Dispur :✒️অসমক দেশৰ শীর্ষ ৰাজ্যকেইখনৰ ভিতৰৰ অন্যতম কৰাৰ শ্ল’গান দি অহা ৰাজ্য চৰকাৰখনে – আন্তঃগাঁথনি উন্নয়নৰ হেজাৰ হেজাৰ কোটি টকা ব্যয় কৰাত – চূড়ান্তভাবে ব্যর্থ হৈছে। এই ধন ব্যয় কৰিবলৈ চৰকাৰখনক সকীয়াই দিবলগীয়া ঘটনা শেহতীয়াকৈ সংঘটিত হৈছে।
উত্তৰ-পূব উন্নয়ন মন্ত্রণালয়ে এই সকীয়নি দিছে বাজ্য চৰকাৰক। নিয়মীয়াকৈ বিভিন্ন উৎসৰ পৰা হেজাৰ হেজাৰ কোটি টকাৰ ঋণ লৈ বিনামূলীয়া আঁচনি ৰূপায়ণত সর্বাধিক গুৰুত্ব আৰোপ কৰি অহা ৰাজ্য চৰকাৰৰ এনে ভূমিকাক স্বয়ং কেন্দ্ৰীয় চৰকাৰো উদ্বিগ্ন।
যোৱা ছেপ্টেম্বৰৰ শেষত হোৱা মন্ত্রণালয়ৰ এক পৰ্যালোচনাত দেখা যায় যে অসমে পঞ্চদশ বিত্তীয় আয়োগৰ হেজাৰ হেজাৰ কোটি টকা ব্যয় কৰিবলৈ এতিয়াও বাকী আছে; অথচ আয়োগৰ সময়সীমাৰ অন্ত পৰিবলৈ মাজত মাত্র কেইটামান মাহহে আছে।
যদিহে চৰকাৰে আগন্তুক সৰ্বাধিক চাৰি মাহৰ ভিতৰত এই পুঁজি ব্যয় কৰিবলৈ সক্ষম নহয়, তেন্তে সেই ধন উভতি যাব। ড’নাৰ মন্ত্রণালয়ৰ ওচৰত অসমৰ ৰিপ’ৰ্ট কার্ড এনেয়েও তেনেই নিৰাশাজনক। প্রকল্প ৰূপায়ণৰ ক্ষেত্ৰত অসমৰ বিৰুদ্ধে বিভিন্ন ধৰণৰ অভিযোগ উত্থাপিত হৈ আহিছে।
তেনে কাৰণত বিগত সময়ছোৱাত কে’বাটাও প্ৰকল্পৰ কাম মন্ত্রণালয়ে আধাতে চিৰদিনলৈ বন্ধ কৰি দিবলৈ বাধ্য হৈছিল।শেহতীয়াকৈ এনে কে’বাটাও সিদ্ধান্ত ড’নাৰ মন্ত্রণালয়ে গ্রহণ কৰিছে। তাৰ মাজতে এইবাৰ আকৌ পুঁজি ব্যয় কৰিবলৈয়ো সতৰ্ক কৰি দিবলগীয়া হৈছে।
অসমৰ দৰে পিছপৰা ৰাজ্য এখনৰ বাবে এনে পৰিস্থিতিৰ উদ্ভৱ হোৱাটো নিতান্তই দুর্ভাগ্যজনক বুলি বিবেচিত হৈছে।শেহতীয়াভাৱে মন্ত্রণালয়ে নির্ধাৰণ কৰে যে ড’নাৰৰ বিভিন্ন আঁচনিৰ নামত অসমে অদ্যাপি ৩,৩৫১.২৩ কোটি টকা ব্যয় কৰিবলৈ বাকী আছে।
আন্তঃগাঁথনি নিৰ্মাণৰ বিভিন্ন কামৰ বাবদ এই পুঁজি ৰাজ্যখনক আবণ্টন দিয়া হৈছিল। যোৱা ৩০ ছেপ্টেম্বৰত মন্ত্রণালয়ৰ এখন বৈঠকত স্পষ্ট কৰা হয় যে পঞ্চদশ বিত্তীয় আয়োগৰ অধীনত আবণ্টন দিয়া এই পুঁজি অহা চাৰি মাহৰ ভিতৰত ব্যয় কৰিব নোৱাৰিলে উভতি যোৱাটো নিশ্চিত।
এনে ক্ষেত্রত প্রশ্ন উত্থাপিত হৈছে যে ইমান দিনে হাতত থকা পুঁজিও ব্যয় কৰিব নোৱাৰা ৰাজ্যখনে কি যাদুৰ সহায়ত এই বৃহৎ পৰিমাণৰ পুঁজি খৰচ কৰিব? এই পুঁজি পিএম ডিভাইন, পথ, বিশেষ পেকেজ, উত্তৰ-পূব পৰিষদৰ আঁচনি আদি শিতানত আবণ্টন দিয়া হৈছিল। অসমৰ বিৰুদ্ধে সততে ড’নাৰৰ উপৰি কেন্দ্ৰীয় চৰকাৰৰ বিভিন্ন মন্ত্রণালয়ে যিকেইটা অভিযোগ বিশেষভাৱে লাভ কৰি আহিছে, তাৰ ভিতৰত অন্যতম হ’ল আঁচনি ৰূপায়ণত যথেষ্ট পলম হোৱা, নিৰ্ধাৰণ কৰি দিয়া নীতি-নির্দেশনাতকৈ নিম্নমানৰ কাম কৰা আৰু ঠিকাদাৰক সময়মতে ধন পৰিশোধ নকৰা।
ড’নাৰে এই অভিযোগবোৰকো শেহতীয়াকৈ পুনৰ বিশ্লেষণ কৰে। তেনে বিশ্লেষণৰ আধাৰত চাৰিটা বিশেষ প্ৰকল্পৰ কাম চিৰদিনলৈ বন্ধ কৰি দিয়াৰ নতুন এক সিদ্ধান্তও গ্ৰহণ কৰিছে। এই প্রকল্পকেইটা বন্ধ কৰি অসম চৰকাৰক ৭.৬৮ কোটি টকা ঘূৰাই দিবলৈ নির্দেশ দিয়া হৈছে। ইতিমধ্যে ব্যয় হোৱা ধনক বাদ দি বাকী কামখিনি ৰাজ্য চৰকাৰক নিজৰ পুঁজিৰে সম্পূৰ্ণ কৰিবলৈয়ো কোৱা হৈছে। এনে দুটা প্ৰকল্পৰ এটা হ’ল হাফলং পানী যোগান আঁচনি। ৬.৫৪ কোটি টকা ব্যয় ধার্য কৰা আঁচনিখনৰ ২.২৬ কোটি টকা বিভাগটোৱে মোকলাই দিছিল। অথচ আঁচনিখন আগনাবাঢ়িল। দ্বিতীয়টো ডিমা হাছাওৰে এটা পথ নির্মাণ প্রকল্প। এই প্রকল্পটোৰ বাবে ৭.৬০ কোটি টকা অনুমোদন দি পুঁজিও মোকলাই দিয়া হৈছিল। এই প্রকল্পটোও অসম্পূৰ্ণ হৈ ৰয়। আনহাতে, কাম সম্পূৰ্ণ কৰাৰ অংশৰ দায়িত্বত থকা ঠিকাদাৰকো আজিকোপতি সম্পূর্ণ ধন মোকলাই দিয়া নহ’ল।
ছেপ্টেম্বৰৰ পৰ্যালোচনাতে অসমৰ ক্ষেত্ৰত আন এটা গুৰুতৰ তথ্যও পোহৰলৈ আহে। সেই অনুসৰি, ২০২২-২৩ত ড’নাৰৰ পুঁজিৰ মাত্র ৪০.৪২ শতাংশহে ব্যৱহাৰ হয়। ২০২৩-২৪ত সেই পৰিমাণ ৩৩.৯৫ শতাংশলৈ হ্রাস পায়। অসমে উন্নয়নৰ পুঁজি ব্যৱহাৰত কিদৰে ব্যৰ্থ হৈছে, এয়া তাৰেই শেহতীয়া এক উদাহৰণ।