিয়ে এপিচিচিৰ সভাপতি গৌৰৱ গগৈ,এআইচিচিৰ সাধাৰণ সম্পাদক জীতেন্দ্ৰ সিং, দেৱব্ৰত শইকীয়া,ৰকিবুল হুছেইন ,ৰেকিবুদ্দিন আহমেদ,জাকিৰ হুছেইন শিকদাৰ সহ কে’বা গৰাকী নেতা ৷

উল্লেখ্য যে,ৰাহুল গান্ধীৰ আগমনৰ প্ৰতি লক্ষ্য ৰাখি মহানগৰ প্ৰশাসনে শুকু্ৰবাৰে পুৱাৰে পৰা সোণাপুৰৰ জুবিন সমাধিক্ষেত্ৰত চৌদিশে গঢ়ি তোলা হৈছে কটকটীয়া নিৰাপত্তা ব্যৱস্থা৷ একেদৰে জুবিন সমাধিক্ষেত্ৰৰ আশে-পাশে পাঁচশ মিটাৰ ব্যাসাৰ্থৰ ভিতৰত সকলো ধৰণৰ যানবাহনৰ পাকিং নিষিদ্ধ কৰিছিল মহানগৰ আৰক্ষীয়ে।

আনহাতে জুবিনক্ষেত্ৰলৈ আহযাহ কৰা সকলো দৰ্শনাৰ্থীক অহনিষে পৰ্যবেক্ষণ কৰাৰ বাবে সংলগ্ন কৰা হৈছে চিচিটিভি কেমেৰা। বৃহস্পতিবাৰে এপিচিচিৰ সভাপতি গৌৰৱ গগৈ জুবিন সমাধিক্ষেত্ৰত উপস্থিত হৈ সকলো দিশ পৰ্যবেক্ষণ কৰিছিল ৷