Tax Savings:✒️ভাৰতত কৰ ৰেহাই কৰিব পৰা বিভিন্ন বিনিয়োগ আঁচনি আছে। তাৰ ভিতৰত এনে কিছুমান আঁচনি আছে, যিয়ে বিশেষকৈ মহিলাসকলক কেতবোৰ অতিৰিক্ত সুবিধা প্রদান কৰে। এই আঁচনিসমূহৰ সুবিধা লৈ মহিলাসকলে নিজৰ আয়, ব্যয় আৰু সঞ্চয় অনুযায়ী নিজৰ কৰ পৰিকল্পনা কৰিব পাৰে। আয়কৰ আইন অনুসৰি, মুঠ আয়ৰ ওপৰত মহিলাসকলে ৫০ হেজাৰ টকা পর্যন্ত ষ্টেণ্ডার্ড ডিডাকচন দাবী কৰিব পাৰে।
এই আইনৰ ধাৰা ৮০চি অনুসৰি, মহিলাসকলে পিপিএফ, এনএছচি আৰু ইপিএফৰ দৰে কৰ ৰাহিকাৰী আঁচনিসমূহত বিনিয়োগ কৰিও কৰ ৰাহি কৰিব পাৰে। আনহাতে, আয়কৰ আইনৰ ধাৰা ৮০ডিৰ অধীনত মহিলাসকলে নিজৰ বাহিৰেও স্বামী, সন্তান আৰু পিতৃ-মাতৃৰ স্বাস্থ্য বীমাৰ প্রিমিয়ামৰ ওপৰতো কৰ ৰেহাই লাভ কৰিব পাৰে।
কৰ ৰাহিকাৰী আন কেইখনমান জনপ্রিয় বিনিয়োগ আঁচনিৰ বিষয়ে তলত দিয়া হ’ল… যদি কন্যাসন্তানৰ বয়স ১০ বছৰ বা তাৰ তলৰ হয় তেন্তে ২১ বছৰ বয়স নোহোৱালৈকে তেওঁৰ নামত সুকন্যা সমৃদ্ধি আঁচনিত বিনিয়োগ কৰিব পাৰি। আয়কৰ আইনৰ ধাৰা ৮০চিৰ অধীনত, ইয়াত অধিক ৰিটাৰ্ণৰ সুবিধা আৰু কৰ ৰেহাইৰ সুবিধা আছে।
ইকুইটি-লিংকড চেভিংছ স্কিম বা ই এল এছ এছ মিউচুৱেল ফাণ্ডত বিনিয়োগ কৰিলেও ধাৰা ৮০চিৰ অধীনত কৰ ৰেহাই দিয়া হয়। পিপিএফ হৈছে দীর্ঘম্যাদী বিনিয়োগ আঁচনি।
এই আঁচনিখনত বছৰি ১.৫ লাখ টকা পর্যন্ত বিনিয়োগৰ ক্ষেত্ৰত ৮০চি ধাৰাত কৰ ৰেহাই দিয়া হৈছে।
ৰাষ্ট্ৰীয় পেন্সন ব্যৱস্থা বা এনপিএছৰ আওতাতো ৫০ হেজাৰ টকা পর্যন্ত অতিৰিক্ত কৰ বেহাই পাব পাৰে মহিলাসকলে।
আয়কৰ আইনৰ ২৪ নম্বৰ ধাৰা অনুসৰি, মহিলাৰ নামত গৃহ ঋণ ল’লে বছৰি দুই লাখ টকা পর্যন্ত সুত পৰিশোধৰ ক্ষেত্ৰত কৰ ৰেহাইৰ দাবী কৰিব পাৰি। য’ত নেকি, প্ৰথমবাৰৰ বাবে ঘৰ ক্ৰয় কৰা লোকসকলে গৃহ ঋণত ১.৫ লাখ টকা পর্যন্ত কৰ ৰেহাই দাবী কৰিব পাৰে।
