Governor Lakshman Prasad Acharya inaugurated the GI Mahotsav in Guwahati:
মহানগৰীৰ আৰ্য মহাবিদ্যালয় খেলপথাৰত আজি বিয়লী অসমৰ ৰাজ্যপাল লক্ষ্মণ প্ৰসাদ আচাৰ্যই জি আই মহোৎসৱৰ আনুষ্ঠানিকভাৱে উদ্বোধন কৰে।
ভাৰত চৰকাৰৰ উন্নয়ন আয়ুক্ত এম এছ এম ইৰ কাৰ্যালয়ৰ সহযোগত পি এইচ ডি চেম্বাৰ অৱ কমাৰ্চ এণ্ড ইণ্ডাষ্ট্ৰী (পি এইচ ডি চি চি আই)ৰ উদ্যোগত চাৰিদিনীয়াকৈ আয়োজিত হৈছে জি আই মহোৎসৱৰ প্ৰদৰ্শনী। ১৮ জানুৱাৰীলৈকে চলিব লগা এই প্ৰদৰ্শনীখন প্ৰতিদিনে পুৱা ১০ বজাৰ পৰা নিশা ৮ বজালৈ খোলা থাকিব।
জি আই মহোৎসৱ মুকলি কৰি দিয়া ভাষণত ৰাজ্যপাল আচাৰ্যই কয় যে জি আই টেগিং ব্যৱস্থাই কেৱল আমাৰ দেশৰ পৰম্পৰাগত আৰু চহকী ঐতিহ্যক সুৰক্ষিত কৰাই নহয়, গ্ৰাম্য অৰ্থনীতিৰ বৃদ্ধিয়ে মহিলা উদ্যোগীসকলক সবলীকৰণত সহায় কৰে। লগতে জি আই মহোৎসৱৰ আয়োজন কৰা পি এইচ ডি চি চি আইৰ শলাগ লয়।
অধিৱেশনত পি এইচ ডি চি চি আইৰ চি ই অ’ এণ্ড এছ জি ড: ৰঞ্জিত মেহতা, পি এইচ ডি চি চি আই এম এছ এম ই কমিটীৰ অধ্যক্ষ বিনোদ কাৰ্ৱা, এন ই চিৰ সম্পাদক সতীন্দৰ কুমাৰ ভল্লাকে ধৰি আন কেইজনমান লোকেও ভাষণ দিয়ে।
অনুষ্ঠানত অংশ লয় পি এইচ ডি চি চি আইৰ এ তোভি চোফী, ডি পি গোৱেল, ডাঃ এইচ পি কুমাৰ, কাঞ্চন জুটছি, ৰাকেশ সুক্লা মেঘমালা চৌধুৰী, প্ৰেমাশীছ মিত্ৰ, কৌশিক চৌধুৰী, অংকিতা পালকে ধৰি এম এছ এম ই, নাবাৰ্ড, এন এছ আই চিৰ বিশিষ্ট ব্যক্তিয়ে। ও
উল্লেখ্য যে ,এই জি আই মহোৎসৱৰ মূল উদ্দেশ্য হৈছে অনন্য ভৌগোলিক উৎপত্তিৰ জি আই (ভৌগোলিক সূচক) টেগ কৰা সামগ্ৰীৰ সুৰক্ষা আৰু প্ৰচাৰৰ গুৰুত্বৰ বিষয়ে সজাগতা সৃষ্টি কৰা। এই প্ৰদৰ্শনীয়ে দেশৰ শিল্পী, উৎপাদক, আৰু উদ্যোগীসকলৰ বাবে তেওঁলোকৰ স্বকীয়তা আৰু বৈচিত্ৰ্য প্ৰদৰ্শন কৰাৰ লগতে ক্ৰেতা, নীতি নিৰ্ধাৰক আৰু উদ্যোগ বিশেষজ্ঞৰ সৈতেও সংযোগ স্থাপনৰ এক উৎকৃষ্ট মঞ্চ প্ৰদান কৰিব। প্ৰদৰ্শনীৰ প্ৰৱেশ সকলোৰে বাবে বিনামূলীয়া।
এই প্ৰদৰ্শনীলৈ অহা দৰ্শকে দেশৰ বিভিন্ন প্ৰান্তৰ পৰা অহা জি আই সামগ্ৰীৰ বিস্তৃত পৰিসৰৰ পৰা অন্বেষণ, অভিজ্ঞতা আৰু বজাৰ কৰাৰ সুযোগ পাব। প্ৰদৰ্শনীৰ সময়ত দেশৰ বিভিন্ন প্ৰান্তৰ পৰা পঞ্চাশটাতকৈও অধিক জি আই সামগ্ৰী প্ৰদৰ্শন আৰু বিক্ৰীৰ ব্যৱস্থা কৰা হৈছে।
